ထိုင်းနိုင်ငံ ဂူအတွင်း ၁၅ ရက်ကြာပိတ်မိရာမှပြန်ထွက်လာသော ဘောလုံးသမား ကျောင်းသား ၁၃ ယောက်အကြောင်း Documentary ဇာတ်လမ်းတို ဂျပန်နိုင်ငံက ရိုက်ကူးဖြန့်ဝေ  

ထိုင်းနိုင်ငံမြောက်ပိုင်း ချင်းရိုင်းခရိုင် မယ်ဆိုင်မြို့တောင်ဘက် လွယ်နန်းနောန်းတောင်ရှိ ထမ့်လုံ ခွန်နမ့်နန်း နောန်းဂူအတွင်း ၁၅ ရက်ကြာပိတ်မိခဲ့သော မယ်ဆိုင်မြို့အထက်တန်းကျောင်းများမှ ကျောင်းသားဘောလုံး အသင်း ၁၂ ဦးနှင့်နည်းပြ ၁ ဦး တို့၏ ဖြစ်ရပ်မှန် Documentary ဇာတ်လမ်းတိုအား ဂျပန်နိုင်ငံမှ ရိုက်ကူး ထုတ်လွှင့်ခဲ့သည်။

အဆိုပါ Documentary ဇာတ်လမ်းတို မှာ ကြာချိန် ၅ မိနစ်ခန့်ရှိပြီး ကျောင်းသားလေးများ ဂူအတွင်း ၀င်သွားချိန်မှစ၍ ကယ်ဆယ်ရေးအဖွဲ့ အင်္ဂလိပ်ရေငုပ်သမားများမှ ၄င်းတို့အား တွေ့ရှိချိန်အထိသာပါရှိသည်။

ကလေးများ ဂူမှသယ်ထုတ်ကာဆေးရုံပို့ခဲ့သည့် ဇူလိုင်လ ၈ ရက် ၉ ရက်နှင့် ၁၀ ရက်နေ့ များ အဆိုပါ ဇာတ်လမ်းတို တွင်မပါရှိပေ။

ဂျပန်နိုင်ငံမှ ပြုလုပ်သော ဂူတွင်းပိတ်မိသည့် မူပါအကယ်မီဘော်လုံးအသင်း နှင့်ပတ်သက်သည့် Documentary ဇာတ်လမ်းကို ဇူလိုင်လ ၉ ရက် တွင် ဆိုရှယ်မီဒီယာ ဖေ့စ်ဘုတွင် စတင်ပျံ့နှံ့ခဲ့သည်။

နည်းပြ ၁ ဦး ဘောလုံးအသင်း ကျောင်းသား ၁၂ ဦးပါ၀င်သော မူပါအကယ်ဒမီ ဘောလုံးအသင်းသည် ဇွန်လ ၂၃ ရက်နေ့ညနေပိုင်းက ဘောလုံးလေ့ကျင့်ပြီးအိမ်အပြန်လမ်းတွင် အနက် ၁၀ ကီလိုမီတာခန့်ရှည်လျားသည့် ထမ့်လုံခွန်နမ့်နန်းနောန်း ဂူအတွင်းဝင်သွားပြီးနောက် မိုးသည်းထန်စွာရွာသွန်းသဖြင့် ရေကြီးကာ ဂူမှပြန်ထွက်မရ ဖြစ်ခဲ့ရသည်။

“ကျနော်တို့က ဒီဂူထဲကိုမကြာခဏ ၀င်ပြီးလေ့လာမှုပြုခဲ့ဖူးပါတယ်။ ဒီတခါပါရင် ၄ ကြိမ်ရှိပြီ။ အရင်က ဒီလို မဖြစ်ဖူးဘူးလေ။ ကျနော့်သူငယ်ချင်းတွေအတွက် စိတ်ပူပါတယ်။ ကျနော်က အဲဒီနေ့က ဘောလုံးကွင်းအထိ အမေကလာကြိုလို့ သူတို့နဲ့လိုက်မဝင်ရတာပါ။ မဟုတ်ရင်ကျနော်လည်းအဲ့ထဲမှာပေါ့။ ”- ဟု မူပါဘောလုံး အသင်းဝင် ကျောင်းသားတဦးက ထိုင်းမီဒီယာများအင်တဗျူးရာတွင် ပြောဆိုသည်။

