သျှမ်းပြည်မြောက်ပိုင်း မူစယ်ခရိုင် နမ့်ခမ်းမြို့နယ် မန့်ပန်ကျေးရွာဒေသခံတဦး လယ်ထဲတွင် မြေမြုပ်မိုင်းနင်းမိသဖြင့် ဒဏ်ရာအပြင်းအထန်ရရှိခဲ့ကြောင်းသိရသည်။
အောက်တိုဘာလ ၂၁ ရက်နေ့ နံနက် ၁၀ နာရီအချိန်က နမ့်ခမ်းမြို့နယ် မန့်ပန်ကျေးရွာနေ တားအိုက်ယိုင် ခေါ် ကွန်းအိုက်အောင် ဆိုသူသည် ၄င်း၏လယ်အတွင်း လုပ်ငန်းခွင်ဝင်နေစဉ် ပေါက်ပြားဖြင့်ပေါက်မိသဖြင့် မိုင်းကွဲကာ ဒဏ်ရာအပြင်းအထန်ရရှိခဲ့ခြင်းဖြစ်ကြောင်းသိရသည်။
နမ့်ခမ်းမြို့ခံ စိုင်းအိုက်နော် က ” တားအိုက်ယိုင် က လယ်ဆင်းပြီးလယ်ကန်သင်းဖောက်တော့ အဲ့မှာ မိုင်းသွားပေါက်မိတာ။ မိုင်းကွဲတော့ ခြေထောက်တွေ လက်တွေထိတယ်။ လည်ပင်းနဲ့နံရိုးမှာလည်းထိတယ်။ ဒဏ်ရာပြင်းထန်တယ်။ သူ့ကို အခု နမ့်ခမ်းဆေးရုံပို့ထားတယ်။ သတိတောင်မရသေးဘူး“ -ဟု သျှမ်းသံတော်ဆင့်အားပြောသည်။
အဆိုပါဒေသတွင် အစိုးရတပ်မတော်၊ မြောက်ပိုင်းမဟာမိတ်တပ်ဖွဲ့ ၊ RCSS/SSA နှင့်ပြည်သူ့စစ်တပ်ဖွဲ့ တို့လှုပ်ရှားကြောင်း သိရသည်။ သို့သော် မည်သည့်တပ်ဖွဲ့၏လက်ချက်ဖြစ်သည်ကိုမူ မသိရသေးပေ။
