ဓနုပြည်သူ့လွတ်မြောက်ရေးတပ်တော် (DPLA) သည် စစ်အာဏာရှင်စနစ်၊ မဟာလူမျိုးကြီးဝါဒနှင့် ကျဉ်းမြောင်းသော အမျိုးသားရေးဝါဒများကို ဆန့်ကျင်တိုက်ဖျက်သွားရန် ဆိုသည့် ရည်ရွယ်ချက်ဖြင့် ၂၀၂၂ ခုနှစ် သြဂုတ်လ ၇ ရက်တွင် ဖွဲ့စည်းတည်ထောင်ခဲ့သည်။

လက်ရှိတွင် DPLA အဖွဲ့ဝင် စစ်အင်အား တစ်ထောင်ကျော်ရှိပြီး ဓနုလူမျိုးများနေထိုင်သည့် သျှမ်းပြည်မြောက်ပိုင်းနှင့် သျှမ်းပြည်တောင်ပိုင်း ရွာငံ၊ ရပ်စောက်နှင့် နောင်ချိုမြို့နယ်အတွင်း လှုပ်ရှားနေကြောင်း သိရသည်။

DPLA ၏ စစ်ရေးမဟာမိတ်အနေဖြင့် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA )နှင့် ပူးပေါင်းပြီး နောင်ချိုမြို့နယ် တောင်းခမ်းဒေသအတွင်း စစ်ကောင်စီတပ်ကို တိုက်ခိုက်နေပြီး၊ ရွာငံနှင့် ရပ်စောက်မြို့နယ်တွင်လည်း စစ်ကောင်စီတပ်နှင့် ၎င်းတို့၏ လက်အောက်ခံ အဖွဲ့အစည်းများ ပပျောက်ရန်အတွက် ချေမှုန်းတိုက်ခိုက်နေသည်။

လက်ရှိမှာ တရုတ်၏ ကြားဝင်စေ့စပ်မှုဖြင့် ကိုးကန့်တပ်ဖွဲ့ (MNDAA) နှင့် မဟာမိတ်တပ်ဖွဲ့တို့ ပူးပေါင်းတိုက်ခိုက်ခဲ့ပြီး (၁၀) လနီးပါး ထိန်းချုပ်ထားခဲ့သည့် လားရှိုးမြို့ကို စစ်ကောင်စီထံ ပြန်လွှဲအပ်သော ကိစ္စသည် TNLA နှင့် DPLA တို့ ပူးတွဲထိုးစစ်ဆင်နေသည့် နောင်ချိုမြို့နယ် တောင်းခမ်းဒေသအပေါ် သက်ရောက်လာနိုင်မှု၊ နောင်ချိုမြို့နယ်အတွင်း စစ်ကောင်စီဘက်မှ လေကြောင်းဖြင့် ပိုမိုတိုက်ခိုက်လာမှု အခြေအနေများကို ရှေ့တန်းစစ်မြေပြင်ရှိ DPLA တပ်ဖွဲ့ဝင် ရဲဘော်တစ်ဉီးကို သျှမ်းသံတော်ဆင့် သတင်းထောက် နန်းခမ်းကူ က ဆက်သွယ်မေးမြန်းထားသည်။

မေး ။ ။ လားရှိုးမြို့ကို စစ်ကောင်စီ ပြန်ဝင်ရောက်လာမှုကြောင့် TNLA သိမ်းပိုက်ထားတဲ့နေရာ နောင်ချို၊ သီပေါ၊ ကျောက်မဲဘက်ကရော လက်ရှိ ဘယ်လိုအခြေအနေ သက်ရောက်မှုရှိလဲ။ DPLA လှုပ်ရှားတဲ့ နောင်ချို ဘက်ရော အခုရက်ပိုင်း ဘာတွေ ထူးခြားမှုရှိလဲ။

ဖြေ ။ ။ အခုလို လားရှိုးကို စစ်ကောင်စီ ဝင်ရောက်လာတော့ စိုးရိမ်စရာတော့ အများကြီးပဲ။ လေကြောင်းနဲ့ရော မြေပြင်ကပါ သူတို့အတွက် အားသာချက် ဖြစ်သွားမယ်။ အဓိက လေကြောင်းနဲ့ ဒရုန်းကိုတော့ အရမ်းစိုးရိမ်ရတယ်။

