သျှမ်းပြည် လားရှိုးမြို့နယ်မှ မူးယစ်ဆေးစွဲသည့် လက္ခဏာရှိသူများကို လားရှိုးရဲတပ်ဖွဲ့က ဖမ်းဆီး၍ မိုင်းရယ်မြို့သို့ ကားတင်ပို့ဆောင်ခဲ့ကြောင်း စုံစမ်းသိရသည်။

ယမန်နေ့ (မတ်လ ၂၀ ရက်) နေ့လည် ၂ နာရီကျော်တွင် လားရှိုးရဲတပ်ဖွဲ့က ဖမ်းဆီးခဲ့သည့် မူးယစ်ဆေးစွဲ လက္ခဏာရှိသူ အမျိုးသား စုစုပေါင်း ၂၀၀ ကျော်ကို ၁၂ ဘီးကားဖြင့် တင်ဆောင်ပြီး မိုင်းရယ်မြို့နယ်အတွင်းရှိ မန်ပုံကျေးရွာ တောင်ဘက်အနီးသို့ လာရောက်ချသွားခဲ့ကြောင်း မိုင်းရယ်မြို့နယ် ဒေသခံများက ပြောသည်။

“မေးကြည့်တော့ လားရှိုးရဲတွေ သူတို့ကိုဖမ်းပြီး ကားတင်လာတာလို့ ပြောတာ။ ပုံစံကြည့်ရတာလည်း ထောင်ကျထားသလို ဆံပင်ရှည်နဲ့ အဝတ်အစားနွမ်းနေတာ၊ တချို့လည်း ဆေးစွဲနေသလိုမျိုးပဲ။ ရွာသားတွေကတော့ တာဝန်မယူနိုင်တော့ လာတဲ့လမ်းအတိုင်း ပြန်ကြဖို့ ပြောလိုက်တာ။ အဲ့တာနဲ့ သူတို့လည်း မိုင်းရယ်ဘက်ကို လမ်းလျှောက်သွားကြတယ်”ဟု မိုင်းရယ်မြို့နယ်မှ မန်ပုံကျေးရွာ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

လားရှိုးရဲတပ်ဖွဲ့က မူးယစ်ဆေးစွဲသည့် လက္ခဏာရှိသူ ၂၀၀ ကျော်ကို ဖမ်းဆီး၍ မိုင်းရယ်မြို့နှင့် ၉ မိုင်ခန့် ကွာဝေးသည့် မန်ပုံကျေးရွာအနီးသို့ ကားဖြင့် လာရောက်ပို့ဆောင်သွားခဲ့ပြီး ၎င်းတို့မှာ မိုင်းရယ်မြို့ဘက်သို့ လမ်းဆက်လျှောက်သွားခဲ့ကြောင်း မိုင်းရယ်ဒေသခံများက ပြောသည်။

ဖမ်းဆီးခံရပြီး မိုင်းရယ်မြို့နယ်သို့ ပိုဆောင်ခံရသူများထဲတွင် သျှမ်း၊ ကချင်၊ ဗမာ၊ တအာင်း (ပလောင်) စသည်ဖြင့် လူမျိုးစုံ ပါဝင်ပြီး အများစုမှာ လားရှိုးမြို့နယ်အတွင်း နေထိုင်ကြသူများဖြစ်ကြောင်း သိရသည်။

“ပြည်သူတွေကတော့ ရုတ်တရက်ကြီး သူစိမ်းအများကြီးတွေ့တော့ လန့်ကြတာပေါ့။ တချို့ကလည်း စစ်ဘေးရှောင်လို့ ထင်တာ၊ လမ်းလျှောက်သွားကြတာ လမ်းမပေါ် အပြည့်ပဲ။ သူတို့နဲ့ စကားပြောကြည့်တော့ လားရှိုးမှာ ရဲဖမ်းခံရလို့ ကားတင်ပြီး လာချသွားတာလို့ ပြောတာ။ သူတို့လဲ ကိုယ့်အိမ်ကို ပြန်ချင်တယ်ပြောတယ်”ဟု မိုင်းရယ်မြို့နယ်မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

မိုင်းရယ်မြို့နယ် မန်ပုံကျေးရွာအနီးတွင် ယခုကဲ့သို့ မူးယစ်ဆေးစွဲသည့် လက္ခဏာရှိသူ အများအပြားကို လားရှိုးစစ်ကောင်စီ လက်အောက်ခံ ရဲတပ်ဖွဲ့မှ ရုတ်တရက် လာရောက်ပို့ဆောင်သွားခြင်းကြောင့် ပြည်သူများမှာ လုံခြုံရေး စိုးရိမ်ထိတ်လန့်နေရကြောင်း မိုင်းရယ်ဒေသခံများထံမှ သိရသည်။

ထို့အပြင် ၎င်းမူးယစ်ဆေးစွဲသည့် လက္ခဏာရှိသူများက မန်ပုံကျေးရွာအနီး ရေမြောင်းတူးနေသည့် ဒေသခံပြည်သူတစ်ဦးကိုလည်း အုပ်စုဖွဲ့ ခြိမ်းခြောက်ကာ ဆိုင်ကယ် လုယူသွားခဲ့ကြောင်း ဒေသခံများက ပြောသည်။

“ သူ့ဆိုင်ကယ်က လမ်းဘေးမှာထားတာ၊ လမ်းလျှောက်လာတဲ့ အဲ့ဒီအဖွဲ့တွေက ဆိုင်ကယ်ကို ဖြုတ်နေတုန်း ပိုင်ရှင်က သွားကြည့်တော့ သူတို့က သော့ တောင်းတာပေါ့။ သော့မပေးရင် လူကိုရိုက်မယ်ဆိုပြီး လုပ်တာ၊ လွယ်အိတ်ထဲ နှိုက်ရှာကြည့်တော့ ဆိုင်ကယ်သော့ တွေ့တာနဲ့ လုယူသွားတယ်။ သူတို့မပြန်သေးခင် ညဘက်တွေ သတိထားဖို့ သူကြီးက မှာထားတယ်”ဟု ဖြစ်စဉ်သိရှိသူ မိုင်းရယ်မြို့ ဒေသခံအမျိုးသားက သျှမ်းသံတော်ဆင့်ကို ပြောသည်။

မတ်လ (၁၉) ရက်မှ စတင်ပြီး မိုင်းရယ်မြို့နယ်လည်း စစ်ကောင်စီတပ်နှင့် မြို့နယ်အုပ်ချုပ်ရေးမှူးတို့က ပြည်သူ့စစ်မှုထမ်း ဆင့်ခေါ်ရန် ရပ်ကွက်နှင့် ကျေးရွာအုပ်စု အုပ်ချုပ်ရေးမှူးများကို အစည်းအဝေး ခေါ်ယူပြီး အသက် ၁၈ နှစ်မှ ၃၅ နှစ်အတွင်း အမျိုးသားကို ကျေးရွာအုပ်စု တစ်ခုလျှင် လူဦးရေ ၈၀ မှ ၁၅၀ အထိ စုဆောင်းပေးရန် အမိန့်ပေးညွှန်ကြားလာကြောင်း မိုင်းရယ်ဒေသခံများထံမှ သိရသည်။