သျှမ်းပြည်မြောက်ပိုင်း လားရှိုးမြို့တွင် သီတင်းသုံးနေထိုင်သည့် ဆရာတော်တစ်ပါးအား သတ်ဖြတ်ခဲ့သည့် သတ္တမတန်း ကျောင်းသားနှစ်ဉီးကို ဖမ်းဆီးရမိခဲ့ကြောင်း စုံစမ်းသိရသည်။

ပြီးခဲ့သည့် ဇန်နဝါရီလ ၂၈ ရက်တွင် လားရှိုးမြို့၊ ရပ်ကွက် (၄) ရှိ မဟာဗောဓရုံ ကျောင်းတိုက်အတွင်း၌ သက်တော် (၆၀) ဝန်းကျင်ရှိ ဆရာတော်တစ်ပါးကို လူငယ်နှစ်ဦးက ဝင်ရောက် လုပ်ကြံ သတ်ဖြတ်ခဲ့သည်။

ဖြစ်စဉ်မှာ ဇန်နဝါရီလ ၂၇ ရက်တွင် လားရှိုးမြို့ ရပ်ကွက် (၄)ရှိ မဟာဗောဓရုံ ကျောင်းတိုက်အနီးတွင် ကျောင်းသားတစ်စု ရန်ဖြစ်နေခြင်းကြောင့် ဆရာတော်မှ လေးခွဖြင့် ပစ်ကာ တားဆီးခဲ့ကြောင်း လားရှိုးမြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျောင်းနှစ်ကျောင်းက (၇) တန်း ကျောင်းသား ကလေးတွေ ဘုန်းကြီးကျောင်း အနီးမှာ ချိန်းပြီး ရန်ဖြစ်ကြတာ။ အဲ့ဒါကို ဘုန်းကြီးက လေးခွနဲ့ ပစ်တာ၊ (၇) တန်းကျောင်းသားနှစ်ဦးရဲ့ လက်မောင်းကို ထိသွားတာ”ဟု ဖြစ်စဉ်သိရှိသူ လားရှိုးမြို့နယ် ဒေသခံအမျိုးသားတစ်ဦးက ပြောသည်။

ထို့နောက် ဇန်နဝါရီလ ၂၈ ရက် နံနက်ပိုင်းတွင် လေးခွထိမှန်ခဲ့သည့် အဆိုပါ ကျောင်းသားနှစ်ဦးသည် အငြိုးအတေးဖြင့် မဟာဗောဓရုံ ကျောင်းတိုက်ထံ ပြန်လာကာ ဆရာတော်ထံ ဆွမ်းလာကပ်သည်ဟု ပြောဆိုပြီး ကိုယ်ထိလက်ရောက် လုပ်ကြံသ၀◌ာ်ဖြတ်ခဲ့ကြောင်း ၎င်းအမျိုးသားက ဆက်ပြောသည်။

“အဲ့ဒီမနက် ၆ နာရီ ဝန်းကျင်လောက်မှာ ကလေးနှစ်ယောက်က ဘုန်းကြီးကျောင်းကို လာပြီး ဘုန်းကြီးကို ဆွမ်းကပ်ဖို့ လာတယ်။ လက်ထဲမှာလည်း မုန့်ဟင်းခါးနဲ့ ကန်တော့ဖို့ ပန်းပါလာတော့ တခြား ဦးဇင်းကလည်း ဘုန်းကြီးကို သွားခေါ်ပေးတာ။ ဘုန်းကြီးက တစ်ပါးတည်း သွားတော့ အဲ့ကလေး နှစ်ယောက်က တူနဲ့ထု ဓားနဲ့ ထိုးသ၀◌ာ်သွားတာ”ဟု လားရှိုးမြို့နယ် ဒေသခံအမျိုးသား တစ်ဦးက ပြောသည်။

အခင်းဖြစ်ပွားသည့်နေရာတွင် ဆရာတော်အား လုပ်ကြံသ-တ်ဖြတ်ခဲ့သူ ကျောင်းသားနှစ်ဦး၏ ဖုန်း ကျကျန်ခဲ့ရာမှ တာဝန်ရှိသူများက ခြေရာခံ လိုက်လံ ဖမ်းဆီးနိုင်ခဲ့ရာ လားရှိုးမြို့မှ အသက် ၁၈ နှစ်‌အောက် ကျောင်းသား နှစ်ဦး ဖြစ်နေကြောင်း သိရသည်။

ထိုကျောင်းသားနှစ်ဦးသည် အသက် ၁၆ နှစ်ဝန်းကျင်ခန့်သာ ရှိပြီး အမှတ် (၆) အခြေခံပညာအထက်တန်းကျောင်း (အ.ထ.က-၆) တွင် ပညာသင်ကြားနေသည့် (၇) တန်းကျောင်းသားများ ဖြစ်ကြကြောင်း သိရသည်။

အဆိုပါ လုပ်ကြံသတ်ဖြတ်ခံရသည့် ဆရာတော်၏ ဝမ်းဗိုက်တွင် ဓားဒဏ်ရာ (၁၂) ချက်အထိ ထိုးနှက်ထားသည့်အပြင် ဦးခေါင်းကိုလည်း တူဖြင့် ထုရိုက်ကာ သွားများကိုပါ ရိုက်ချိုးထားသည့် ဒဏ်ရာများဖြင့် ပျံလွန်တော်မူခဲ့ခြင်းဖြစ်ကြောင်း သိရှိရသဖြင့် ဒေသခံများအကြား တုန်လှုပ်ခြောက်ခြားလျက် ရှိသည်။

လားရှိုးမြို့တွင် စစ်ကော်မရှင်တပ်ဖွဲ့ဝင်များ မြို့တွင်းလုံခြုံရေး ယူထားသည့်ကြားမှ ယခုကဲ့သို့ သွေးအေးရက်စက်သည့် လူသ-တ်မှု ဖြစ်ပွားခဲ့ခြင်းကြောင့် မြို့နေပြည်သူများအကြား တရားဥပဒေ စိုးမိုးရေးနှင့် လုံခြုံရေး အခြေအနေအပေါ် မေးခွန်းထုတ်မှုများ မြင့်တက်လျက်ရှိသည်။