သျှမ်းပြည်မြောက်ပိုင်း ကွတ်ခိုင်မြို့မှ သိန္နီမြို့သို့ရောက် ရှိနေသော စစ်ဘေးရှောင်လူထု ၁၇၀ ကျော်ရှိပြီဖြစ်ကြောင်းသိရသည်။
ဖေဖော်ဝါရီလ ၁၁ ရက်နေ့က လားရှိုးခရိုင်အမျိုးသားလွှတ်တော်ကိုယ်စားလှယ် စိုင်းဝမ်လျန်းခမ်း၊ တန့်ယန်းမြို့နယ် ပြည်နယ်လွှတ်တော်ကိုယ်စားလှယ် စိုင်းခမ်းမြတ်နှင့် သိန္နီမြို့နယ် ပြည်နယ်လွှတ်တော်ကိုယ်စားလှယ် နန်းခင်ထားရီတို့က စစ်ဘေးရှောင်လူထုနှင့်သွားရောက်တွေ့ဆုံ ရာတွင် ဟင်းသီးဟင်းရွက်နှင့်စားသောက်ဖွယ်ရာများလိုအပ်နေကြောင်းသိရသည်။
“ဒီသိန္နီဘက်ကိုရောက်လာတာက ၁၇၄ ယောက်ရှိတယ်။ တာ့ခိုင်ရွာကလူတွေဘဲ ကွတ်ခိုင်မြို့နယ် ၀မ့်ခေါက်ကွဲရွာထဲကိုရောက်နေတာက အိမ်ထောင်စု ၁၃ စု၊ လူဦးရေ ၅၀ ကျော်ရောက်နေတယ်လို့ကြားတယ်။ သိန္နီကိုရောက်နေတဲ့ ၁၇၀ ကျော်က အခုလောလောဆယ် ဆန် ဆီဆား နဲ့အခြောက်အခြမ်းတွေတော့ရှိတယ်။ ဟင်းသီးဟင်းရွက်တွေတော့မရှိဘူး။ အဲတာကြောင့် ဒီဒေသမှာနေတဲ့လူထုကိုကျမတို့က တောင်းဆိုချင်တယ်။ စေတနာရှင်တွေ လာပြီးတော့ ဟင်းသီးဟင်းရွက်တွေ ပေးကမ်းကြပါဦးလို့။”- ဟု နန်းခင်ထားရီက ပြောသည်။
အဆိုပါစစ်ဘေးရှောင်များသည် ဖေဖော်ဝါရီလ ၅ ရက်နေ့က အစိုးရတပ်နှင့် တအာင်းတပ်မတော်တို့ကြားဖြစ်ပွါးသောတိုက်ပွဲကြောင့် ကွတ်ခိုင်မြို့နယ် ၀မ့်ဆိုင်းခေါင်ရွာ ၀မ့်တာ့ခိုင်ရွာ မှ သိန္နီမြို့နယ် ကောင်းအိုင်အုပ်စု ကောင်းအိုင်ရွာမဘုန်းကြီးကျောင်းသို့တိမ်းရှောင်ခိုလှုံကာ နေကြသူများဖြစ်ကြောင်းသိရသည်။
ကွတ်ခိုင်မြို့နယ်အတွင်း အစိုးရတပ်မတော်နှင့် တအာင်းတပ်ဖွဲ့ကြား၊ တအာင်းတပ်ဖွဲ့နှင့် သျှမ်းပြည်တပ်မတော် RCSS/SSA ကြား တိုက်ပွဲများ ငြိမ်နေသည်ဟုဆိုသော်လည်း ၂ ဦး ၂ ဘက်ကြားတင်းမာနေသည့်အနေအထားရှိနေသေးတာကြောင့် စစ်ဘေးရှောင်များနေရပ်မပြန်ရဲသေးဟုသိရပါသည်။
Leave a Comments