ဇွန်လ ၂၄ ရက်တွင်အင်္ဂလိပ်ရေငုပ်သမားနှင့် ထိုင်းနေဗီဆီးလ်တပ်ဖွဲ့တို့ ဂူအတွင်းရေငုပ်ဝင်ရာ ၄ ကီလိုမီတာခန့်အနက်တွင်ကလေးများ၏ လွယ်အိပ်များ ဖိနပ်များ တွေ့ရပြီး ၂၅ ရက်နေ့တွင်မူ ကလေးများ၏ ခြေရာများ တွေ့ခဲ့သော်လည်းကလေးများအား မတွေ့ရပေ။ ဇွန်လ ၂၆ ရက်မှ ဇူလိုင်လ ၁ ရက်နေ့အထိ ထိုင်းအစိုးရ ဌာနဆိုင်ရာ ကူညီကယ်ဆယ်ရေး ကျွမ်းကျင်ပညာရှင်များ ၊ နိုင်ငံအသီးသီးမှ ကယ်ဆယ်ရေးသမားများနှင့်အသုံးအဆောင်ပစ္စည်းများဖြင့် ဂူတွင်း၊ ဂူပြင် တောင်ထိပ်တို့တွင် အသီးသီးရှာဖွေခဲ့သည်။

ဂူအတွင်းပိုင်းမှရေများလျော့ကျသွားစေရန်အတွက် ဂူပြင်ပိုင်းတွင် အဝီစိတွင်းများတူးခြင်း၊ ဂူအတွင်းရေစီးဝင်နိုင်မည့် တောင်ကျချောင်းရေများ လမ်းလွဲခြင်းများ ကြိုးစားလုပ်ဆောင်ခဲ့သည်။

ဇွန်လ ၂၉ ရက်နေ့ နှင့် ၃၀ ရက်နေ့တွင် တာချီလိတ်မြို့နယ် မိုင်းဖုန်းကျောင်းထိုင်ဆရာတော စဝ်ခူးဝါးဝန်းစုမ့်က ၂ ရက်အတွင်းကလေးများတွေ့ရှိမည်ဟု ဂူဝတွင်မေတ္တာပို့ကာ သတင်းထောက်များအား မိန့်ကြားတော်မူသည်။

ဇူလိုင်လ ၂ ရက်နေ့တွင်မူ ထိုင်းနေဗီဆီးလ်များ ဂူအတွင်းပိုင်း ၈ ကီလိုမီတာခန့်အကွာရှိ ဖထယားဘစ်ချ်သို့သွားရောက်ရှာဖွေရန်အတွက် အင်္ဂလန်နိုင်ငံရေငုပ်သမား ၂ ဦးက ရေငုပ်ကာ ကြိုးများသွယ်တန်းပေးရာ ဖထယားဘစ်ချ်အလွန် မီတာ ၃၀၀ ကျော်တွင် ကလေးများအား တွေ့ရှိခဲ့သည်။

ထိုနောက်ပိုင်း ဂူအတွင်းပိုင်းတွင် မျက်နှာကျက်အထိ မြင့်တက်ပြည့်လျှံနေသောရေများလျော့ကျရေးအတွက် ဂူအတွင်းစီးဝင်သည့် ရေလမ်းကြောင်းလွဲခြင်း ဂူအတွင်းပိုင်းမှရေများအား ထိုင်းနိုင်ငံအတွင်းရှိအကြီးဆုံး ရေစုပ်စက်များဖြင့် နေ့ရောညပါ စုပ်ထုတ်ရာ ဇူလိုင်လ ၈ ရက်နေ့တွင်ဂူအတွင်းပိုင်းမှ ရေများလျော့ကျ သွားသည်ကိုတွေ့သည်နှင့် သြစတေးလျမှလာသော ရေငုပ်ကျွမ်းကျင် ဆရာဝန်က ကလေးများကျန်းမာရေး စစ်ဆေးပေးကာ ဂူပြင်သို့ ကယ်ထုတ်ရန်မီးစိမ်းပြခဲ့သည်။

