သျှမ်းပြည် သိန္နီမြို့နယ် မိုင်းပါးကျေးရွာအုပ်စုတွင် တပ်စွဲထားသည့် TNLA တပ်သား ၅၀ ခန့်ကို ကိုးကန့်တပ်ဖွဲ့ MNDAA မှ ဝင်ရောက်ဖမ်းဆီးခဲ့ပြီး လားရှိုးမြို့ဘက် ကားတင်ပို့ဆောင်ခဲ့ကြောင်း စုံစမ်းသိရသည်။

ယမန်နေ့ (ဖေဖော်ဝါရီလ ၁၇ ရက်) ည ၆ နာရီခန့်တွင် သိန္နီမြို့နယ် မိုင်းပါးကျေးရွာအုပ်စုတွင် တပ်စွဲထားသည့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA စစ်အင်အား ၅၀ ခန့်ကို ကိုးကန့်တပ်ဖွဲ့ ( MNDAA) ဘက်မှ အင်အားသုံး ဝင်ရောက်ဖမ်းဆီးခဲ့ပြီး လားရှိုးမြို့နယ် အီနိုင်းကျေးရွာဘက်သို့ ကားတင်ပို့ဆောင်ခဲ့ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“မနေ့ညက သိန္နီထဲက မိုင်းပါးရွာဘက် ရောက်နေတဲ့ TNLA စစ်သားတွေကို ကိုးကန့်ဘက်က ဖမ်းပြီးတော့ ကားတင်ခေါ်သွားတယ်။ ကိုးကန့်ဘက်က ကားတင် ဖမ်းသွားတဲ့ ပလောင်စစ်သား ၅၀ လောက်ကို ည ၉ နာရီလောက်မှာ လားရှိုးနားက အီနိုင်းရွာဘက် သွားချပေးတယ်လို့ ပြောတယ်” ဟု လားရှိုးမြို့မှ အဆိုပါ စစ်ရေးသတင်းရင်းမြစ်က ပြောသည်။

သိန္နီမြို့နယ်ထဲတွင် တပ်စွဲထားသည့် TNLA တပ်သားများကို MNDAA ဘက်မှ ဖမ်းဆီး၍ မိုင် (၄၀) ခန့် ကွာဝေးသည့် လားရှိုးမြို့နယ် အီနိုင်းကျေးရွာဘက် ကားတင်ပို့ဆောင်ခဲ့သည့် ဖြစ်စဉ်နှင့် ပတ်သက်၍ TNLA ပြောရေးဆိုခွင့်ရှိသူ လွေးယေဦးထံ အတည်ပြု မေးမြန်းနိုင်ရန် သျှမ်းသံတော်ဆင့်မှ ဆက်သွယ်မေးမြန်းခဲ့သော်လည်း လက်ရှိအချိန်ထိ ပြန်လည်ဖြေကြားခြင်း မရှိသေးပါ။

ထိုသို့ အငြင်းပွားမှု ဖြစ်ပွားပြီးနောက် နမ္မတူမြို့ဘက်မှ TNLA စစ်အင်အား ၃၀၀ ကျော်သည် သိန္နီမြို့နယ် မိုင်းပါးကျေးရွာအုပ်စုဘက်သို့ ညတွင်းချင်း ချီတက်သွားခဲ့ပြီး လက်ရှိတွင် နှစ်ဘက်တပ်ဖွဲ့ကြား စစ်ရေးတင်းမာနေကြောင်း ဒေသခံများထံမှ သိရသည်။

“အဲ့ဒါဖြစ်ပြီးတော့ TNLA ဘက်က ညတွင်းချင်း စစ်အင်အား ၃၀၀ ကျော်နဲ့ နမ္မတူဘက်ကနေ မိုင်းပါး တက်သွားတယ်။ သူတို့မဟာမိတ်တပ် အချင်းချင်းတော့ အခုထက်ထိ နှစ်ဘက်စစ်ရေး တင်းမာနေတုန်းပဲ။ ဒေသခံတွေကတော့ ဒီနေ့ ရွာစင် တက်တဲ့ ပွဲရှိနေတော့ ပုံမှန်လိုပဲ သွားလာနေတယ်” ဟု သိန္နီဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယင်းမတိုင်မီ ဖေဖော်ဝါရီလ ၁၃ ရက် ညပိုင်းတွင် ကွတ်ခိုင်မြို့ပေါ်ရှိ MNDAA အုပ်ချုပ်ရေးရုံးများကို TNLA ဘက်မှ အင်အားသုံး ဝင်ရောက်စီးနင်းခဲ့ကာ MNDAA အလံနှင့် ညစောင့်တပ်သားများကိုပါ ယူဆောင်ဖမ်းဆီးသွားခဲ့ပြီး ဈေးအနီး ဆောက်လုပ်ရေးဝင်းတွင် တပ်စွဲထားသည့် MNDAA ရုံးနေရာတွင်လည်း ရုန်းရင်းဆန်ခတ်ဖြစ်၍ သေနတ်ပစ်ဖောက်မှု ဖြစ်ပွားခဲ့သည်။

တရုတ်နှစ်သစ်ကူးကာလ ရောက်ရှိနေစဉ် ကွတ်ခိုင်မြို့ရှိ ကိုးကန့်တပ် MNDAA အုပ်ချုပ်ရေးရုံးများကို TNLA ဘက်မှ ဝင်ရောက်စီးနင်းခဲ့ပြီးနောက် လားရှိုး-သိန္နီကြားရှိ ရေပူစစ်ဆေးရေးဂိတ် အနီးတွင် MNDAA ဘက်မှ ခရီးသည်ယာဉ်များကို လက်နက်ခဲယမ်းများ တင်ဆောင်မှု ရှိ၊ မရှိ စစ်ဆေးတင်းကြပ်ခဲ့ကြောင်း ခရီးသွားများက ပြောသည်။

ညီနောင်မဟာမိတ်တပ်များ ဖြစ်ကြသည့် TNLA နှင့် MNDAA တို့သည် “၁၀၂၇ စစ်ဆင်ရေး”နောက်ပိုင်း ကွတ်ခိုင်မြို့ကို ပြည်ထောင်စုလမ်းမကြီး တစ်ဘက်တစ်ခြမ်းစီ ပူးတွဲအုပ်ချုပ်နေပြီး အချင်းချင်းကြား နယ်မြေခွဲဝေမှု ပြဿနာများ မကြာခဏ ဖြစ်ပွားနေကြောင်း ဒေသခံများထံမှ သိရသည်။