သျှမ်းပြည်မြောက်ပိုင်း သီပေါမြို့နယ်အတွင်းရှိ နမ္မချောင်းနှင့် နမ့်ပေါင်ချောင်းဆုံရာ အနီးတစ်ဝိုက်တွင် ကိုးကန့်တပ် (MNDAA) က ရွှေတူးဖော်ရန် ပြင်ဆင်နေကြောင်း ဒေသခံများထံမှ သိရသည်။

ပြီးခဲ့သည့် ဧပြီလလယ်ခန့်မှ စတင်ကာ ကိုးကန့်တပ် (MNDAA) တပ်ဖွဲ့ဝင်များသည် သီပေါမြို့နယ် နမ္မကျေးရွာအုပ်စု နောင်နွေးကျေးရွာ အရှေ့ဘက်ရှိ ချောင်းဘေးတစ်လျှောက်တွင် ဘက်ဖိုးမြေတူးစက်များနှင့် ရွှေကျင်စက်ပစ္စည်းများကို လာရောက်ချထားပြီး ကားလမ်းဖောက်လုပ်ခြင်းဖြင့် လုပ်ငန်းစတင်ရန် ပြင်ဆင်နေကြောင်း ဒေသခံများက ပြောသည်။

ဒေသခံများက ၎င်းတို့၏ စိုက်ပျိုးရေး လုပ်ငန်းများနှင့် သဘာဝပတ်ဝန်းကျင် ထိခိုက်လာမည်ကို စိုးရိမ်နေကြကြောင်း သျှမ်းသံတော်ဆင့်ကို ပြောသည်။

“သူတို့ပစ္စည်းတွေ လာချသွားတာ နှစ်ပတ်လောက်ရှိပြီ။ လမ်းတွေလည် လာဖောက်နေတယ်။ ကျနော်တို့ကိုတော့ လာတူးမယ်လို့ပဲ ပြောတာ။ ခွင့်ပြုလား၊ မပြုဘူးလားဆိုတာ မမေးဘူး။ လက်နက်ကိုင် ထားတဲ့သူတွေဆိုတော့ ကျနော်တို့လည်း ဘာမှမတုံ့ပြန်ရဲဘူး” ဟု လုံခြုံရေးအရ အမည်မဖော်လို့သည့် ဒေသခံတစ်ဦးက ပြောသည်။

ရွှေတူးဖော်ရန် ပြင်ဆင်နေသည့် နေရာသည် နောင်နွေးကျေးရွာနှင့် တစ်မိုင်ခန့်သာ ကွာဝေးပြီး အိမ်ခြေ ၉၀ ကျော်ရှိသည့် အဆိုပါကျေးရွာတွင် ကမ္ဘလာခြံနှင့် ပြောင်းစိုက်ပျိုးရေကို အဓိထား လုပ်ကိုင်နေကြကြောင်း သိရသည်။

“အကယ်လို့ ရွှေတူးဖော်လာရင် ဒေသခံတွေရဲ့ လယ်ယာစိုက်ပျိုးရေးတွေ ထိခိုက်မှာ သေချာတယ်။ အခုရာသီက ပြောင်းစိုက်တဲ့ရာသီ၊ ဝါထွက်ရင် ပြောင်းချိုးမှာ။ ရေထုညစ်ညမ်းတာနဲ့ မြေယာပျက်စီးမှာကို အစိုးရိမ်ဆုံးပဲ” ဟု အထက်ပါဒေသခံတစ်ဦးက ထပ်လောင်းပြောသည်။

ပြီးခဲ့သည့် ဖေဖော်ဝါရီလ ၁ ရက် ညနေပိုင်းတွင်လည်း လားရှိုးမြို့နယ် မန်စယ်ကျေးရွာအုပ်စုရှိ ဒေသခံလယ်မြေတွင် ကိုးကန့်တပ် (MNDAA) ရွှေတူးဖော်မှုကို ကန့်ကွက်ဆန္ဒပြခဲ့သည့် မန်စယ်ရွာသား (၃၆) ဦးကို ကိုးကန့်တပ်သားများမှ ဖမ်းဆီးခေါ်ဆောင်သွားခဲ့သည်။

ထို့နောက် ဦးဆောင်ဆန္ဒပြသူနှင့် နောက်ကွယ်မှ စည်းရုံးလှုံ့ဆော်သူများကို ရှာဖွေရန် ရိုက်နှက်စစ်ဆေး မေးမြန်းခဲ့ကြောင်း နမ့်ပေါင်ဒေသခံများထံမှ သိရသည်။

လက်ရှိတွင် ကိုးကန့်တပ် (MNDAA) တပ်ဖွဲ့ဝင်များသည် နမ္မတံတားအနီးတွင် အခြေချနေထိုင်လျက်ရှိပြီး ဒေသတွင်း လှုပ်ရှားနေသည့် ရှမ်းပြည်တိုးတက်ရေးပါတီ (SSPP) နှင့် အဆိုပါလုပ်ငန်းအပေါ် မည်သို့ ညှိနှိုင်းထားသည်ကို ရှင်းရှင်းလင်းလင်း မသိရသေးပေ။

ဒေသခံအချို့ကမူ ၎င်းတို့၏ စိုးရိမ်မှုများကို SSPP ထံသို့ အကြောင်းကြားထားမှုများ ရှိကြောင်း သိရသည်။

အာလားတူ ကျောက်မဲမြို့နယ် မိုင်းငေါ့မြို့အတွင်းရှိ နမ့်စင်ချောင်းဘေးတစ်လျှောက်တွင် ကိုးကန့်တပ် (MNDAA) နှင့် တရုတ်စီးပွားရေးလုပ်ငန်းရှင်များက ဘက်ဖိုးစက်ယန္တရားကြီးများဖြင့် ရွှေတူးဖော်နေပြီး ရှမ်းပြည်တိုးတက်ရေးပါတီ (SSPP) နှင့် တအာင်းအမျိုးသားလွတ်မြောက်ရေးတပ်မတော် (TNLA) တို့က တူးဖော်ခွင့်ပြုပေးကာ အခွန်ကောက်ခံနေကြောင်း ဒေသခံများထံမှ သိရသည်။