သျှမ်းပြည်တောင်ပိုင်း၊ ဟိုပုံးမြို့နယ် မဲနယ်တောင်ဒေသတွင် သနပ်ဖက်ခြံစောင့်သူ ၃ဦးသည် တောင်ကျရေကြောင့် မျှောပါပြီး သေဆုံးသွားကြောင်း စုံစမ်းသိရသည်။
ယမန်နေ့ (စက်တင်ဘာလ ၁၉ ရက်)တွင် ဟိုပုံးမြို့နယ် တောင်ယာ၊ သနပ်ဖက်ခြံသို့ သွားရောက် အိပ်စောင့်သည့် အရပ်သား ၃ဦးသည် တောင်ကျရေကြောင့် မျှောပါပြီး အသက်ဆုံးရှုံးသွားကြောင်း၊ ထို ၃ဦး၏ အလောင်းကို တောင်ပြိုကျသည့် နေရာလက်ရှိ ပြန်တွေ့ထားကြောင်း အလောင်းသွားရောက်ထုတ်သည့် အမျိုးသားတစ်ဉီးက သျှမ်းသံတော်ဆင့်ကို ပြောသည်။
ထိုသေဆုံးသူ ၃ဦးသည် တလျနွိုးရွာက လင်မယား ၂ ဦးနှင့် ကျောက္ကချားရွာက အမျိုးသား ၁ ဦး တို့ဖြစ်ကြသည်။
“ မနေ့က ခြံသွားရင်း တောင်ပြိုတဲ့နေရာကိုဖြတ်သွားတော့ အလောင်းတွေ့လိုက်တယ်။ ဆယ်ထုတ်လိုက်တော့ တလျနွိုးရွာက လင်မယား ၂ ဦးနဲ့ ကျောက္ကချားရွာက အမျိုးသား ၁ ဦး သေသွားတယ်။ ဘယ်နေ့ကတည်းက မြေဖိုပြီးသေတာတော့ အသိအကျမသိဘူး။ သူတို့အမျိုးတော့ခြံသွားစောင့်တယ်ပြောတယ် “ ဟု ၎င်းကပြောသည်။
မဲနယ်တောင်ဒေသသည် သနပ်ဖက်လုပ်ငန်းကိုသာ အဓိကစိုက်ပျိုးသည့် ဒေသတစ်ခုလည်းဖြစ်သည်။
မဲနယ်တောင် ဒေသခံများသည် ရေကြီး၊ တောင်ပြိုကျမည်ကို သိရှိသော်လည်း မိသားစုစားဝတ်နေရေးအတွက် ရှာဖွေလုပ်ကိုင်နေရသည်ဟုဒေသခံတစ်ဦးက ပြောသည်။
ဟိုပုံးဒေသ စိုက်ပျိုးသည့် သနပ်ဖက်စိုက်တောင်သူများသည် တောင်ကြီးဘက်သို့ သနပ်ဖက်ကို အဓိကတင်ပို့ပြီး ပင်းတယနှင့်ဘော်ဆိုင်းဒေသဘက်မှ သနပ်ဖက်သည် ပဲခူးတိုင်းဒေသကြီး ဝေါမြို့ ရှိ ဆေးလိပ်ခုံများရှိရာကို အဓိကတင်ပို့ကြသည်။
“ ဒီဘက်မှာ သနပ်ဖက်ကိုပဲ အဓိကလုပ်ကြတယ်လေ။ ရေကြီး တောင်ပြိုတာလည်းသိကြတယ် ဒါမဲ့ စားဝတ်နေရေးအတွက် ထွက်ရှာနေရတယ်။ သတိထားခြင်းမရှိတော့ ခုလို တောင်ပြို ရေကြီးထဲမျောပါကြတယ်” ဟု ၎င်းကပြောသည်။
ပြီးခဲ့သည့် (စက်တင်ဘာလ ၁၁ ရက်)မှစပြီး မဲနယ်တောင်ဒေသဘက်တွင် မိုးသည်းထန်စွာရွာသွန်းပြီး တောင်ကျချောင်းရေကြောင့် ရေကြီး၊မြေပြိုမှုဖြစ်ကာ စံဖူးကျေးရွာအုပ်စုတွင် နေအိမ်(၈၀)နီးပါးပျက်စီးပြီး သေဆုံးသူ (၁၉)ဦး ရှိကြောင်းသိရသည်။
လက်ရှိမဲနယ်တောင်ဒေသတွင် စစ်မှုထမ်းဥပဒေထွက်ပြီးနောက်ပိုင်း လူငယ်အများစုမှာ ပြည်ပရောက်ကုန်တာကြောင့် ကျေးရွာများတွင်သက်ကြီးရွယ်အိုများသာ ကျန်တာကြောင့် ပိုပြီးစိတ်ပူကြောင်း ထပ်လောင်းပြောသည်။
မဲနယ်တောင်ဒေသတွင် ကယ်ဆယ်ရေးနှင့် စားနပ်ရိက္ခာအလှူရှင် များစွာလိုအပ်နေကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments