ပင်လောင်းမြို့ ကျောင်း နှင့် ကျန်းမာရေးဌာန ပူးပေါင်းပြီး ဂျပန်ဦးနှောက်ယောင်ရောဂါ ကာကွယ်ဆေး ထိုးနှံပေးသည့်နေ့တွင် အမှတ် ၂ အခြေခံပညာအထက်တန်းကျောင်း – သတ္တမတန်းကျောင်းသူ တဦးသေဆုံး သွားသည်ဟုသိရသည်။
ကျန်းမာရေးဌာနအဖွဲ့ သုံးဖွဲ့မှပူးပေါင်းပြီး ဂျပန်ဦးနှောက်ယောင်ရောဂါကာကွယ်ဆေးအား နိုဝင်ဘာ ၁၆ ရက် နေ့က ကွင်းဆင်းဆေးထိုးပေးခဲ့ရာ ဆေးထိုးပြီး ၆ နာရီအကြာတွင် သေဆုံးသွားသည့် ကလေးမှာ သတ္တမတန်းကျောင်းသူ နန်းယဉ်ယဉ်ထွေးဆိုသူဖြစ်ကြောင်းသိရသည်။
နန်းယဉ်ယဉ်ထွေးသည် ဆေးထိုးပြီးနာရီဝက်ခန့်အကြာတွင်မူးဝေလာပြီး မွန်းလွဲပိုင်းတွင် ပင်လောင်း ဆေးရုံသို့ ပို့ဆောင်ခဲ့ကြောင်း၊ ထိုမှတဆင့် တောင်ကြီး စဝ်စံထွန်းဆေးရုံသို့ ဆက်လက်ပို့ဆောင်ကာ ဆေးကုသမှုခံယူစဉ် ညနေ ၅ နာရီကျော်တွင် သေဆုံးသွားကြောင်း ဆရာမတဦးက ဤကဲ့သို့ပြောသည်။
“နန်းယဉ်ယဉ်ထွေးကို ဆေးထိုးပေးချိန် နံနက် ၁၁ လောက်ရှိမယ်ထင်တယ်။ သူသေသွားတာက ညနေ ၅ နာရီကျော်ကျော်မှာပေါ့။ အဲဒီဆေးကြောင့်သေတယ်လို့တော့ တိကျတဲ့အဖြေတော့ မရသေးပါဘူးရှင့်။ ဘာကြောင့်သေတာလဲဆိုတာလည်း သေချာမသိရသေးပါဘူး။ ဒါပေမယ့် အဲဒီဆေးထိုးပြီး မူးတယ် ဆိုပြီးနောက် ၆ နာရီအကြာမှာ သေသွားတယ်လို့ဘဲ ပြောလို့ရပါတယ်။ ” – ဟု အမည် မဖေါ်လိုသည့် ဆရာမ တဦးက ပြောသည်။
သေဆုံးသွားသည့်နန်းယဉ်ယဉ်ထွေးမှာ ပေါင်းလောင်းရွာမှ ပင်လောင်းသို့ကျောင်းလာတက်သည့် ကျောင်းသူဖြစ်ကြောင်း ပင်လောင်းဒေသခံ စိုင်းခမ်းကပြောသည်။
တဖက်တွင်လည်း နန်းယဉ်ယဉ်ထွေး နှလုံးရောဂါအခံရှိသူဖြစ်ပြီး ဆေးထိုးချိန်တွင် ဓမ္မတာလာချိန်နှင့် တိုက်နေကြောင်း၊ ထိုအချက်များကြောင့်လည်းဖြစ်နိုင်ကြောင်း ၎င်း၏ ဆရာမများအသိုင်းအဝိုင်းကပြောဆိုပါသည်။
