မွန်ပြည်သစ်ပါတီ NMSP နှင့် လားဟူ ဒီမိုကရက်တစ်အစည်းအရုံး LDU တို့ NCA လက်မှတ်ရေးထိုး

0

ဖေဖော်ဝါရီလ ၁၃ ရက်နေ့ယနေ့ မွန်းလွဲပိုင်းက မွန်ပြည်သစ်ပါတီ NMSP နှင့် လားဟူ ဒီမိုကရက်တစ်အစည်းအရုံး LDU တို့ ၂ ဖွဲ့ တနိုင်ငံလုံးပစ်ခတ်တိုက်ခိုက်မှုရပ်စဲရေး စာချုပ်လက်မှတ်ရေးထိုးခဲ့ကြ ပါသည်။

နေပြည်တော်ရှိ MICC 2 ခန်းမတွင် လက်မှတ်ရေးထိုးပွဲအခမ်းအနားကျင်းပရာ နိုင်ငံတော်အတိုင်အပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတကြီးဦးထင်ကျော်၊ ဒုတိယသမ္မတများ၊ လွှတ်တော်ကိုယ်စားလှယ်များ၊ တပ်မတော်ကိုယ်စားလှယ်များ၊ NCA လက်မှတ်ရေးထိုးပြီးသော တိုင်းရင်းသားလက်နက်ကိုင်အဖွဲ့ကိုယ်စားလှယ်များနှင့် နိုင်ငံရေးပါတီများ၊ သက်သေအဖြစ်နိုင်ငံတကာကိုယ်စားလှယ်များတက်ရောက်ခဲ့ကြသည်။

NCA စာချုပ်အား မွန်ပြည်သစ်ပါတီမှ နိုင်အောင်မင်း၊ နိုင်လယီကောင်း၊ နိုင်အောင်မငေးတို့က လက်မှတ်ရေးထိုးခဲ့ကြပြီး၊ လားဟူဒီမိုကရက်တစ်အစည်းအရုံးက ဆြာဆော်လမွန်၊ဆြာခင်မောင်လှ၊ နာဗစ်ပွန်တို့က လက်မှတ်ရေးထိုးကြသည်။ ငြိမ်းချမ်းရေးကော်မရှင်ဘက်ကမူ ဒေါက်တာတင်မျိုးဝင်း၊ ဦးသိန်းဇော် ဒုတိယဗိုလ်ချုပ်ကြီးခင်ဇော်ဦးတို့ကလက်မှတ်ရေးထိုးခဲ့ကြသည်။

အဆိုပါအခမ်းအနားတွင် NRPC ဥက္ကဌ ဒေါ်အောင်ဆန်းစုကြည်၊တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ၊ မွန်ပြည်သစ်ပါတီဥက္ကဌ နိုင်ထောမွန်တို့မှအဖွင့်စကားများပြောကြားခဲ့ကြသည်။ ထိုနောက်ပိုင်း ဒေါက်တာတင်မျိုးဝင်းနှင့်NMSP မှနိုင်အောင်မင်းတို့ က NCA စာချုပ်ပါ အချက်အလက်တချို့ကို ဖတ်ကြားပြီးနောက် NCA လက်မှတ်ရေးထိုးခဲ့ကြသည်။

NCA သည် ငြိမ်းချမ်းရေးဖြစ်စဉ်၏အစ ၊ နိုင်ငံရေးဆွေးနွေးပွဲ အစ၊ လက်နက်ကိုင်ပဋိပက္ခ လျှော့ချခြင်း အစ၊ တွေ့ဆုံဆွေးနွေးမှုတွေက တစ်ဆင့် နိုင်ငံရေးပြဿနာတွေကို ညှိနှိုင်းတိုင်ပင်အဖြေရှာမည့့်် နိုင်ငံရေးဖြစ်စဉ် အစဖြစ်ကြောင်း၊ မြန်မာပြည်၏ ပြည်တွင်း လက်နက်ကိုင်ပဋိပက္ခသည် လွတ်လပ်ရေးနှင့် ဖွားဖက်တော် ဖြစ်ကြောင်း၊ ယနေ့တိုင် နှစ်ပေါင်း ခုနှစ်ဆယ်ကျော် ကြာမြင့်ခဲ့ပြီဖြစ်သော်လည်း သံသယများ ၊ မုန်းတီးမှုများ ၊ လက်နက်ကိုင်ပဋိပက္ခများ၏ဆိုးကျိုးအနေဖြင့် ဒေသတွင်း နောက်ကျ ကျန်ရစ်နေရ ကြောင်း၊ ပြည်သူများလည်း အကြောက်တရားနှင့်နေ့စဉ်ရှင်သန်နေထိုင်ကြရ ပြီး ယနေ့ (၂၁)ရာစုခေတ်သစ်အထိ တိုင်းရင်းသားကလေး သူငယ်များ၏ အနာဂတ်များအမှောင်ဖုံးနေရတုန်းဖြစ်ကြောင်း ဒေါ်အောင်ဆန်းစုကြည်က မိန့်ခွန်းတွင် ပြောဆိုသည်။

