သျှမ်းပြည်တောင်ပိုင်း နှင့် မြောက်ပိုင်းနယ်စပ် သီပေါမြို့နယ် နှင့် မိုင်းကိုင် မြို့နယ်အတွင်း အစိုးရတပ် အင်အားအများအပြား ဖြည့်တင်းသကဲ့သို့ သျှမ်းပြည်တပ်မတော် နှစ်ခုစလုံးလည်း အင်အားပိုမိုဖြည့်တင်း နေသည်ဟု ဒေသခံတပ်မှူးများပြောပြချက်အရသိရသည်။
သျှမ်းပြည်တောင်ပိုင်း လွိုင်လင်ခရိုင် မိုင်းကိုင်မြို့နယ် နှင့် ကျေးသီးမြို့နယ်၊ သျှမ်းပြည်မြောက်ပိုင်း ကျောက် မဲခရိုင် သီပေါမြို့ နယ်အတွင်း အစိုးရတပ်မတော် စစ်ကြောင်းများ အင်အားဖြည့် ကာ ဒေသအတွင်း လှုပ်ရှား သကဲ့သို့ သျှမ်းပြည်တပ်မတော် RCSS/SSA , SSPP/SSA တို့ဘက်မှလည်း မိမိကိုယ်ကိုခုခံကာကွယ်ရန် အင် အားတိုးချထားနေကြောင်း ဒေသအတွင်း တပ်မှူးများပြောပြချက်အရသိရသည်။
အစိုးရတပ်က ရမခ တိုင်းလက်အောက်ခံတပ်တွေ၊ ရလခ တိုင်းလက်အောက်ခံတပ်တွေ အပါအဝင် တပ်မ ၃၃ လက်အောက်ခံတပ်ရင်းအချို့ သီပေါမြို့နယ် နှင့် မိုင်းကိုင်မြို့နယ်ဘက်သို့အင်အားတိုးချကာ သျှမ်းပြည်တပ် မတော် RCSS/SSA စစ်ကြောင်းများအား လက်နက်ကြီးများပစ်ခတ် ပိုက်စိတ်တိုက်ရှာဖွေသောကြောင့် ယမန် နေ့ ညနေပိုင်းအထိ တိုက်ပွဲများ ဖြစ်ပွားကာ စစ်ဘေးရှောင် ၆၀၀ ကျော် တိုးများလာနေကြောင်း ဒေသခံ များ ပြောပြချက်အရသိရသည်။
“မနေ့က ဟမ်းငိုင်း လွယ်စက်တော်ကျောင်းမှာ ၅၀ ကျော်ထပ်ရောက်တယ်။ အခု စစ်ဘေးရှောင်က ၆၀၀ ကျော်သွားပြီ။ ဒီအချိန် က စိုက်ချိန် ပျိုးချိန်လေ။ ဒီချိန်မစိုက်ပျိုးရင် မိုးကုန်ရင် ဒေသခံတွေဘာနဲ့သွားစားမလဲ။ ဒေသခံတွေက စပါး၊ ပြောင်း တို့ဘဲ အားထားစိုက်တာ ။ သူတို့တွေ အိမ်အရမ်းပြန်ချင်နေကြတယ်။ တိုက်ပွဲ အမြန်ဆုံးရပ်ပေးပါ အကူအညီလဲ တအားလိုအပ်နေတယ် ” – ဟု မိုင်းကိုင်မြို့နယ် ပြည်နယ်လွွှတ်တော်ကိုယ် စားလှယ် စိုင်းလုံ ကပြောသည်။
ကျေးသီးမြို့ သုဝဏ္ဏသီရိ ဟုန်းထမ်းကျောင်းတိုက်သို့လဲ အိမ်ထောင်စု ၆ ခု လူဦးရေ ၂၀ ခန့် ထပ် ရောက်လာ သည်ဟု ကျေးသီးမြို့ခံတဦးကပြော၏။
“ခမရ တပ် ၅၆၉ က နောင်တောင်းကျောင်း ထဲကနေပြီး လက် နက်ကြီးနဲ့ ဟိုပစ်ဒီပစ်လုပ်နေတာ ။ ဒါကြောင့် ကျမတို့ရွာမှာ မနေရဲလို့ထွက်ပြေးတာ ”- ဟု ကျေးသီးရောက် စစ်ဘေး ရှောင်ကလေးအမေ တဦးက ပြောသည်။
“အဲဒီဒေသ ဘက်က တောင်ပေါ် ပိုင်းမှာ ကျနော်တို့ အခြေချ လှုပ်ရှားတဲ့ နေရာလေ။ မြေနှိမ့်ပိုင်းမှာ RCSS/SSA တပ်ရှိတယ်။ အစိုးရတပ်ကနေ ကျနော်တို့ဆီကို ဦးတည်မလာဘူးလို့မပြောနိုင်ဘူး ။ ဒါ့ကြောင့် ပြင်သင့် သလောက် တော့ အင်အားတွေ တိုးချထားတယ် ”- ဟု ဒေသအတွင်း SSPP တပ်မှူးတဦး ကပြောသည်။
အစိုးရတပ်မတော် စစ်ကြောင်းများအနေဖြင့်လည်း ယမန်နေ့နံနက်ပိုင်း အင်အားဖြည့်ရင်း အချင်းချင်းမှားယွင်း ပစ်ခတ်မှုလည်းရှိကြောင်း၊ တုံလောဝ်ကျေးရွာ အုပ်စု မှ ဟိုခိုင်းကျေးရွာအုပ်စု အသွား တုန်ကျိုင်း ကျေးရွာ အနီးတွင် အချင်းချင်း မှားယွင်းပစ်ခတ်တိုက်ခိုက်သောကြောင့် ကျေးလက်ဒေသခံများ ကြောက်လန့်ကာ တုံလောဝ်ရွာမသို့ ထွက်ပြေးတမ်းရှောင်ကြသေးကြောင်းဒေသခံများ ပြောပြချက်အရသိရသည်။
ဇူလိုင် ၃-၅ ရက်နေ့ အထိ နေပြည်တော်တွင် ကျင်းပသည့် JMC-U အစည်းအဝေးတွင် ဒုတိယ ဗိုလ်ချုပ်ကြီး သန်းထွန်းဦးက နယ်မြေကျူးကျော်လှုပ်ရှားသည့် မည်သည့်တပ်ဖွဲ့ကိုမဆို တိုက်ခိုက်ရှင်းလင်းသွားမည် ဖြစ်ကြောင်း တနိုင်ငံလုံးအပစ်ရပ်စာချုပ်လက်မှတ်ရေးထိုးထားသည့် RCSS/SSA ကိုယ်စားလှယ်များထံပြော ကြားသည့်နောက်ပိုင်း စစ်ရေးပြင်ဆင်လာခြင်းဖြစ်သည်။
သျှမ်းပြည်တပ်မတော် RCSS/SSA အနေဖြင့် နယ်မြေ ကျူးကျော်လှုပ်ရှားတာတွေမရှိသကဲ့သို့ မည်သည့် သဘောတူညီချက်တွင်မှ နယ်မြေသတ်မှတ် သဘောတူလက်မှတ်ရေးထိုးထားတာမရှိကြောင်း၊ တပ်မတော် ခေါင်းဆောင်ပိုင်းအနေဖြင့် ယခု ပြောကြားချက်သည် စစ်ရေးအရ စိန်ခေါ်လိုက်ခြင်းသာ ဖြစ်ကြောင်း RCSS/SSA ပိုင် တိုင်းဖှရီးဒမ်း ၀ဲပ်ဆိုဒ်တွင် ဖေါ်ပြထားသည်။
