သျှမ်းပြည်နယ်တောင်ပိုင်း ၊ အင်းလေးကန်ဒေသတွင် အပူပိုင်းရာသီ ဖြစ်သော ဧပြီ၊ မေလတို့တွင် နှစ်စဉ်ရေခမ်းခြောက်မှုများဖြစ်ပွားလေ့ရှိရာ ယခုနှစ်အင်း လေးကန် ရေ သည်ယခင်နှစ်များထက်ရေပိုမိုကျန်ရှိနေသေးကြောင်း အင်းလေး ဒေသခံများထံမှသိရသည် ။
“ အင်းရေကတော့နှစ်တိုင်းထက်စာရင် မကျတော့ဘူး ၊ ရေရှိလာတယ် ။ အင်းထဲမှာ တာတွေရိုက် ၊ လက်လုပ်ဆည်တွေရိုက် ထားလို့ ရေတွေ ကျန်နေတာပေါ့ ။ ခါတိုင်း နှစ်ဆိုဒီချိန်မြေတွေကွဲအက်တဲ့အထိ ဖြစ်ပြီး သွားလာရတာခက်ခဲ့ တာပေါ့ ” ဟု အင်းလေးဖော်တော်ဦးဘုရားကော်ပက ဥက္ကဌ ဦးထွန်းအောင်ကပြောသည် ။
အင်းလေးကန် နှစ်စဉ်ရေခန်းခြောက်သည့်လမှာ တပေါင်း ၊ တန်ခူး၊ ကဆုန် လ တို့ဖြစ်ပြီး ၊ အင်းရေများသည် လွိုင်ကော် လောပီတ အထိစီးဆင်းလေ့ရှိ သောကြောင့် ရေများတောင့်ခံနိုင်ရန် ဆည်များများဆောက်ခြင်း ပြုလုပ်သင့် ကြောင်း ၄င်းကဆက်ပြောသည် ။
“အဓိကကျနော်တို့အင်းလေးရေခန်းခြောက်ရတဲ့ပြဿနာက တောင်ပေါ်မှာ မြေက တုံးတွေဖြစ်နေတော့ မိုးခေါင်လာတာပေ့ါ ၊ ဒီနှစ်မိုးကောင်း ကောင်းမ ရွာသေးဘူး ၊ လှေကားထစ် စိုက်ပျိုးနည်းကို လည်းမသုံးကြ တော့ဘူး၊ ဟိုတယ်ဇုန်လုပ်နေတဲ့ နေရာက နှုန်းမြေတွေအင်း ထဲကိုဝင်ရောက်လာတယ် ဟိုတယ် ဇုန်လုပ်ငန်း က တစ်ဘက်ကတိုးတက်ပြီး တစ်ဘက်မှာ ဆုတ်ယုတ် တယ် ဒါတွေကအဓိကပြဿနာ ဖြစ်တယ်” ဟု တာလေးရွာနေ ဒေသခံ ကိုထွန်းရွှေက ရှင်းပြသည် ။
ယခုနှစ်ပိုင်းများတွင် အင်းလေးကန်ဒေသနေရာတစ်ချို့၌ ရေခမ်းခြောက်မှု ကာကွယ်နိုင်ရန် ဆည်များ၊ တာများ လက် လုပ်ဆည်များ ဆောက်ထား သည်ဟုသိရသည် ။
အင်းလေးဒေသတွင် စပါး ၊ ခရမ်းချဉ်သီး ၊ငရုပ်သီး၊ ဘူးသီး ခရမ်းသီး၊ မုန်လာထုတ် စသည့်သီးနှံများစိုက်ပျိုး လျှက်ရှိပြီး တိုက်နယ် ပေါင်း (၄၃)ခုရှိကာကျေးရွာပေါင်း (၄၄၄) ရွာရှိသည် ။