လက်မှတ်ရေးထိုးရခြင်းနှင့်ပတ်သက်ပြီး NMSP ၏ဗဟိုကော်မတီဝင် နိုင်ဆွေသိန်း က- တကယ်တော့ကျနော်တို့က ၁၉၉၅ ခုနှစ်ကတည်းက စစ်အစိုးရနဲ့အပစ်ရပ်လက်မှတ်ရေးထိုးပြီးပါပြီ။ အခုကျနော်တို့ထပ်မံလက်မှတ်ရေးထိုးခဲ့ရတာကလည်း နိုင်ငံရေးဆွေးနွေးပွဲဝင်ဖို့အတွက် အစိုးရက ကမ်းလှမ်းလာလို့ လက်မှတ်ရေးထိုးရတာဖြစ်ပါတယ်- ဟု RCSS ဌာနချုပ်လွယ်တိုင်းလျန်းတွင်ကျင်းပသော သျှမ်းပြည်အမျိုးသားနေ့က သတင်းစာရှင်းလင်းပွဲ တွင်ပြောဆိုသည်။

လားဟူဒီမိုကရက်တစ်အစည်းအရုံး ကလည်း နိုင်ငံရေးပြသနာများအား နိုင်ငံရေးနည်းလမ်းဖြင့်ဖြေရှင်းနိုင်အောင် NCA လက်မှတ်ရေးထိုးရခြင်းဖြစ်ကြောင်း ပြောဆိုသည်။

UNFC အဖွဲ့ဝင်ဖြစ်သည့် NMSP နှင့် LDU တို့သည် NCA လက်မှတ်ရေးထိုးရန်အတွက် မိမိတို့အဖွဲ့အစည်း၏ အစည်းအဝေးမှ ကိုယ်ပိုင် ဆုံးဖြတ်ချက် ဖြစ်ကြောင်း ၊ UNFC အစည်းအဝေးမှ ဆုံးဖြတ်ချက်မဟုတ်ကြောင်း ၊ သို့အတွက် UNFC အား ခွင့်ပန်အကြောင်းကြားပြီးဖြစ်ကြောင်း ပြောဆိုသည်။

ထို့အတွက်လက်ရှိ UNFC တွင် ကရင်နီအမျိုးသားတိုးတက်ရေးပါတီ KNPP နှင့် ရခိုင်အမျိုးသားကောင်စီ ANC တို့သာကျန်ရှိနေခဲ့ပါသည်။

လက်မှတ်ရေးထိုးသည့်အခမ်းအနားတွင် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က – ကျန်ရှိနေသေးသော တိုင်းရင်းသားလက်နက်ကိုင်အဖွဲ့အစည်းများအား NCA စာချုပ် လက်မှတ်ရေးထိုးရေးတွင် ဆက်လက်ပူးပေါင်းပါ၀င်ဖို့ လက်ကမ်းကြိုဆိုကြောင်းပြောဆိုသည်။

၂၀၁၅ ခုနှစ်အောက်တိုဘာလ ၁၅ ရက်နေ့က NCA စာချုပ် ပထမအကြိမ်လက်မှတ်ရေးထိုးပွဲတွင် လက်မှတ်ရေးထိုးပြီးခဲ့သော တိုင်းရင်းသားလက်နက်ကိုင်တပ်ဖွဲ့ (KNU/ KNLA-PC/ DKBA/ RCSS/ ABSDF/ ALP/CNF/PNLO) ၈ ဖွဲ့ ရှိပြီး ယနေ့ ၂၀၁၈ ဖေဖော်ဝါရီလ ၁၃ ရက်တွင်ထပ်မံရေးထိုးသည့် မွန် NMSP နှင့်လားဟူ LDU တို့အပါအဝင်လက်ရှိတွင် NCA လက်မှတ်ရေးထိုးပြီးသည့်တိုင်းရင်းသားလက်နက်ကိုင်တပ်ဖွဲ့ ၁၀ ဖွဲ့ရှိပြီဖြစ်ပါသည်။

SHARE

LEAVE A REPLY

Please enter your comment!
Please enter your name here