သျှမ်းပြည်တောင်ပိုင်းပင်လုံမြို့တွင် ရ၁ နှစ်မြောက် ပြည်ထောင်စုနေ့အခမ်းအနားအထိမ်းအမှတ်ပွဲ ၂ ပွဲအား သျှမ်းပြည်နယ်အစိုးရ နှင့် အမျိုးသား ဒီမို ကရေစီအဖွဲ့ချုပ်တို့မှ ကျင်းပခဲ့ကြကြောင်း သိရသည်။
သျှမ်းပြည်နယ်အစိုးရက ဦးဆောင်ကာ နှစ်စဉ်ကျင်းပမြဲအတိုင်း ပြည်ထောင်စုနေ့အခမ်းအနားကို မြို့နယ်အထွေထွေအုပ်ချုပ်ရေးမှူးက ဦးဆောင်စီစဉ်ကာ ပင်လုံမြို့ကျောက်တိုင်ကွင်းတွင်ဖေဖော်ဝါရီလ ၁၂ ရက်မနက်ပိုင်းက ကျင်းပခဲ့သည်။
အဆိုပါအခမ်းအနားတွင် သမ္မတကြီးဦးထင်ကျော်မှပေးပို့သော သဝဏ်လွှာ ဖတ်ကြားခြင်း၊ ထူးချွန်သော ကလေးသူငယ်များအား ဆုချီးမြှင့်ခြင်း တို့ပြုလုပ်ခဲ့ပြီး ဖိတ်ကြားထားသည့် မြို့မိမြို့ဖများ ၊ သျှမ်းစာပေယဉ်ကျေးမှုအသင်းဝင်လူငယ်များ၊ ဌာနဆိုင်ရာဝန်ထမ်းများ စုစုပေါင်း ၈၀၀ ခန့်တက်ရောက်ခဲ့ကြောင်း မြို့ခံလူငယ်စိုင်းဆု ကသျှမ်းသံတော်ဆင့်အားပြောသည်။
တဖက်တွင်လည်းအမျိုးသားဒီမိုကရေစီအဖွဲ့ချုပ် ဗဟိုကော်မတီက ဦးဆောင်ကာ ၄င်းပါတီဝင်များကလည်း ပင်လုံမြို့တွင်ပင် ရ၁ နှစ်မြောက် ပြည်ထောင်စုနေ့အထိမ်းအမှတ်အဖြစ် ၃ ရက်ဆက်တိုက်ကျင်းပခဲ့ကြောင်း လည်း သိရသည်။
“ NLD ပါတီ ဗဟိုကော်မတီ ပြည်နယ်နဲ့တိုင်းကော်မတီဝင်တွေနဲ့ ပင်လုံမြို့က သူတို့ပါတီဝင်တွေက ဘဲစုပေါင်းကျင်းပတာ။ ပင်လုံဒေသခံတွေကိုတော့မဖိတ်ဘူး။ ၁၁ ရက်နေ့ညက သျှမ်းရိုးရာခေါပုတ်ထောင်း ပွဲလုပ်တယ်။ ၁၂ ရက်နေ့ည တိုင်းရင်းသားရိုးရာအကပဒေသာပြိုင်ပွဲလုပ်မယ်။ ၁၃ ရက်နေ့ညကျတော့ ဗိုလ်ချုပ်အောင်ဆန်းမွေးနေ့အထိမ်းအမှတ် ပျော်ပွဲရွှင်ပွဲလုပ်မယ်လို့ကြားထားတယ် ” – ဟု စိုင်းဆုက သျှမ်းသံတော်ဆင့်အားပြောပြသည်။
ပင်လုံမြို့ကဲ့သို့နည်းတူ သျှမ်းပြည်တွင်း တခြားမြို့နယ်များတွင်လည်း ပြည်ထောင်စုနေ့အခမ်းအနား ကျင်းပပြီး အထိမ်းအမှတ်အဖြစ် ထူးချွန်ကျောင်းသားများအား ဆုပေးပွဲပါကျင်းပခဲ့ကြောင်းသိရသည်။
ယခုနှစ် ပင်လုံမြို့တွင်ကျင်းပသော ပြည်ထောင်စုနေ့အခမ်းအနားသို့ နိုင်ငံတော်အတိုင်အပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက်ခြင်းမရှိပေ။