လက်ရှိအခြေအနေတွင် နိုဝင်ဘာလ ၁၆ ရက်နေ့က ဂျပန်ဦးနှောက်ယောင်ရောဂါ ကာကွယ်ဆေးထိုးထားသည့် ကျောင်းသူ ကျောင်းသား ၈ ဦး မူးဝေနေကြောင်း၊ ပင်လောင်း အထက ၂ အဌမတန်းကျောင်းသူ မသီတာလွင် မှာလည်း စိုးရိမ်ရသည့် အခြေအနေကြောင့် တောင်ကြီး စဝ်စံထွန်းဆေးရုံသို့ ညတွင်းချင်း ပို့ဆောင်ကုသ မှုပြုနေကြောင်း ပင်လောင်းမြို့နယ် ပညာရေးမှူး မှ သျှမ်းပြည်နယ် ပညာရေးဦးစီးဌာန ညွှန်ကြားရေးမှူး ထံ လိပ်မူပေးပို့ထားသည့် စာတွင် ဖေါ်ပြထားသည်။
သို့သော် ဂျပန်ဦးနှောက်ယောင်ရောဂါကာကွယ်ဆေးနှင့်ပတ်သက်ပြီး ဗဟုသုတ အသိပညာပေးစာတွင် – ကာကွယ်ဆေးမထိုးသင့်သူများမှာ (၁)ကိုယ်ခံအားနည်းနေသူများ (၂) အဖျားတက်နေသူများ (၃)ကိုယ်ဝန်ဆောင်များ (၄) AIDS ရောဂါဝေဒနာရှင်များ (၅) ရောဂါအခံတခုခုကြောင့် ဆေးသောက်သုံးနေရသူများ စသူတို့ပါဝင်ပါသည်။
ဆေးထိုးပြီးနောက်ပိုင်း ဆေးထိုးရာ ယောင်ကိုင်းခြင်း၊ အဖျားငွေ့ငွေ့တက်ခြင်း၊ ကာကွယ်ဆေးနှင့် ဓါတ်မတည့်သော ခလေးများ မူးဝေခြင်း၊ သတိလစ်ခြင်းတို့ဖြစ်ပွါးနိုင် ကြောင်းလည်းဖော်ပြထားသည်။
“ ဆေးထိုးနေရင်း မူးတာတော့ရှိတယ်။ ဒါမယ့်ခနနားပြီးတော့ သက်သာသွားတယ်။ ကျမတို့ဆီမှာတော့ သေတဲ့အထိတော့မရှိဘူး ” ဟုလည်း သျှမ်းပြည်တောင်ပိုင်းကျေးသီးဆေးရုံမှ ဆရာဝန်က ပြောသည်။
ဂျပန်ဦးနှောက်ယောင်ရောဂါသည် ပျောက်ကင်းအောင် ကုသည်နိုင်သည့်ဆေးမရှိသေးကြောင်း၊ သို့သော် မဖြစ်ပွားအောင် ကာကွယ်ဆေး ထိုးပြီး ကာကွယ်နိုင်ကြောင်း၊ အဆိုပါရောဂါ ပိုး (ဗိုင်းရပ်စ်) ကူးစက်ခံရသူ ၈၀ ရာခိုင်နှုန်းမှာ သေဆုံးကြောင်း၊ မသေဆုံးခဲ့ပါကလည်း ဦးနှောက် ကျုံ့သွားပြီး စဉ်းစားဉာဏ် မှတ်ဉာဏ်အထူးအားနည်းသူများ၊ ကိုယ်လက်အင်္ဂါမသန်မစွမ်းသူများ ဖြစ်သွားကြောင်း ဆရာဝန်များ ပြောပြချက်အရသိရသည်။
ဂျပန်ဦးနှောက်ယောင် ကာကွယ်ဆေးကို နိုဝင်ဘာလ ၁၃ ရက်မှ ၂၅ ရက်အထိ တကြိမ်နှင့် ဒီဇင်ဘာလ ၁၁ ရက်မှ ၂၀ ရက်နေ့အထိတကြိမ် သက်ဆိုင်ရာ မြို့နယ် ရပ်ရွာ၏ ကျောင်းများတွင်ဆေးထိုးနှံပေး မည်ဖြစ်ကြောင်းသိရပါသည်။
Leave a Comments