သျှမ်းပြည်မြောက်ပိုင်း ပန်ဆန်းမြို့၌ ကျင်းပသည့် သျှမ်းနှစ်သစ်ကူးပွဲတော်အား ဗုဒ္ဓဘာသာ အလံသာ ထူခွင့်ပေးပြီး ဆိုင်းဘုတ်တွင်သော်လည်းကောင်း၊ တိုင်ဖြင့်သော်လည်းကောင်း ထူထားသည့် သျှမ်းပြည်နယ်အလံအား ဖြုတ်ချရန် ၀ အာဏာပိုင်များက ပွဲဖြစ်မြောက်ရေးကော်မတီအား ညွှန်ကြား ထားသည်ဟုသိရသည်။

နိုဝင်ဘာ ၁၉ ရက်နေ့တွင် ကျရောက်မည့် ၂၁၁၂ ကြိမ်မြောက် သျှမ်းရိုးရာ နှစ်သစ်ကူးပွဲတော်အား သျှမ်းပြည် အနယ်နယ် အရပ်ရပ် နှစ်သစ်ကြိုဆိုပွဲကျင်းပသကဲ့သို့၊ ပန်ဆန်းမြို့နယ်အတွင်းရှိ သျှမ်းလူမျိုးများကလည်း ကောင်းမူးလုံ၌ ကျင်းပကြောင်း၊ သို့သော် သျှမ်းပြည်နယ်အလံအား လွှင့်ထူခြင်း မပြုရန် ဝ အာဏာပိုင်များက တားမြစ်ထားကြောင်း ပွဲဖြစ်မြောက်ရေးကော်မတီဝင်တဦးက ဤကဲ့သို့ပြောသည်။

“ပွဲစင်မြင့်ပေါ် နောက်ခံ ပန်းချီအလှပြင်ဆင်မှုမှာ လူငယ်တွေက ဝါ စိမ်း နီ နဲ့ အလယ် လဝန်းပါ သျှမ်းပြည်နယ်အလံလုပ်ထားတယ်။ လ ဝန်း မထည့်ပဲ ဝါစိမ်းနီဘဲရေးဖို့ ပြင်ခိုင်းတယ်။ ပန်ဆန်းမြို့ရဲ့နောက်မှာ ၀ ပြည်နယ် ဆိုတဲ့ စကားလုံးပါထည့်ရေးခိုင်းတယ်။ ပွဲဧရိယာအတွင်း အလံ တိုင်စိုက်ထူ ခွင့်ကတော့ ပြီးခဲ့တဲ့ ၃-၄ နှစ်ကတည်းက ဟန့်တားထားတော့ ဒီနှစ်လဲ မရှိဘူး” – ဟု ပန်ဆန်းမြို့နယ်အတွင်းနေ သျှမ်းအမျိုးသား တဦးကပြောသည်။

UWSA ၀ တပ်ဖွဲ့ထိန်းချုပ်ထားသည့် ပန်ဆန်း၊ မိုင်းမော၊ ပန်ဝိုင်၊ နားဖန်း မြို့နယ် တွင် ပန်ဆန်းမှ လွှဲ၍ ကျန်မြို့နယ်များ သျှမ်းနှစ်သစ်ကူးပွဲတော် ကျင်းပခွင့်မပေး ဟု ဆိုသည်။

သျှမ်းအမျိုးသားနှစ်သစ်ကူးပွဲတော် ကျင်းပခွင့်နှင့်ပတ်သက်ပြီး ပန်ဆန်းမြို့လုံခြုံရေး တာဝန်ကျ ၀ အရာရှိတဦး က – “ကျနော်တို့ ၀ ပြည်နယ် မှာ တန်းတူ အခွင့်အရေး အားလုံးပေးထားတယ်။ ဒီလူမျိုးက ဒီလိုလုပ်ရင် ဟိုလူမျိုးလည်း တမျိုးထပ်လုပ်လိုမယ်။ အဲလိုဆိုရင် ညီညွတ်ရေးကို ထိခိုက်စေမယ်။ ကျနော်တို့ မပေးလို့မဟုတ်ဘူး။ ပေးတယ်။ သျှမ်းစာတွေလဲ ရေးခွင့်ပြုထားတာဘဲ” – ဟု သျှမ်းသံတော် ဆင့်သို့ပြောသည်။

“အလံကတော့ သာသနာအလံကလွဲလို့ ပေးမသုံးဘူး။ တိုင်စိုက်ထူခွင့်မပေးဘူး။ နှစ်သစ်ကြိုတဲ့ အချိန် ၁၈ ရက်နေ့ ညသန်းခေါင်ယံ ၁၉ ရက်နေ့အကူး သျှမ်းနှစ်သစ်ကူးနေ့ ကိုကြိုဆိုဖို့တော့ လက်ကိုင် အလံငယ်လေးတွေ ကိုင်ပြီး ဝှေ့ယမ်းလို့ရတယ်တဲ့။ ဘာဖြစ်ဖြစ် နှစ်သစ်ကူး ဆိုတော့ လွတ်လွတ်လပ်လပ်ပျော်ရွှင်ခွင့်တော့ပေးသင့်တယ်။ နိုင်ငံရေးလဲ မဟုတ်ဘူးလေ” – ဟု ပွဲဖြစ်မြောက်ရေး ကော်မတီ ဝင် တဦးက ပြောသည်။

သျှမ်းနှစ်သစ်ကူးပွဲတော်အား တရုတ်နိုင်ငံ တယ်ဟုန်(တိုင်ခုံး) ကိုယ်ပိုင်အုပ်ချုပ်ခွင့်ရ မြို့တော် မိုင်းခွန် (မံစီ) မြို့တွင်လည်းကောင်း၊ ထိုင်းနိုင်ငံ ဘန်ကောက်၊ ချိန်းမိုင် တို့အပြင် မလေးရှား၊ စင်္ကာပူ၊ အမေရိကန်၊ အင်္ဂလန် တို့တွင်လည်း အသီးသီးကျင်းပကြသည်။

နန်ချိုနိုင်ငံ စဝ်အူးတိန်ဖှ သားတော် စဝ်ခွန်ဟောင် ခေါ် စဝ်ခွန်ယီ က မဇ္ဇျိမဒေသမှ ဗုဒ္ဓဘာသာ ၊ ဗုဒ္ဓကျမ်းကန်ကို မောသျှမ်းမြေသို့ ပင့်ဆောင်ရောက်ရှိသည့်နှစ်၊ ဗုဒ္ဓသာသနာ နှစ် ၄၅၀ က ရှိနေသည့် သျှမ်းသက္ကရာဇ်ဟောင်းကိုဖြိုဖျက်ကာ သျှမ်းနှစ်အသစ် ပြန်စလာသည်မှာ ယနေ့ နှစ်ပေါင်း ၂၁၁၂ ရှိလာပြီဟု သျှမ်းသမိုင်းပညာရှင်များကရေးသားသည်။