သျှမ်းပြည်နယ် အတွင်း လူ့အခွင့်အရေး ချိုးဖောက်မှုများ၊ တရားဥပဒေ စိုးမိုးရေး ပျက်သုဉ်း ဆုတ်ယုတ်နေသည် ဟု သျှမ်းပြည်နယ် မှ တိုင်းရင်းသူအဖွဲ့ အစည်းများက ပြောဆိုလိုက်သည်။

သျှမ်းပြည်နယ် နှင့် မြန်မာ တဝှမ်းလုံး တွင် ဖြစ်ပွားနေသည့် မြန်မာ့တပ်မတော်နှင့် တိုင်းရင်းသားလက်နက်ကိုင် အဖွဲ့အစည်း နှင့် တိုင်းရင်းသားလက်နက်ကိုင်အချင်းချင်းအကြား ပစ်ခတ်တိုက်ခိုက်မှုများ ကြောင့် ဒေသခံများ အိုအိမ်းစွန့်ခွာမှုများတိုးပွားလာခြင်း၊ လူ့အခွင့်အရေး ချိုးဖောက်မှုများ လာခြင်း၊ တရားဥပဒေ ကင်းမဲ့ခြင်းများဖြစ် ပွားနေသည့် ဟု အောက်တိုဘာ ၁၀ရက်နေ့တွင် သျှမ်းပြည်နယ် မှ တိုင်းရင်းသူများ အဖွဲ့အစည်း၏ ထုတ်ပြန်ချက်တွင် ဖော်ပြထားသည်။

အဆိုပါ ထုတ်ပြန်ချက်ကို သျှမ်းပြည်နယ် အတွင်း လှုပ်ရှားနေသည့် တိုင်းရင်းသူ အဖွဲ့များဖြစ်သည့် လားဟူအမျိုးသမီးအဖွဲ့အစည်း (LWO)၊ ပအိုုဝ်းအမျိုးသမီး သမဂ္ဂ(PWU)၊ ရှမ်းးရေးရာ ဆက်သွယ် လှုပ်ရှားဆောင်ရွက်ရေးအသင်း (SWAN)၊ နှင့် တအာင်းအမျိုးသမီးအဖွဲ့အစည်း (TWO) တို့ဖြစ်သည်။

တနိုင်ငံလုံး ပစ်ခတ်တိုက်ခိုက်မှု ရပ်စဲရေး စာချုပ် NCA ထိုးကြသော်လည်း မြန်မာ့တပ်မတော်နှင့် တိုင်းရင်းသားလက်နက်ကိုင် အဖွဲ့များကြား၊ တိုင်းရင်းသားလက်နက်ကိုင် အချင်းချင်းကြားတိုက်ပွဲကြောင်း သျှမ်းပြည်နယ် အတွင်း ဒေသခံများ ထောင်ချီ အိုးအိမ်စွန့် ထွက်ပြေးနေကြရကြောင်း ထုတ်ပြန်ချက်တွင် ဖော်ပြထားသည်။

“ ကျမတို့အနေနဲ့ကတော့ ပြည်တွင်း စစ် ရပ်ဖို့ပါ။ ပြည်တွင်းစစ်က အဓိက ကလေး နဲ့အမျိုးသမီးတွေ က ပို ခံနေရတယ်။ အမျိုးသမီးတွေ ဘဝက ခဏခဏ ပြောင်းရွေ့နေပြီး ဘဝကို ပြန်ပြန် စနေရတယ်။ ဒါကြောင့် ပြည်တွင်းစစ်က ရပ်သင့်ပါပြီ” ဟု SWAN ဒါရိုက်တာ နန်းဟိန်း က ပြောသည်။

သျှမ်းပြည်အတွင်း အမျိုးသမီး တွေ လိင်ပိုင်ဆိုင်ရာ အကြမ်းဖက်မှုများ ၊ အမျိုးသမီးများ ကို အတင်းအဓမ္မခေါ်ဆောင်သွားမှုများရှိနေသဖြင့် အမျိုးသမီးများ၏ လုံခြုံမှု စိုးရိမ်းနေရကြောင်း ၊ တရားဥပဒေ စိုးမိုးမှု မရှိခြင်းကို ပြနေသည် ဟု နန်းဟိန်း က ပြောသည်။

“ လက်နက်ကိုင် အဖွဲ့အစည်းတွေ အမျိုးသမီးတွေကို ဖမ်းဆီးခေါ်ဆောင်သွားတာကိုကြည့်ချင်းအားဖြင့် တရားဥပဒေ စိုးမိုးမှု ပျက်သုဉ်းနေတယ်။ အမျိုးသမီးတွေရဲ့ လုံခြံုရေးကို လည်း ကျမတို့ အရမ်းကို စိုးရိမ်နေရပါတယ်။ ကျူးလွန်တဲ့သူတွေ ကျူးလွန်ခွင့်ပြုတဲ့သူတွေ မှာလည်း တာဝန်ရှိတယ်” ဟု နန်းဟိန်း က ဆိုသည်။

တရားဥပဒေစိုးမိုးရေးဆိုင်ရာ တာဝန်ရှိသူများက ဥပဒေ အရ ကာကွယ်စောင့်ရှောက်ရန် ပျက်ကွက်သည့်အပြင် ကျူးလွန်နေသူများအား မျက်ကွယ်ပြု ဆက်လက်ကျူးလွန် ခွင့်ပြုနေကြောင်းည်း အဆိုပါ ထုတ်ပြန်ချက်တွင် ဖော်ပြထားသည်။

ဆက်လက်ပြီး အမျိုးသမီး နှင့် မိန်းကလေးငယ်များအပေါ် လိင်ပိုင်းဆိုင်ရာ ကြမ်းဖက်မှုများ အပါအဝင် အကြမ်းဖက်မှုမျိုးစုံ ရင်ဆိုင်နေရကြောင်း၊ ထို့အပြင် လူမှုကွန်ရက် စာမျက်နှာပေါ်တွင် လူမျိုးရေးမုန်းတီးမှုများ၊ လူမှုအသိုင်းအဝန်း များကြာ ပဋိပက္ခများဖြစ်ပေါ်လာစေရန် သွေးထိုးလှုံ့ဆော်မှုများဖြစ်ပွားလျက်ရှိနေကြောင်းလည်း ရေးသားထားသည်။

လက်နက်ကိုင် ပဋိပက္ခများ အမြန်ချုပ်ငြိမ်းပြီး၊ လုံခြံုဘေးကင်းရေး၊ဖွံ့ဖြိုးတိုးတက်ရေး အတွက် ပဋိပက္ခ ပါဝင်ပတ်သတ်သူများအားလုံး ထိုလုပ်ရပ်များရပ်တန့်ရန် လိုအပ်ကြောင်း သျှမ်းပြည်နယ် တိုင်းရင်းသူများအဖွဲ့မှ တိုက်တွန်းပြောဆိုလိုက်သည်။