သျှမ်းပြည်တောင်ပိုင်းလင်းခေးခရိုင် လင်းခေးမြို့တွင် ရ၁ နှစ်မြောက် ပြည်ထောင်စုနေ့ အထိမ်း အမှတ် အခမ်းအနားကို ခရိုင်အုပ်ချုပ်ရေးမှူးက ဦးဆောင်ကျင်းပရာ ဖိတ်ကြားထားသော ၄ မြို့နယ်မှအထူး ဧည့်သည်တော် ၅၀၀ ကျော်တက်ရောက်ကြောင်းသိရသည်။
ဖေဖော်ဝါရီလ ၁၂ ရက်နေ့ကကျင်းပသော ရ၁ ပြည်ထောင်စုနေ့အခမ်းအနားကို လင်းခေးမြို့ နွယ်ဝတီခန်းမ တွင် ပြုလုပ်ကျင်းပ ရာ မောက်မယ် မိုင်းပန် မိုးနဲ လင်းခေး ၄ မြို့နယ် မှအထူးဧည့်သည်တော်များ တက်ရောက် ခဲ့သည်။
“ပွဲကတော့ မနေ့ညကတည်း လုပ်တာပါ။ ပျော်ပွဲရွှင်ပွဲပေါ့။ ဒီနေ့မနက်တော့ နွယ်ဝတီခမ်းမ မှာ ပြည်ထောင်စု နေ့အခမ်းအနားပြုလုပ်တယ်။ သမ္မတကြီးပေးပို့လာတဲ့သဝဏ်လွှာဖတ်ကြားတယ်။ ထူးချွန်တဲ့ကလေးသူငယ် တွေကိုဆုချီးမြှင့်တယ်။ ညနေကျတော့ ညစာစားပွဲရှိတယ်။ မောက်မယ် မိုင်းပန် မိုးနဲ လင်းခေး ၄ မြို့နယ် ကအထူးဧည့်သည်တော်တွေနဲ့ပေါ့။ အကအလှတွေပြိုင်ကြမယ်။ အဆိုတော် ဘိုဖြူကနေ လာပြီးဖျော်ဖြေပေး မယ်”- ဟု မြို့နယ် သျှမ်းစာပေယဉ်ကျေးမှုမှ နန်းယိင်းဟတ်ကပြောသည်။
ပြည်ထောင်စုနေ့အခမ်းအနားမနက်ပိုင်းတွင် တက္ကသိုလ်ဝင်တန်းတွင်ဘာသာစုံဂုဏ်ထူးရှင် ကျောင်းသားလေး ၂ ဦးအား ပညာသင်စရိတ်ထောက်ပ့ံပေးအပ်မှုလည်းပြုလုပ်ခဲ့ကြောင်းသိရသည်။
“ မနှစ်က ၁၀ တန်းမှာဘာသာစုံဂုဏ်ထူးထွက်တဲ့ လင်းခေးဒေသခံ ကလေး ၂ ယောက် စိုင်းကွန်းခမ်းနဲ့စိုင်းလောဝ်ဝမ်းခေးတို့ကို ပညာသင်စရိတ် ၁ လ ၄ သောင်း နဲ့ ဧပြီလအထိ ၅ လ။ စုစုပေါင်း ၂ သိန်းကျပ်ကို ပြည်နယ်ကနေ ထောက်ပ့ံငွေပေးအပ်တယ်။ မိဘတွေက ကိုယ်စား တက်ရောက်လက်ခံတယ် ။ နောက်ပြီးတော့ စာစီစာကုံးပြိုင်ပွဲမှာ ဆုရရှိသူတွေကိုဆုချီးမြှင့်တယ် ။ အဲဒီအခမ်းအနားပြီးရင် အထွေထွေ အုပ်ချုပ်ရေးရုံးလမ်း ကတ္တရာခင်း ကျေးလက် လမ်းတခုဖွင့်ပွဲလုပ်တယ်။ ပြီးတော့ ရွာမကြီးအရှေ့ရပ်ကွက်က ရပ်ကွက်ရုံးဖွင့်ပွဲလုပ်တယ်။ ဒီနှစ်ပြည်ထောင်စုနေ့ရဲ့ထူးခြားတဲ့ အစီအစဉ်လေးပေါ့နော် ”- ဟု နန်းယိင်းဟတ် ကဆက်လက်ပြောပြသည်။
၁၉၄၇ ခုနှစ်က သျှမ်းစော်ဘွားများ၊ တိုင်းရင်းသားခေါင်းဆောင်များနှင့် ဗမာ့ခေါင်းဆောင် ဗိုလ်ချုပ် အောင်ဆန်းတို့ စုပေါင်းကာ ပင်လုံစာချုပ်လက်မှတ်ရေးထိုးသည့်နေ့အားအစွဲပြုကာ ပြည်ထောင်စု နေ့အဖြစ်သတ်မှတ်ခဲ့ကြပြီး အထိမ်းအမှတ်ပွဲကျင်းပလာခဲ့သည်မှာယနေ့တိုင် ရ၁ နှစ်ပြည့်ပြီဖြစ်ပါသည်။
Photo by Ying Hark
