သျှမ်းပြည် လားရှိုးမြို့အဝင် မယ်ဟန်ကျေးရွာရှိ ကိုးကန့်တပ်ဖွဲ့ MNDAA စစ်ဆေးရေးဂိတ်တွင် စစ်ကောင်စီယာဉ်တန်းကို ကားပေါ်အထိ တက်ရောက်ကာ အချိန်အတော်ကြာ စစ်ဆေးခဲ့ကြောင်း စုံစမ်းသိရသည်။
ဇွန်လ (၅) ရက် နံနက်ပိုင်းတွင် မိုင်းရယ်ဘက်မှ လာသည့် စစ်ကား (၆) စီးပါ စစ်ကောင်စီယာဉ်တန်းသည် လားရှိုးမြို့အဝင် မယ်ဟန်ကျေးရွာရှိ MNDAA စစ်ဆေးရေးဂိတ်တွင် အချိန်အတော်ကြာ စစ်ဆေးခံခဲ့ရပြီး ကိုးကန့်တပ်သားများမှ စစ်ကောင်စီကားပေါ်အထိ တက်ရောက်ခဲ့ကြောင်း လားရှိုးမြို့မှ စစ်ရေးသတင်းရင်းမြစ်တစ်ဦးက ပြောသည်။
“မြို့အဝင် မယ်ဟန်အကျော်နားက ကိုးကန့်ဂိတ်မှာ စစ်ကားတွေပါ ရပ်ထားရတယ်။ စစ်ကောင်စီကားတန်းမှာ ၆ စီးလောက်တော့ ပါမယ်။ အဲ့မှာ စစ်သားတွေလည်း ဗမာလိုတော့ ပြောနေတာပဲ၊ နောက်တော့ ကိုးကန့်ဘက်က စစ်ကား မိုးကာအဖုံးထဲ ဝင်စစ်တယ်။ တော်တော်ကြာလိုက်တယ်”ဟု လားရှိုးမြို့မှ ၎င်းစစ်ရေးသတင်းရင်းမြစ်က သျှမ်းသံတော်ဆင့်ကို ပြောသည်။
MNDAA စစ်ဆေးရေးဂိတ်တွင် အချိန်အတော်ကြာ စစ်ဆေးခံရသည့် စစ်ကောင်စီယာဉ်တန်းသည် လားရှိုးမြို့ပေါ်ရှိ စစ်ကောင်စီလက်အောက်ခံ ရုံးဌာနများအတွက် ထောက်ပို့ယာဉ်များဖြစ်ကြောင်း ၎င်းစစ်ရေးသတင်းရင်းမြစ်က ထပ်လောင်းပြောသည်။
အဆိုပါဂိတ်တွင် MNDAA ဘက်မှ လမ်းတံတားကြေးအဖြစ် ကားသေးတစ်စီးလျှင် တစ်ထောင်ကျပ် ကောက်ခံပြီး ဖြတ်ပိုင်းပြန်ပေးကြောင်း၊ MNDAA ဂိတ်နှင့် စစ်ကောင်စီဂိတ်များမှာ နီးနီးကပ်ကပ် တည်ရှိနေကြောင်း လားရှိုးဒေသခံများက ပြောဆိုသည်။
လက်ရှိတွင် ဧပြီလ (၂၂) ရက်က လားရှိုးမြို့ပေါ်သို့ ဝင်ရောက်လာခဲ့သည့် စစ်ကောင်စီလက်အောက်ခံ အရှေ့မြောက် တိုင်းစစ်ဌာနချုပ် (ရမခ) မှ စစ်ယာဉ်တန်း (၂၀၀) ကျော်သည် လားရှိုးတက္ကသိုလ်၊ အမှတ် (၆၂၆) ထောက်ပို့တပ်၊ (၉၁၂) စစ်အင်ဂျင်နီယာ တပ်ရင်းနှင့် ခလရ (၄၁) တပ်ရင်းတို့တွင် ပြန်လည်နေရာချထားကြောင်း ဒေသခံများထံမှ သိရသည်။
၎င်းနောက်တွင် မေလဆန်းပိုင်းမှ စတင်ကာ စစ်ကောင်စီလက်အောက်ခံ ဝန်ထမ်းများဖြင့် လားရှိုးမြို့ရှိ ပြည်သူ့ဆေးရုံ၊ မြို့နယ်ပညာရေးမှူးရုံး၊ လဝကရုံးနှင့် မြို့သန့်ရှင်းရေး စည်ပင်သာယာရေးဌာနတို့ လုပ်ငန်းလည်ပတ်ခဲ့သည်။
လားရှိုးမြို့ပေါ်မှ MNDAA တပ်ဆုတ်ပြီး တစ်လမပြည့်မှ မေလအတွင်း၌ စစ်ကောင်စီသုံ့ပန်းများကို အသုတ်လိုက်ခွဲ၍ ပြန်လွှတ်ပေးခဲ့ပြီး မြို့နှင့် ၄ မိုင် ပတ်ပတ်လည်တွင် ကိုးကန့်တပ်များ ဆက်လက်နေရာယူ တပ်စွဲထားသည်။
Leave a Comments