မြန်မာ-တရုတ်နယ်စပ် မူဆယ်မြို့တွင် အလုပ်အကိုင်ရရှိမည်ဟုဆိုကာ လိမ်လည်ခေါ်ဆောင်ခြင်းခံရပြီး ပြည့်တန်ဆာအလုပ်သို့ အဓမ္မစေခိုင်းခံနေရသည့် အသက် (၂၀) ဝန်းကျင် အမျိုးသမီးငယ် (၃) ဦးကို လူမှုကူညီရေးပရဟိတအသင်းက ကယ်တင်ခဲ့ရကြောင်း သတင်းသိရသည်။

ဒုက္ခရောက်နေသည့် အမျိုးသမီးငယ်များက မြင့်မြတ်ပါရမီ သွေးလှူရှင်နှင့် လူမှုကူညီရေးအသင်းထံသို့ ဖုန်းဖြင့် အကူအညီတောင်းခံခဲ့ရာ အဆိုပါအသင်းမှ တာဝန်ရှိသူများသည် ယနေ့ (မတ်လ ၂၃ ရက်) ညသန်းခေါင်ယံ အချိန်တွင် သွားရောက်ညှိနှိုင်းခဲ့ကြောင်း သိရသည်။

ထို့နောက် အလုပ်ရှင် တောင်းဆိုသည့် ငွေကြေးပမာဏကို ပေးချေကာ အမျိုးသမီးငယ် (၃) ဦးအား ဘေးကင်းလုံခြုံစွာ ကယ်ထုတ်နိုင်ခဲ့ခြင်း ဖြစ်ကြောင်း လက်ဖက်ညွှန့်လူမှုကူညီရေးအသင်းက ပြောသည်။

“ကလေးမလေးတွေ ပြောပုံအရ ပွဲစားက ရိုးရိုးအနှိပ်ခန်းလို့ပဲ ပြောတာ။ ဒါပေမယ့် ရောက်သွားတဲ့အခါကျတော့ အဲ့ဒီအလုပ်မဟုတ်ဘဲ ပြည့်တန်ဆာအလုပ်ကို အတင်းခိုင်းတာပေါ့။ သူတို့ကလည်း သဘောမတူလို့ ငြင်းခဲ့ကြတာ” ဟု လက်ဖက်ညွှန့်လူမှုကူညီရေးအသင်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

အဆိုပါအမျိုးသမီးငယ် (၃) ဦးသည် အလုပ်အကိုင်ရှာဖွေပေးသည့် ပွဲစားတစ်ဦးနှင့် ချိတ်ဆက်ကာ နေပြည်တော်မှ မူဆယ်မြို့ရှိ အနှိပ်ခန်းတစ်ခုတွင် အလုပ်လုပ်ကိုင်ရန် လာရောက်ခဲ့ခြင်း ဖြစ်သည်။

သို့သော် မူဆယ်မြို့သို့ ရောက်ရှိသည့်အခါတွင် အလုပ်ရှင်ဖြစ်သူက ၎င်းတို့အား လိင်ပိုင်းဆိုင်ရာ ဝန်ဆောင်မှုပေးသည့် ပြည့်တန်ဆာအလုပ်များကို လုပ်ကိုင်ရန် အဓမ္မဖိအားပေး စေခိုင်းခဲ့ကြောင်း ၎င်းက ရှင်းပြသည်။

အဆိုပါ အမျိုးသမီးငယ်များသည် မူဆယ်သို့ ရောက်ရှိပြီး (၃) ရက်အတွင်း၌ ယခုကဲ့သို့ အဓမ္မစေခိုင်းမှုနှင့် ကြုံတွေ့ခဲ့ခြင်း ဖြစ်ကြောင်း ဆိုသည်။

၎င်းတို့က ထိုအလုပ်ကို လုပ်ကိုင်ရန် ငြင်းဆန်ခဲ့သဖြင့် အလုပ်ရှင်ဖြစ်သူက လမ်းစရိတ်နှင့် ကြိုတင်ကုန်ကျစရိတ်များကို အကြောင်းပြကာ ငွေကျပ် (၁,၇၂၀,၀၀၀) တစ်ဆယ့်ခုနစ်သိန်းနှစ်သောင်း ပေးမှသာ ပြန်လွှတ်ပေးမည်ဟု ခြိမ်းခြောက်ခဲ့ကြောင်း လက်ဖက်ညွှန့်လူမှုကူညီရေးအသင်း၏ ပြောပြချက်အရ သိရသည်။

လတ်တလောတွင် ကယ်တင်ခဲ့သော အမျိုးသမီးငယ်များအား မြင့်မြတ်ပါရမီအသင်းရုံး၌ ခေတ္တစောင့်ရှောက်ထားပြီး ၎င်းတို့၏ နေရပ်ဖြစ်သော နေပြည်တော်သို့ ပြန်လည်ပို့ဆောင်နိုင်ရန် စီစဉ်လျက်ရှိကြောင်း သိရသည်။

“အခုသူတို့ စိတ်ပိုင်းဆိုင်ရာ၊ ရုပ်ပိုင်းဆိုင်ရာ အခြေအနေကတော့ ကောင်းပါတယ်။ ထိခိုက်ဒဏ်ရာ ရရှိထားတာတော့ မရှိဘူး။ ကျနော်တို့ ကောင်းကောင်းမွန်မွန်နဲ့ ကူညီပေးခဲ့ပါတယ်” ဟု ၎င်းက ဆက်ပြောသည်။

နယ်စပ်ဒေသများရှိ အလုပ်အကိုင် အခွင့်အလမ်းများကို အကြောင်းပြ၍ လူကုန်ကူးသူများနှင့် ပွဲစားများက ယခုကဲ့သို့ လိမ်လည်မှုများ ပိုမိုလုပ်ဆောင်လာနေကြောင်း လူမှုကူညီရေးအသင်းများက သတိပေးထားသည်။

အထူးသဖြင့် လစာကောင်းမွန်ခြင်းနှင့် အသန့်အလုပ်ဟူသော မက်လုံးများနောက်သို့ မလိုက်ကြရန်နှင့် အလုပ်မသွားမီ သေချာစွာ စုံစမ်းစစ်ဆေးကြရန် တိုက်တွန်းထားသည်။

ယခုဖြစ်စဉ်နှင့် ပတ်သက်၍ သက်ဆိုင်ရာ အာဏာပိုင်များထံ အကြောင်းကြားပြီး အမျိုးသမီးငယ်များကို စစ်ဆေးမေးမြန်းနေသလို လူကုန်ကူးသူ ပွဲစားနှင့် ဆိုင်ရှင်တို့အား ဥပဒေကြောင်းအရ အရေးယူနိုင်ခြင်း ရှိ၊ မရှိကိုမူ ဆက်လက် စောင့်ကြည့်ရဦးမည် ဖြစ်ကြောင်း လက်ဖက်ညွှန့်လူမှုကူညီရေးအသင်းက ပြောသည်။