သျှမ်းပြည်တပ်မတော် RCSS/SSA မှ တပ်သားသစ် စုဆောင်းနေသည်ဟု သတင်းများထွက်ပေါ်နေသည့် အပေါ် ဗိုလ်ချုပ်ကြီးယွက်စစ်က အဓမ္မတပ်သားစုဆောင်းခြင်းမရှိ ။ လက်ရှိတွင် လူငယ်များအနေဖြင့် အသိစိတ်ဖြင့်လာရောက် စစ်မှုထမ်းခြင်း၊ တာဝန်အရ စစ်မှုထမ်းရခြင်း နှင့် လူတိုင်းစစ်ပညာတတ်ရမည် ဆိုသည့်မူကြောင့် လာရောက်စစ်မှုထမ်းနေကြခြင်းဖြစ်ကြောင်း သျှမ်းသံတော်ဆင့်အားပြောသည်။
ဗိုလ်ချုပ်ကြီးယွက်စစ်က – ၁- ဆန္ဒအလျောက် အသိစိတ်ဖြင့် စစ်မှုဝင်ထမ်းပါက လွန့်စစ် ခေါ် အမာခံစစ်သည်၊ ၂- တာဝန်အရ စစ်မှုထမ်းရပါက စစ်သင်တန်းနှင့်အတူ အလုပ်တာဝန် ၅ နှစ် ပြီးဆုံးပါက တာဝန်ထမ်း ဆောင် ပြီး ကြောင်းလက်မှတ်နှင့်အတူ နေရပ်သို့ ပြန်ရမည်ဖြစ်ကြောင်း ၊ အသက် ၁၈ နှစ်ပြည့် သျှမ်းပြည်သားတိုင်း စစ်ပညာသင်ယူရမည်ဖြစ်ပြီး စစ်သင်တန်း ပြီးဆုံးပါက သင်တန်းဆင်းလက်မှတ်ထုတ်ပေးမည်ဖြစ်ရာ မိသားစုထံပြန်လွှတ်ပေးမည်ဖြစ်ကြောင်း ၄င်းကပြောသည်။
“တိုက်ပွဲမရှိတဲ့ ထိုင်းတွေတောင်သူတို့နိုင်ငံ သူတို့ရပ်ရွာကာဖို့ စစ်ပညာသင်ရတာ။ တိုက်ပွဲများတဲ့ ဒို့ဒေသ မှာ ပိုတောင်လိုအပ်သေးတယ်။ တာဝန်ပြီးဆုံးရင် မိသားစု နဲ့အတူ ပြန်နေရမှာဘဲ။ ပြီးရင်နောက်တယောက် ထပ် လာ။ ဒါက ကိုယ်ကျိုးအတွက်လုပ်တာမဟုတ်ဘူး။ ကိုယ်ပိုင်ပြဌာန်းခွင့်ရရေး အမျိုးသားတန်းသူရေး အတွက် တိုင်းပြည်နဲ့ လူမျိုးအတွက် အလုပ်လုပ်တာ၊ အဓမ္မစုဆောင်းတာမရှိဘူး။ တာဝန်အရ အသက် ၁၈ နှစ် ပြည့်သူ တိုင်း စစ်မှုထမ်းကို ထမ်းရမယ် ဆိုတာဘဲရှိတယ် ”- ဟု ဗိုလ်ချုပ်ကြီး ယွက်စစ်က သျှမ်းသံတော်ဆင့်သို့ပြော သည်။
NCA စာချုပ် အပစ်ရပ်တိုင်းရင်းသားလက်နက်ကိုင်တပ်ဖွဲ့များအား အစိုးရတပ်မတော်က တပ်မတော်မူ ၆ ရပ် ဟုဆိုကာ – ၁။ လူသစ်စုဆောင်းခြင်း၊ အင်အားတိုးချဲ့ခြင်းမပြုရ။ ၂။ အခွန်ကောက်ခြင်းမပြုရ။ ၃။ ခွင့်ပြုချက်မရဘဲ စခန်းအသစ်တည်ခြင်း၊ သွားလာခြင်းမပြုရ။ ၄။ အစိုးရအုပ်ချုပ်ရေးကို ဝင်ရောက်စွက်ဖက်ခြင်းမပြုရ။ ၅။ လူသတ်ခြင်းမပြုရ။ ၆။ အစိုးရပြည်သူ့စစ်တပ်ဖွဲ့ကို ထိပါးခြင်းမပြုရ။ – စသဖြင့် ချမှတ်ထားသည်။
သျှမ်းပြည်တပ်မတော် RCSS/SSA က အဆိုပါ မူသည် တပ်မတော်၏ မူသာဖြစ်ကြောင်း၊ NCA စာချုပ်တွင် အဆိုပါ အချက်များ ပါ၀င် သဘောတူလက်မှတ်ရေးထိုးထားခြင်းမရှိကြောင်း၊ အဆိုပါ တပ်မတော်မူကဲ့သို့ သျှမ်းပြည်တပ်မတော် RCSS/SSA တွင်လည်း နိုင်ငံရေးမဆွေးနွေးရသေးမှီ အပစ်ရပ် NCA ကာလ မူ ၆ ရပ် ချမှတ် ထား ရှိကြောင်း သျှမ်းသံတော်ဆင့်သို့ ပြောပြဖူးသည်။
