သျှမ်းပြည်မြောက်ပိုင်းလားရှိုးမြို့ ရပ်ကွက် ၇ နယ်မြေ ၄ တွင် အောက်တိုဘာလ ၁၁ ရက်နေ့ ည ၉ နာရီအချိန်က နေအိမ်တအိမ်အတွင်း ပေါက်ကွဲမှုဖြစ်ပွါးခဲ့သည်။
အမက ၂ ကျောင်းအနီးရှိ အိမ်အမှတ် ၃၄ တွင်ပေါက်ကွဲခဲ့ခြင်းဖြစ်ပြီး လူသူထိခိုက်ဒဏ်ရာ ရမှုတော့မရှိကြောင်း သက်ဆိုင်ရာအာဏာပိုင်များ ပြောသည်ဟု လားရှိုးခရိုင်အမျိုးသား လွှတ်တော်ကိုယ်စားလှယ် စိုင်းဝမ်းလျန်းခမ်းက ပြောသည်။
“ဟုတ်တယ် ပေါက်ကွဲတယ်။ သံလွင်လမ်း ၇ ရပ်ကွက်။ ထိခိုက်ဒဏ်ရာရမရှိဘူး။ ကျနော် အာဏာပိုင်တွေကိုလှမ်းပြီးဆက်သွယ်ကြည့်တော့ အာဏာပိုင်တွေက စစ်ဆေးနေတုန်းလို့ပြောပါတယ်။ အိမ်ဝင်းထဲမှာပေါက်ကွဲတာဖြစ်တယ်။အပြင်ကနေပစ်တာလား၊ အိမ်ထဲကနေဘဲ ပေါက်ကွဲတာလားဆိုတာလည်း အတည်ပြုလို့မရသေးပါဘူး စစ်ဆေးနေတုန်းဆိုတော့လေ။ နံရံတွေဘာတွေထိတယ်၊ ပြတင်းမှန်တွေကွဲတယ်ဆိုတော့ ဒါ ပေါက်ကွဲမှုပုံစံကြည့်တာတော့ ဗုံးလိုပုံစံမျိုးတော့ဖြစ်နိုင်တယ်ပေါ့ အာဏာပိုင်တွေအဲလိုပြောတယ်။ အခု အိမ်ရှင်ကိုခေါ်ပြီးစစ်ဆေးနေတုန်းမို့လို့ အဖြေသေချာမသိရသေး ဘူးလို့ ပြောပါတယ် ” – ဟု စိုင်းဝမ်းလျန်းခမ်းက သျှမ်းသံတော်ဆင့်အားပြောသည်။
အဆိုပါအိမ်၏ ပိုင်ရှင်မှာ ဦးရန်ချုံရှန်းဆိုသူဖြစ်ကြောင်း လားရှိုးဒေသခံများပြောဆိုနေကြသည်။
အဆိုပါ ၇ ရပ်ကွက်တွင် တရုတ်၊ အစ္စလာမ်၊ သျှမ်း၊ ဗမာလူမျိုးများ နေထိုင်ကြောင်းသိရသည်။
လားရှိုးမြို့တွင် ယခုနှစ်ဖေဖော်ဝါရီလက ရိုးမဘဏ်အနီး ကြီးမားသောပေါက်ကွဲမှုဖြစ်ပွါးပြီးနောက်ပိုင်း ၈ လ အကြာတွင်ပြန်လည်ဖြစ်ပွါးသော ပေါက်ကွဲခြင်းဖြစ်ကြောင်းလည်း သိရပါသည်။