ထိုင်းနိုင်ငံတွင် အလည်အပတ်နိုင်ငံကူးလက်မှတ် (PV) ကိုင်ဆောင်ထားသူများ ပတ်စ်ပို့သက်တမ်းတိုးခြင်းနှင့် အမျိုးအစားပြောင်းလဲခြင်း လုပ်ငန်းစဉ်များတွင် နေပြည်တော်၏ တိုက်ရိုက်ခွင့်ပြုချက် ရယူရမည်ဆိုသည့် သတင်းများကြောင့် ထိုင်းရောက်မြန်မာလုပ်သားများကြား စိုးရိမ်မှု မြင့်တက်နေသည်။

ယခင်က PV အမျိုးအစားမှ PJ အလုပ်သမားပတ်စ်ပို့သို့ ပြောင်းလဲခြင်းကို ဘန်ကောက်မြို့ရှိ မြန်မာသံရုံးတွင် ဆောင်ရွက်နိုင်သော်လည်း ယခုအခါ နေပြည်တော်သို့ စာရင်းပေးပို့ကာ ခွင့်ပြုချက်စောင့်ရမည်ဖြစ်သဖြင့် လုပ်ငန်းစဉ်များ ကြန့်ကြာလာနိုင်ကြောင်း သံရုံးနှင့်နီးစပ်သည့် အကျိုးဆောင်များထံမှ သိရသည်။

လက်ရှိအချိန်ထိ မြန်မာသံရုံးဘက်က အဆိုပါကိစ္စနှင့် ပတ်သက်၍ တရားဝင် ထုတ်ပြန်ချက်တစ်စုံတစ်ရာ ထွက်ပေါ်မလာသေးပေ။

သို့သော်လည်း သံရုံးနှင့် ချိတ်ဆက်ဆောင်ရွက်နေသည့် အေဂျင်စီများနှင့် ကုမ္ပဏီများ၏ သီးသန့်အဖွဲ့ (Group) များအတွင်း၌ အဆိုပါ မူဝါဒအပြောင်းအလဲကို အကြောင်းကြားထားပြီးဖြစ်ကြောင်း အလုပ်သမားအရေး ဆောင်ရွက်သူ ဦးမင်းထွန်းက သျှမ်းသံတော်ဆင့်သို့ ပြောသည်။

“အခုလောလောဆယ်ကတော့ စာထုတ်တာ၊ မထုတ်တာထက်ကို လက်တွေ့မှာ ဘာတွေလုပ်လို့ရပြီလဲဆိုတာက ပိုပြီး အရေးကြီးပါတယ်။ လက်တွေ့မှာ သွားလုပ်တဲ့သူတချို့ မရဘဲ ပြန်လှည့်လာရတာတွေ ရှိနေပြီလို့ ပြောတယ်” ဟု ၎င်းက ဆိုသည်။

ယခုကဲ့သို့ နေပြည်တော်သို့ တင်ပြစိစစ်ရမည့် လုပ်ငန်းစဉ်သစ်သည် သာမန်အလုပ်သမားများနှင့် ကျောင်းသားများထက် ၂၀၂၁ ခုနှစ်နောက်ပိုင်း နိုင်ငံရေးကြောင့် ထွက်ပြေးတိမ်းရှောင်လာသူများနှင့် တက်ကြွလှုပ်ရှားသူများကို ပစ်မှတ်ထားခြင်းဖြစ်နိုင်ကြောင်း ဦးမင်းထွန်းက ဆက်ပြောသည်။

“သာမန်ရိုးကျ ကျောင်းသားတွေပဲဖြစ်ဖြစ်၊ နိုင်ငံရေးနဲ့ မပတ်သက်တဲ့သူတွေပဲဖြစ်ဖြစ် PV ကိုင်ကိုင်၊ PJ ကိုင်ကိုင် ဘာမှပြဿနာ မရှိလောက်ဘူး။ အဓိက သူတို့ပစ်မှတ်ထားတာကတော့ နိုင်ငံရေးလုပ်တဲ့သူတွေကို အကျပ်ကိုင်ဖို့ အနေအထားတစ်ခုလို့ မြင်ပါတယ်” ဟု ဦးမင်းထွန်းက သုံးသပ်သည်။

နေပြည်တော်၏ စိစစ်မှုများကြောင့် ပတ်စ်ပို့အသစ်ရရှိရန် အနည်းဆုံး ၂ လမှအထက် ကြာမြင့်သွားနိုင်ပြီး၊ အဆိုပါလုပ်ငန်းစဉ်သည် ဖြတ်လမ်းနည်းဖြင့် လုပ်ကိုင်လိုသည့် ပွဲစားဈေးကွက်ကို ပိုမိုအားကောင်းလာစေမည် ဖြစ်ကြောင်း အလုပ်သမားအရေးဆောင်ရွက်သူများက ပြောကြသည်။

မြေပြင်အခြေအနေတွင် ပတ်စ်ပို့လဲလှယ်ရန်အတွက် ပွဲစားခ ဘတ်ငွေ ၂ သောင်း (မြန်မာကျပ်ငွေ ကာလပေါက်စျေး ၂၅သိန်း) မှ ၃ သောင်း (မြန်မာကျပ်ငွေ ကာလပေါက်စျေး ၃၈ သိန်းကျော်) အထိ ပေးဆောင်နေရသူများ ရှိနေကြောင်း သိရသည်။

“သံရုံးမှာ လဲလို့မရတာရော၊ ကြာတာရောကြောင့် နယ်စပ်ဆင်းပြီး ဘတ်ငွေအများကြီးပေးကာ ပြန်လုပ်နေရသူတွေရှိတယ်။ မြေပြင်မှာဖြစ်နေတာနဲ့ အပေါ်က မူဝါဒတွေက တခြားစီပဲ” ဟု ဦးမင်းထွန်းက ဆိုသည်။

ပြီးခဲ့သည့် ဩဂုတ်လ ၆ ရက်မှ ၇ ရက်အထိ အာဏာသိမ်းစစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်၏ ဘန်ကောက်ခရီးစဉ်အပြီးတွင် ယခုကဲ့သို့ သတင်းများ ထွက်ပေါ်လာခြင်းဖြစ်သည်။

လက်ရှိတွင် ထိုင်းနိုင်ငံရောက် မြန်မာလုပ်သားများသည် ပတ်စ်ပို့သက်တမ်းတိုးရန် ခက်ခဲခြင်း၊ အခွန်ပေးဆောင်ရန် ဖိအားပေးခံရခြင်းနှင့် စစ်မှုထမ်းဥပဒေကြောင့် နေရပ်ပြန်ရန် စိုးရိမ်ခြင်း စသည့် အကျပ်အတည်းပေါင်းစုံနှင့် ရင်ဆိုင်နေကြရသည်။