ထိုင်း-မြန်မာ ၂ နိုင်ငံ စီးပွါးရေး၊ ကူးသန်းရောင်းဝယ်ရေး တိုးမြှင့်ရေးအတွက်ရည်ရွယ်ကာ နယ်စပ်ဂိတ်ပေါက်များ တရားဝင်ပြန်လည်ဖွင့်လှစ်ပေးဖို့ ဒေသခံများက သက်ဆိုင်ရာအာဏာပိုင်များအား တောင်းဆိုလိုက်ကြောင်းသိရသည်။

နယ်စပ်ဂိတ်များပြန်လည်ဖွင့်လှစ်ပါက နယ်စပ်ဂိတ်တည်ရှိရာမြို့နယ်များအပြင် နိုင်ငံတော်အဆင့်အထိ စီးပွါးရေးပြန်လည်ဦးမော့လာစေမည်ဖြစ်သကဲ့သို့ တဖက်တွင်လည်း တရားမဝင် မှောင်ခိုပစ္စည်များ တင်သွင်းသယ်ဆောင်မှုများအား ကာကွယ်နိုင်ရန်လည်းအထူးကာကွယ်လုပ်ဆောင်သွားမည်ဖြစ်ကြောင်း ထိုင်းနိုင်ငံဒေသအာဏာပိုင်များကပြောဆိုသည်ဟု ထိုင်းနိုင်ငံ TNN သတင်းဌာနကထုတ်ပြန်ကြေငြာသည်။

ထိုင်းနိုင်ငံ မယ့်ဟောင်ဆောင်ခရိုင် ခွန်ယုံးမြို့နယ် ဟွေ့ဖင့်ရွာနှင့် သျှမ်းပြည်တောင်ပိုင်း လင်းခေးခရိုင်ဟိုမိန်းမြို့နယ် နားမွန်းရွာကြား နယ်ခြားဂိတ်မှ ၂ နိုင်ငံကြား အသုံးအဆောင်၊ အစားအသောက် ကုန်စည်ပစ္စည်းများ နေ့စဉ် သယ်ဆောင် ကူးသန်းလျှက်ရှိသည်။
အဆိုပါလမ်းမှ သျှမ်းပြည်မြို့တော် တောင်ကြီးသို့လည်းကောင်း၊ မြန်မာနိုင်ငံအလယ်ပိုင်း မန်းတလေးမြို့သို့လည်းကောင်းတိုက်ရိုက် သွားနိုင်သည်ဖြစ်ရာ အဆိုပါနယ်စပ်ဂိတ်အား ထာဝရဖွင့်လှစ်နိုင်ရေးအတွက် ဒေသခံများက သက်ဆိုင်ရာ အာဏာပိုင်များထံတောင်းဆိုထားသည်ဟုလည်းသိရသည်။

“အခုအများ သုံးနေတဲ့ မယ့်ဟောင့်ဆောင်မြို့နယ်ထဲကဘဲ ဟွေ့တွန့်နွန့်ရွာက ဂိတ်လိုပေါ့။ ဒါမယ့် ဟွေ့တွန့်နွန့်ကနေသွားရင်နေပြည်တော်ကိုရောက်မယ်။ မန်းတလေးအထိရောက်မယ်။ ဒါပေမယ့် လမ်းကြမ်းတယ်။ သွားရခက်တယ်။ ဒီဟွေ့ဖင့်ဂိတ်ရဲ့တဖက်ခြမ်းမှာ ဟိုမိန်းမြို့နယ်ခွဲ နားမွန်းရွာရှိတယ်။ တောင်ကြီးနဲ့ ကီလိုမီတာ ၃၀၀ လောက်ဘဲဝေးတယ်။ နေ့ချင်းပေါက်တောင်ကြီးကိုရောက်နိုင်တယ်။ လမ်းလည်းပိုကောင်းတယ်။အဲတာကြောင့် ဟွေ့ဖင့်ဂိတ်ကို တရားဝင်ဖွင့်ပေးစေချင်တယ်”- ဟု မယ့်ဟောင့်ဆောင် ဒေသခံ ကုန်သည် နန်းဆုဒါရတ်ကပြောသည်။

