သျှမ်းပြည် ပင်လောင်းမြို့နယ် ဆောင်းပြောင်းကျေးရွာတွင် ကရင်နီအမျိုးသား ကာကွယ်ရေးတပ်မတော် KNDF ၊မဟာမိတ်ပူးပေါင်း တော်လှန်ရေးအင်အားစုတပ်ဖွဲ့များနှင့် စစ်ကောင်စီတို့အကြား တိုက်ပွဲပြင်းထန်နေကြောင်း စုံစမ်းသိရသည်။
စစ်ကောင်စီတပ်နှင့်လက်အောက်ခံ ပြည်သူ့စစ် PNA က ပင်လောင်း-ဖယ်ခုံနယ်စပ်ကို ထိုးစစ်ဆင်မှုကြောင့် မတ်လ ၁၀ ရက်ကတည်း ပင်လောင်းမြို့နယ်အတွင်းမှာ တိုက်ပွဲတစ်ကျော့ပြန်ဖြစ်ပွားလာပြီး လက်ရှိ ဆောင်းပြောင်းကျေးရွာတွင် တိုက်ပွဲပြင်းထန်လာနေကြောင်း ပင်လောင်းမြို့ဒေသခံများထံမှ သိရသည်။
ပင်လောင်းမြို့ တောင်ဘက်ရှိ ဆောင်းပြောင်းကျေးရွာသည် ပင်လောင်-ဖယ်ခုံ လမ်းမပေါ်တွင်တည်ရှိပြီး ပင်လောင်းမြို့နှင့် မိုင် ၂၀ ခန့်ကွာဝေးသည်။
“အခုတိုက်ပွဲကတော့ ပြင်းထန်နေတုန်းပဲဗျ။ ဆောင်းပြောင်းရွာရှိတဲ့ ရဲစခန်းတွေ၊ တပ်စခန်းတွေ တော်လှန်းတပ်ဖွဲ့တွေ သိမ်းနေတယ်” ဟု ပင်လောင်းမြို့ ဒေသခံအမျိုးသား ၁ ဦးကပြောသည်။
လက်ရှိ တိုက်ပွဲအခြေအနေနှင့် ပတ်သက်၍ ရှမ်းတောင်တော်လှန်ရေးလူငယ်အင်အားစုဘက်က ထုတ်ပြန်လာခြင်း မရှိသေးပေ။
သို့သော် ဒေသခံများပြောပြချက်အရ ပင်လောင်းမြို့နယ်အတွင်း တိုက်ပွဲသည် တစ်နေ့ထက်တစ်နေ့ ပိုမိုပြင်းထန်လာနေပြီး မြို့ပေါ်သို့ တဖြည်းဖြည်းချဉ်းကပ်လာနေသည်ဟု ပင်လောင်းမြို့ခံများက ပြောသည်။
“တစ်လောက သူတို့ပြောတဲ့အတိုင်း စားမေးပွဲဖြေပြီးရင် ပိုသတိရပေးပါဆိုတာ အခုတော့တကယ်လည်း ပိုကြမ်းလာပြီ။ အရင်က နမ့်ဖာမှုကနေ အခုဆောင်းပြောင်းရောက်လာတာ တဖြည်းဖြည်းမြို့နဲ့နီးလာပြီ။ ကျနော်တို့လည်း ပြေးစရာနေရာလည်း မရှိတော့ဘူး။ ဘယ်ပြေးရမှန်းမသိတော့ဘူး” ဟု ပင်လောင်းမြို့ပေါ်တွင် နေထိုင်သည့် အသက် ၃၀ ကျော် အမျိုးသားတစ်ဦးက ဆိုပြန်သည်။
ယင်းတိုက်ပွဲအတွင်း အထိနာနေသည့် စစ်ကောင်စီတပ်နှင့် ပြည်သူ့စစ် PNA တို့သည် ပင်လောင်းမြို့ပေါ်မှာ ကားချောဆွဲခြင်း၊ ပိုက်ဆံတောင်းခံခြင်း၊ စစ်မှုထမ်းခေါ်ယူခြင်းများ ပြုလုပ်နေလျက်ရှိသည်ဟု သိရသည်။
“အခုရွာတွေမှာကော၊ မြို့ပေါ်မှာကော စစ်အသုံးစရိတ်အတွက် တောင်းနေတာ။ တချို့နေရာတွေက ကျပ်ငွေ ၇ သောင်းအထိတောင်းနေတယ်။ တချို့နေရာကျတော့လည်း ကျပ်ငွေ ၂ သောင်း၊ ၅ သောင်းဆိုပြီး တောင်း နေတယ်။ ပြီးတော့ စစ်သားမလုပ်ရမယ်၊ မလုပ်ချင်ရင် တစ်ယောက်ကို ကျပ်သိန်း ၅၀ ဆိုပြီး ထပ်တောင်း နေတယ်။ အခုသူတို့တောင်းနေရာ အမျိုးမျိုးပဲ။ လွန်လွန်းတယ်၊ ဒီမှာဘယ်သူမှ မနေချင်ကြတော့ဘူး” ဟု အထက်ပါ အသက် ၃၀ ကျော် အမျိုးသားတစ်ဦး ထပ်လောင်းပြောသည်။
လက်ရှိ ပင်လောင်းမြို့နယ်အတွင်း ရက်ပေါင်း ၁၀ ကျော်ကြာ တိုက်ပွဲကြောင့် မိမိနေရပ်စွန့်ပစ်ပြီး ထွက်ပြေး တိမ်းရှောင် နေရသူ လူဦးရေ ၁ သောင်းခန့် ရှိနေသည်ဟု သိရသည်။