ထို့ကြောင့် ကလေး ၁ ယောက်လျင် နိုင်ငံခြားသားရေငုပ်ကျွမ်းကျင် ၁ ဦး ထိုင်းနေဗီဆီးလ် တပ်မှ ရေငုပ်ကျွမ်းကျင် ၁ ဦးလိုက်ပါစောင့်ရှောက်ကာ ဇူလိုင်လ ၈ ရက်နေ့တွင် ကလေး ၄ ဦး ဇူလိုင်လ ၉ ရက်နေ့တွင် ကလေး ၄ ဦးနှင့် ဇူလိုင်လ ၁၀ ရက်နေ့တွင် ကလေး ၅ ဦး ကို ဂူတွင်းမှကယ်ထုတ်နိုင်ခဲ့သည်။

ဂူတွင်းမှ ကလေးများအားကယ်ဆယ်ရေးတွင် ထိုင်းအစိုးရ၊ စေတနာရှင်ထိုင်းပြည်သူလူထု ၊ နိုင်ငံခြားမှ ကျွမ်း ကျင်ပညာရှင်များ စုစုပေါင်းအင်အား ၁၀၀၀ ကျော်သုံးကာ ဘတ်ငွေသန်းပေါင်း ၄၀၀ ကျော်ကုန်ကျသွား ကြောင်းလည်း ထိုင်းနိုင်ငံသတင်းဌာနများတွင်ဖော်ပြထားသည်။

လက်ရှိတွင်ကလေး ၁၂ ဦးနှင့်နည်းပြ ၁ ဦးတို့အား ချင်းရိုင်းမြို့ ပရချား နုခရော့ ဆေးရုံကြီးတွင် ဆေးကုသမှု ခံယူနေကြောင်း ၊ ကလေး ၄ ဦးမှာအဆုတ်ယောင်ဖြစ်နိုင်ချေရှိသောအလားအလာရှိပြီး ကျန်ကလေးများမှာ ကျန်းမာရေးအထူးကောင်းမွန်နေကြောင်း ချင်းရိုင်းဆေးရုံမှ ဆရာဝန်များက သတင်းစာရှင်းလင်းပွဲပြုလုပ်ကာ ပြောကြားခဲ့သည်။

ကလေး ၁၃ ယောက်မှာ မယ်ဆိုင်မြို့အထက်တန်းကျောင်းမှကလေးများဖြစ်ကြပြီး နည်းပြအပါအဝင် ကလေး ၉ ယောက်မှာ ထိုင်းနိုင်ငံတွင်နေထိုင်သည့် သျှမ်းမိဘများမှ မွေးဖွားသည့် ကလေးများဖြစ်ကြောင်းသိရသည်။ကျန် ၂ ယောက်မှာ ထိုင်းကလေးများဖြစ်ပြီး ကလေး ၁ ယောက်မှာမူ မယ်ဆိုင်မြို့နေ ခရိယာန်ဘုန်းကြီး ကျောင်း မှ မွေးစားထားသည့် သျှမ်ပြည်သား ၀ တိုင်းရင်းသားကလေးဖြစ်ကြောင်းသိရသည်။

၄င်းတို့၏ ဂူတွင်းပိတ်မိသည့် ဖြစ်ရပ်မှန်ဇာတ်လမ်းကို ဂျပန်နိုင်ငံမှ ဖြစ်ရပ်မှန် Documentary ဇာတ်လမ်းတိုအား ရိုက်ကူး ထုတ်လွှင့်ခဲ့သည့်အပြင် ဟောလီးဝုဒ်ရုပ်ရှင်ထုတ်လုပ်ရေးကလည်း ရုပ်ရှင်ဇာတ်လမ်း ရှည်အဖြစ် ရိုက်ကူးရန်လည်း စီစဉ်ထားကြောင် း ထိုင်းသတင်းများထုတ်ပြန်ထားချက် အရ သိရသည်။