သျှမ်းပြည်မြောက်ပိုင်း သီပေါမြို့နယ် တာ့လုံရွာအနီး နမ္မတူမြစ်ပေါ် အထက်ရဲရွာရေအားလျှပ်စစ် ထုတ်လုပ် ရေး အတွက် လွှတ်တော်မှ ဘတ်ဂျက်တိုးချပေးသည့်အပေါ် သီပေါဒေသခံများလွှတ်တော်အမတ် များ တွေ့ဆုံဆွေးနွေးခဲ့ပြီး ဆန့်ကျင်ကန့်ကွက်ကြောင်း ကြေငြာချက်ထုတ်ပြန်ခဲ့သည်။

သျှမ်းပြည်မြောက်ပိုင်း သီပေါမြို့နယ် သျှမ်းစာပေနှင့်ယဉ်ကျေးမှုခန်းမတွင် အောက်တိုဘာလ ၁၂ ရက် ယနေ့မနက် က သီပေါဒေသခံလူထု ၊ လွှတ်တော်အမတ်များ ၊ လယ်သမားများ စုစုပေါင်း အင်အား ၁၀၀၀ ခန့်တွေ့ဆုံဆွေးနွေးကြပြီး ဆန့်ကျင်ကြောင်း ကြေငြာချက်တစောင်ထုတ်ပြန်ခဲ့သည်။

ဒေသခံများ အစဉ်တလျှောက်ကန့်ကွက်သည့်ကြား အထက်ရဲရွာရေအားလျှပ်စစ်စီမံကိန်းအား ဆက်လက် တည်ဆောက်သွားရန်အစိုးရမှ လုပ်ဆောင်နေသည့်အပေါ် လူထုအနေဖြင့် များစွာစိတ်မကောင်းမိကြောင်း ဒေသခံနန်းလောဝ်ခမ်းကပြောသည်။

အစိုးရနဲ့ ကုမ္မဏီတွေကို ကျမတို့ရွာသားတွေအနေနဲ့ တောင်းဆိုချင်ပါတယ်။ လူထုသဘောထားကိုနားထောင်ပါ ရေကာတာတည်ဆောက်မှုကို ရပ်ပေးစေချင်ပါတယ်။ လူအနည်းစုကောင်းစားရေးအတွက် မိမိနိုင်ငံက ဒေသခံလူထု ဒုက္ခရောက်ရမယ့်အရေးကိုတော့ စဉ်းစားပေးစေချင်ပါတယ်။ လူထုဒုက္ခမရောက်စေဘဲ တခြားနည်းလမ်းနဲ့ လျှပ်စစ်မီးလင်းရေး တိုးတက်တဲ့နိုင်ငံတွေဆီက ဗဟုသုတကိုလေ့လာပြီး လုပ်ပေးပါ လို့အနူးအညွတ်တောင်းချင်တယ်။ ကျမတို့တာလုံဒေသခံလူထုတွေရဲ့ ဆန္ဒသဘောထားကို နားမထောင်ဘဲ အလေးမထားဘဲ သူတို့ဆက်လက်ပြီးရေကာတာ ဆောက်လုပ်သွား မယ်ဆိုရင် ၊ ကျမတို့ ဆန့်ကျင်လို့ မနိုင်လို့ ကျမတို့ရွာတကယ်ပြောင်းရွှေ့ခဲ့ရသည်ရှိသော် ဒါ သမိုင်းဆိုးတခုအဖြစ် မှတ်တမ်းတင်လိုက်မယ်။ ကျမတို့ ရှေးအစဉ်အဆက်ကတည်းက နေထိုင်လာတဲ့ဒီရွာလေးဟာ မနေ့တနေ့ကမှလာဆောက်တဲ့ ဘာမဟုတ်တဲ့ဒီစီမံကိန်းကြောင့် ကျမတို့ရွာသားတွေ မပြောင်းချင်ဘဲနဲ့ ရွာပြောင်းရမယ်ဆိုလို့ရှိလည်း ဒါ နောင်လာနောက်သားတွေသိအောင် သမိုင်းဆိုးတခုဖြစ်ကြောင်း ကျမတို့ ရေးမှတ်ထားမယ်။ – ဟု တာလုံရွာသူ နန်းလောဝ်ခမ်း ကပြောသည်။

အထက်ရဲရွာရေကာတာအတွက်ဆောက်ထားသော အခြေခံအုဋ်မြစ်မခိုင်မာမှုကြောင့် ယမန်နှစ်က ရေတိုက်စား ခြင်းဖြင့် ပင် ပျက်စီးနေသည်ကိုတွေ့ရပြီး တည်ဆောက်ပြီးစီးပါက လူထုအတွက်များစွာ အန္တရာယ်ရှိနိုင်ကြောင်း ၊ထို့အတွက် လွှတ်တော်မှ ရေကာတာတည်ဆောက်ရေး ဘတ်ဂျက်ကိုလျှော့ချပေးရန် သီပေါမြို့နယ် ပြည်သူ့ လွှတ်တော်အမတ် စိုင်းသန့်ဇင်က ပြီးခဲ့သည့်လက လွှတ်တော်အတွင်း တင်ပြဆွေးနွေးခဲ့သည်။