တခြားမြို့ဖြစ်တဲ့ နောင်ချို၊ သီပေါ၊ ကျောက်မဲတို့က စစ်ကောင်စီရဖို့ မရှိသေးပါဘူး။ မြေပြင်မှာ သူတို့အင်အားများနေလည်း မရနိုင်ပါဘူး။ တရုတ်အကူအညီနဲ နောင်ချိုတို့ သီပေါတို့ကိုလည်း လားရှိုးမြို့လို ထပ်အဖြစ်မခံလောက်တော့ဘူး။ အကယ်လို့ ထပ်လက်လွှတ်ခဲ့ရတယ် ဆိုရင်တောင် DPLA အနေနဲ့ ပြန်တိုက်ထုတ်မယ်။

မေး ။ ။ နောင်ချိုမြို့နယ် တောင်းခမ်းဒေသက ဘယ်လိုအချက်အခြာကျလဲ၊ တိုက်ပွဲက ဘာကြောင့် အချိန်ကြန့်ကြာနေလဲ။

ဖြေ ။ ။ တောင်းခမ်းက နောင်ချို၊ ရပ်စောက်နဲ့ ပြင်ဦးလွင် စတဲ့ မြို့နယ် သုံးနယ်ရဲ့ အချက်အခြာကျတဲ့ နေရာတစ်ခုဖြစ်တယ်။ လားရှိုးကို ဝင်လို့မရခင်က သျှမ်းမြောက်ကို မြေပြင်ထိုးစစ် ပြုလုပ်မယ့်နေရာက တောင်းခမ်းတစ်ခုတည်း ကျန်နေတော့ ဒီတောင်းခမ်းကိုပဲ လာဖိနေတော့ တိုက်ပွဲက ကြန့်ကြာနေရတာ ဖြစ်တယ်။ တောင်ခမ်းကိုသာ စစ်ကောင်စီ ရသွားမယ်ဆိုရင် ကိုယ့်ဓနုဒေသ အပါအဝင် ထိန်းချုပ်နယ်မြေတွေအတွက် အကျိုးသက်ရောက်မှု ပိုများတယ်။

မေး ။ ။ DPLA ရဲ့ တော်လှန်ရေး ရည်မှန်းချက်က ဘာဖြစ်မလဲ။

ဖြေ ။ ။ ကျနော်တို့ ဓနုပြည်နယ် ဖော်ဆောင်ဖို့ ကိုယ်ပိုင်ပြဋ္ဌာန်းခွင့် ရနိုင်ဖို့ ဖြစ်တယ်။ အဓိကတော့ ကိုယ့်ဒေသကို ကိုယ်ပိုင်အုပ်ချုပ်မယ်၊ ကိုယ့်လူမျိုးတွေပဲ ဦးဆောင်နိုင်ဖို့ဖြစ်တယ်။ ကျနော်တို့ ဓနုဒေသမှာ စစ်ပွဲ မဖြစ်လာနိုင်ဘူးလို့ ပြောမရပါဘူး၊ အဓိက စစ်ကောင်စီတွေ အထိုင်ရှိနေတဲ့ နေရာတွေမှာ စိုးရိမ်ရမယ်။ ပြည်သူများအနေနဲ့ ကြိုတင်ပြင်ဆင်မှုတွေ လုပ်ထားရင်တော့ ကောင်းတာပေါ့။

မေး ။ ။ TNLA ထိန်းချုပ်ထားတဲ့ နောင်ချိုမြို့နယ် တောင်းခမ်းဒေသဘက်မှာ လက်ရှိစစ်ဘေးရှောင် အခြေအနေ ဘယ်လိုရှိနေလဲ။

ဖြေ ။ ။ စစ်ကောင်စီ ရယူထားတဲ့ တောင်းခမ်းနားက ရွာတစ်ချို့မှာတော့ စစ်ရှောင်တွေ အနည်းအကျဉ်းတော့ ပြန်ဝင်နေကြပြီ ကြားတယ်။ ဒီဘက် ကျနော်တို့ဘက်ခြမ်းက ကျေးရွာတွေတော့ ခုထိ ရှောင်နေတုန်းပဲ။ ကြံခင်းတွေလည်း ဒီတိုင်းပဲ ပြန်ခုတ်လို့ မရသေးဘူး။ ခုထိ တိုက်ပွဲဖြစ်နေတုန်း ဆိုတော့ ဘယ်သူမှ ပြန်မလာရဲကြသေးဘူး။