သျှမ်းပြည် လားရှိုးမြို့ရှိ ရွှေအရောင်းအဝယ် လုပ်ကိုင်သည့် “ကျော်သရဖူ ရွှေဆိုင်”၏ နေအိမ်တွင် ဓားပြတိုက်ခံရပြီး ရွှေ (၅) ပိဿာနှင့် ကျပ်ငွေ သိန်းတစ်ထောင်ကျော် ပါသွားခဲ့ကြောင်း ဒေသခံပြောဆိုချက်အရ သိရသည်။

ယမန်နေ့ (၂၀၂၆ ဇန်နဝါရီလ ၁ ရက်) မွန်းတည့်ချိန် ၁၂ နာရီခန့်တွင် စစ်ကော်မရှင် ပြန်လည်ထိန်းချုပ်ထားသည့် လားရှိုးမြို့ပေါ် ရပ်ကွက် (၄) ရှိ “ကျော်သရဖူ ရွှေဆိုင်”၏ ရွှေပန်းတိမ် လုပ်ငန်းရှိရာ နေအိမ်သို့ အမည်မသိ လက်နက်ကိုင် လူတစ်စုမှ ဓားပြတိုက် လုယက်ခဲ့ခြင်းကြောင့် ရွှေသား (၅) ပိဿာခန့်နှင့် ကျပ်ငွေ သိန်းတစ်ထောင်ကျော် ဆုံးရှုံးသွားခဲ့ကြောင်း လားရှိုးဒေသခံများက ပြောသည်။

“မနေ့က ကျော်သရဖူ ရွှေဆိုင်ရဲ့ နေအိမ်ကို ဓားပြဝင်တိုက်သွားတာ ဟုတ်တယ်၊ သူတို့က အိမ်မှာလည်း ရွှေဆိုင်ဖွင့်ထားတာ။ လားရှိုးဈေးကြီးထဲမှာလည်း ရွှေဆိုင်ဖွင့်ထားတာ မကြာသေးဘူး၊ ဓားပြတိုက်ခံရတာက သူတို့ အိမ်ဆိုင်မှာ။ ရွှေ ၅ ပိဿာနဲ့ ငွေသား သိန်းတစ်ထောင်ကျော် ပါသွားတယ်လို့လည်း ပြောနေကြတယ်” ဟု လားရှိုးဒေသခံ အသက် (၄၀) ကျော်အရွယ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

အဆိုပါ ဓားပြတိုက် လုယက်ခံခဲ့ရသည့် ရွှေပန်းတိမ်လုပ်ငန်းရှိရာ နေအိမ်သည် ဇန်နဝါရီလ နောက်ဆုံးပတ်တွင် ဆရာတော်တစ်ပါး လုပ်ကြံသတ်ဖြတ်ခံခဲ့ရသည့် မဟာဗောဓရုံ ကျောင်းတိုက်အနီး တည်ရှိပြီး ဆရာတော်ဈာပနပွဲ လူစည်ကားနေစဉ် အခွင့်ကောင်းယူကာ အမည်မသိ လက်နက်ကိုင် လူ(၇) ဦးမှ ကား(၃) စီးဖြင့် ဝင်ရောက် ဓားပြတိုက်ခဲ့ကြောင်း လားရှိုးဒေသခံများထံမှ သိရသည်။

“အခု ဈေးထဲမှာ ပြောသံကြားတာ ရွှေတော့ မပါသွားဘူး။ ဓားပြတွေ အိမ်ထဲဝင်တုန်းက အိမ်ရှင်က သေနတ်အရင်ပစ်လိုက်လို့ ငွေထုပ်ကိုပဲ ဓားပြတွေ ဆွဲသွားနိုင်တယ်လို့ ပြောတယ်။ အခုထိတော့ ကျူးလွန်တဲ့လူတွေကိုလည်း ဖမ်းမိတယ်လို့ မကြားသေးဘူး။ စစ်တပ်ပြန်အုပ်ချုပ်တော့ သူခိုးဓားပြတွေ အရင်လို ပြန်များလာတယ်၊ တချို့လည်း စစ်တပ်ကလူတွေ လုပ်တာလို့တောင် ပြောနေကြတယ်။ ဒီလိုဖြစ်ပြီးရင် တစ်ခါမှလည်း ပြန်မဖမ်းမိဘူးလေ” ဟု လားရှိုးမြို့မှ ၎င်းဒေသခံ အမျိုးသမီးက ဆက်ပြောသည်။

လားရှိုးမြို့ရှိ “ကျော်သရဖူ” ရွှေဆိုင်သည် ရွှေသန့်စင်လုပ်ငန်းနှင့် ရွှေထည်ပစ္စည်း အပေါင်ခံ လုပ်ငန်းတို့လည်း လုပ်ကိုင်ပြီး လားရှိုးမြို့မဈေးတွင် မကြာသေးခင်မှ ရွှေဆိုင် ထပ်မံဖွင့်လှစ်ထားကြောင်း ဒေသခံများထံမှ သိရသည်။

လားရှိုးမြို့တွင် စစ်ကော်မရှင်တပ်ဖွဲ့ဝင်များ မြို့တွင်းလုံခြုံရေး ယူထားသည့်ကြားမှ လူသတ်မှု၊ ဓားပြတိုက် လုယက်မှုတို့ ဆက်တိုက် ဖြစ်ပွားနေခြင်းကြောင့် မြို့နေပြည်သူများအကြား တရားဥပဒေ စိုးမိုးရေးနှင့် လုံခြုံရေး အခြေအနေအပေါ် မေးခွန်းထုတ်မှုများ မြင့်တက်လျက် ရှိသည်။