သို့သော် လျှပ်စစ်နှင့်စွမ်းအင်ဝန်ကြီးဌာန ဒုဝန်ကြီး ဦးထွန်းနိုင်က ၄င်းနှင့်ပတ်သက်ပြီး စိုးရိမ်ရသည့်အခြေ အနေမရှိကြောင်း ချေပပြောဆိုပြီး ရေကာတာဆက်လက်တည်ဆောက်သွားမည့်အရေးသာ ပြောဆိုခဲ့သည်။
လွှတ်တော်တွင် မဲခွဲဆုံးဖြတ်ရာတွင်လည်း ၅၀၁ မဲသည် ရေကာတာ ဆက်ဆောက်ရန် ထောက်ခံနေသည့် မဲဖြစ်ပြီး ကန့်ကွက်သည့်မဲမှာ ၂၈ မဲသာရှိသဖြင့် လွှတ်တော်မှ ရေကာတည်ဆောက်မှုအတွက် ဘတ်ဂျက်ငွေ ၃ ဘီလီယံ (အမေရိကန်ဒေါ်လာ ၂ သန်းခန့်)တိုးချပေးရန် အတည်ပြု ခဲ့သည်။

၄င်းနှင့်ပတ်သက်ပြီး သီပေါမြို့နယ် ပြည်သူ့လွှတ်တော်ကိုယ်စားလှယ် စိုင်းသန့်ဇင်က – “နိုင်ငံရေးပြောင်းလဲသွားပြီဆိုပေမယ့် ကျနော်တို့တွေရချင်တဲ့ရည်မှန်းချက်ပန်းတိုင်ကတော့ မရောက်နိုင်သေးဘူး။ ဒါပေမယ့် တက်လာတဲ့အစိုးရဟာ လူထုရွေးကောက်တင်မြှောက်လို့ အစိုးရဖြစ်လာတာ။ ဒါကြောင့် လူထုအပေါ် သူတို့ဘယ်လောက်အာရုံစိုက်သလဲဆိုတာ အဲဒီအစိုးရရဲ့သမိုင်းဘဲ။ ဥပဒေထဲမှာလည်းရှိပါတယ်။ လူထုအတွက် မည်သည့်စီမံကိန်းကိုမဆို ဆောင်ရွက်တော့မယ်ဆိုရင် ကောင်းကျိုး ဆိုးကျိုးကိုအရင် ကြည့်ရပါမယ်။ ဒါကြောင့်လူထုအနေနဲ့လည်း အရမ်းကြီးမစိုးရိမ်ပါနဲ့ ။ ဖြေရှင်းဖို့နည်းလမ်း၊ ထွက်ပေါက် ရှိလာပါလိမ့်မယ်လို့တိုက်တွန်းချင်ပါတယ်။ ”– ဟုစိုင်းသန့်ဇင်ကပြောသည်။

ထိုသို့ အစိုးရဘက်မှ ဒေသခံလူထု၏ ဆန္ဒသဘောထားကိုလျစ်လျူရှုကာ ရေကာတာတည်ဆောက်ရေး ဆက်လက်ဆောင်ရွက်နေသည့်အပေါ် မြန်မာနိုင်ငံအတွင်း ရေအားလျှပ်စစ်ထုတ်လုပ်ရေးအတွက် ကူညီထောက်ပ့ံမှု ရင်းနှီးမြုပ်နှံမှုများအား ရပ်တန့်ပေးရန် ပြည်ပအဖွဲ့အစည်းများထံတောင်းဆို ကြောင်း သီပေါမြို့နယ် ပြည်နယ်လွှတ်တော်ကိုယ်စားလှယ် နန်းစမ်းစမ်းအေး ကပြောသည်။

လက်ရှိ နမ္မတူမြစ်ခေါ် မြစ်ငယ်မြစ်ပေါ်တွင် ရေအားလျှပ်စစ်ထုတ်ယူရန် ရေကာတာ တည်ဆောက် ရေးအတွက် တာဝန်ယူထားသည့် ပြည်ပကုမ္မဏီများမှာ Germany နိုင်ငံမှ Lahmeyer ကုမ္မဏီ Switzerland နိုင်ငံမှ Stukey SA ကုမ္မဏီ French နိုင်ငံမှ Joint Venture IPGRB ကုမ္မဏီ တို့ဖြစ်ကြသည်။ သို့သော် Germany နိုင်ငံမှ Lahmeyer ကုမ္မဏီ သည် လာအိုနိုင်ငံတွင် ယခင်လက ကျိုးပေါက်ခဲ့သော ဆေပြိန် ဆေနမ့်နွဲ့ ရေကာတာကြီးအား တည်ဆောက်ရာတွင် အကြံပြုပေးသော Tractebel ENGIE ကုမ္မဏီ၏ ကုမ္မဏီခွဲတခုဖြစ်ကြောင်းလည်း ၄င်းတို့၏ကြေငြာချက်တွင်ဖော်ပြထားသည်။

အဆိုပါစီမံကိန်းအား ၂၀၀၈ ခုနှစ် စစ်အစိုးရလက်ထက်ကတည်းက ပြုလုပ်ရန် ဆုံးဖြတ်ခဲ့ကြပြီး ၂၀၁၀-၂၀၁၁ ခုနှစ်ကစတင်အကောင်အထည်ဖော်ဆောင်ရွက်လာခဲ့သည်။ ၂၀၂၀-၂၀၂၁ တွင် လျှပ်စစ်ဓါတ် အားဖြန့်ဖြူးနိုင်ရန် လျာထားကြောင်း သိရပါသည်။