လက်ရှိတွင် ထိုင်းနိုင်ငံအာဏာပိုင်များသည် အဆိုပါနားမွန်းရွာဖက်ခြမ်းမှကုန်သည်များအား မယ့်ဟောင့်ဆောင်မြို့တွင်းအထိ၀င်ရောက် ပစ္စည်းဝယ်ယူခွင့်မပေးခဲ့ပေ။ ထို့အတွက် ကူးသန်းရောင်းဝယ်ရေး၊ ခရီးသွားလုပ်ငန်းများတိုးမြှင့်နိုင်ရေးအတွက် ထိုသို့ပိတ်ပင်ထားမှုမှပြန်လည်ဖွင့်လှစ်ပေးရန် ကုန်သည်များက တောင်းဆိုနေကြခြင်းဖြစ်သည်။

“အခုက ဟိုဘက်ကမ်းကလူကို မယ့်ဟောင့်ဆောင်မြို့နယ် နားပါစပ်ရွာအထိဘဲပေးဝင်တော့ ကန့်သတ်မှုတွေတအားများ နေသေးတယ်။ တချို့ဆိုရင် ဆေးရုံသွားချင်တယ်။ တချို့ဆိုရင် ပစ္စည်းသွားဝယ်ချင်တယ်။ တကယ်လို့ မြို့တွင်းမြို့နယ်အထိ ပေးဝင်ရင်တော့ ဟိုဘက်ဒီဘက်ကုန်သည်တွေ အတွက် အဆင်ပြေစေသလို ကားသမားတွေလည်း ၀င်ငွေတိုးစေမယ်လေ။” – ဟု မယ့်ဟောင့်ဆောင်ခရိုင်သား ကုန်သည် စိုင်းခွန်းဆန်က ပြောသည်။

မယ့်ဟောင့်ဆောင်ခရိုင်အတွင်း မြန်မာနိုင်ငံနယ်စပ်ဂိတ်ကြီး ၄ ခုရှိရာ ဂိတ်၏ တဖက်တချက် ကျေးလက်ကြား ကုန်စည်ပစ္စည်းများ ကူးသန်းရောင်းဝယ်မှုဖြင့် စီးပွါးရေးလုပ်ငန်းလုပ်နေသကဲ့သို့ ဥပဒေနှင့်မလွတ်ကင်းသည့် နွား၊ သစ်၊ တွင်းထွက်ကျောက်သံ မူးယစ်အစရှိ မှောင်ခိုလုပ်ငန်းများအပြင် ၂ နိုင်ငံ နိုင်ငံသားကတ်အတု များကိုင်ဆောင်သုံးစွဲမှုလည်း ရှိသဖြင့် လုံခြုံရေးများအထူးကြပ်မတ်ချထားကြောင်း မယ့်ဟောင့်ဆောင် ခရိုင်အုပ်ချုပ်ရေးမှူး ကပြောသည်။

မယ့်ဟောင့်ဆောင်ခရိုင်အတွင်းရှိ နယ်ခြားဂိတ် ၄ ခုမှာ မြန်မာနိုင်ငံဘက်ခြမ်း နားမွန်းရွာနှင့်ကပ်လျက် ဟွေ့ဖင့်ဂိတ်၊ ကယားပြည်နယ်လွယ်ကော်နှင့်ကပ်လျက် နမ့်ဖိန်းဒင်ဂိတ်၊ ကယားပြည်နယ် ဖားဆောင်းမြို့နယ်နှင့်ကပ်လျက် ဟွေ့တွန်းနွန့်ဂိတ်နှင့် မယ့်ဟောင့်ဆောင်လေဆိပ် စားသောက်ကုန်ဂိတ်တို့ဖြစ်ကြသည်။