သျှမ်းပြည်မြောက်ပိုင်းတွင် အစိုးရတပ်မတော် တပ်စခန်းအတွင်း ပစ်ခတ်မှုဖြစ်ပွား လားဟူပြည်သူ့စစ် ၂ ဦးသေ

0

သျှမ်းပြည်မြောက်ပိုင်း တန့်ယန်းမြို့အတွင်း ပူးတွဲ တပ်စခန်းချနေထိုင်သည့် အစိုးရတပ်မတော်က ဒေသခံ လားဟူပြည်သူစစ် နှင့် အခင်းဖြစ်ပွါးပစ်ခတ်တိုက်ခိုက်ကြရာ လားဟူ ပြည်သူ့စစ်တပ်ဖွဲ့ဝင် ၂ ဦးသေဆုံးကြောင်းသိရသည်။

ဂျန္နဝါရီလ ၁ ရက်နေ့ ညနေ ၄.၃၀ နာရီအချိန် တန့်ယန်းမြို့ တောင်ဘက် မိုင်းကောဝ် ခလရ ၃၃ လက်အောက်ခံ နမ့်တုမ်းအခြေစိုက်တပ်က စခန်းစောင့် လားဟူပြည်သူ့စစ်တပ်သား အား ပစ်ခတ်ခဲ့ကြောင်း၊ လားဟူပြည်သူ့စစ်တယောက်က ပြည်လည်ခုခံ သည့်အတွက် တနာရီခန့် ပစ်ခတ်မှုဖြစ်ပွါးရာ အစိုးရတပ်ဘက် ၁ ယောက်သေဆုံးကာ တယောက်ဒဏ်ရာ ရရှိသည်ဟု နီးစပ်သည့် ဒေသခံများပြောပြချက်အရ သိရသည်။

“ဗမာစကားပြောတာမပီလဲ ဟာသလုပ်ပြီး သရော်တယ်။ စိတ်ဆိုးရင်လဲ အဖေ အမေ ကိုထိပြီး ဆဲတယ်။ သေနတ်ထိုးချိန်ပြီး ခြိမ်းခြောက်သလိုလိုနဲ့ တကယ်ပစ်တာ။ နှစ်ယောက်ကပွဲချင်းပြီး သေတယ်။ တယောက်က ခုခံပစ်ခတ်တော့ တနာရီလောက် ပစ်ခတ်သံကြား ရတယ်” – ဟု တန့်ယန်းမြို့ပေါ်ရောက် လားဟူပြည်သူ့စစ် တဦးကပြောသည်။

နမ့်တုမ်းတပ်စခန်းတွင် စစ်သား ၁၁ ဦး ရှိသည့်အနက် ပြည်သူ့စစ် လားဟူအမျိုးသား ၃ ဦး၊ အစိုးရ တပ်မတော်သား ၈ ဦး ရှိသည်။ အပြန်အလှန်ပစ်ခတ်မှုကြောင့် အစိုးရတပ်မတော်သား တဦးသေ တဦး ဒဏ်ရာရှိကြောင်း၊ သီးခြားအတည်ပြုချက်မရသေးသည့်သတင်းအရ တန့်ယန်းသို့ ပို့ဆောင်ဆေးကု သည့် ဒဏ်ရာရ အစိုးရ တပ်မတော်သား တဦးလည်း သေဆုံးသွားကြောင်း ပြောသည်။

တဖက်တွင်လည်း အတည်ပြုချက်မရသေးသည့်သတင်းအရ အဆိုပါပစ်ခတ်မှုဖြစ်ပွါးရခြင်းမှာ – စစ်ရေးတင်းမာနေသည့် သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA အား တိုက်ခိုက်ရန် အစိုးရတပ်မတော်က လားဟူပြည်သူ့စစ်တပ်ဖွဲ့အား ဖိအားပေးရာ လားဟူပြည်သူ့စစ်က- သျှမ်းပြည်သား အချင်းချင်းမို့ မတိုက်လိုကြောင်း ငြင်းဆိုရာ တယောက်တခွန်း ပြောဆိုငြင်းခုံရာမှ ပစ်ခတ်မှုအဆင့်ဖြစ်ပွားခဲ့ခြင်းဖြစ်သည်ဟု ကြားသိရသည်။

မိုင်းရှူးမြို့နယ် ပတ္တမြားတောင်ပေါ် နှင့် မိုင်းရယ်မြို့နယ်အတွင်းတို့တွင် အစိုးရတပ်မတော် မှ သျှမ်းပြည်တပ်မတော် တပ်စခန်းများအား၂၀၁၇ ဒီဇင်ဘာ ၃၁ ရက် မှ ၂၀၁၈ ဂျန္နဝါရီ ၁ ရက်နေ့ အထိ အင်အားသုံးတိုက်ခိုက်ကြောင်း၊ လက်ရှိတွင်လည်း စစ်ရေးတင်းမာလျှက်ရှိကြောင်းကြားသိရသည်။

တန့်ယန်းမြို့နယ်အတွင်း အစိုးရတပ်မတော် ၊ ရဲတပ်ဖွဲ့၊ ကာကွယ်ရေးရဲ အမည်ရ လားဟူ ပြည်သူ့စစ်တပ်ဖွဲ့များ လှုပ်ရှားလျှက်ရှိပါသည်။ မိုင်းကောဝ်၊ နမ့်တုမ်း တပ်စခန်းကဲ့သို့ တခြားတပ်စခန်း များတွင်လည်း လားဟူပြည်သူ့စစ်နှင့် အစိုးရ တပ်မတော် တို့ရှိသည်။

SHARE

LEAVE A REPLY

Please enter your comment!
Please enter your name here