သျှမ်းပြည် အရှေ့ပိုင်းတွင် ဆိုးရွားစွာ ရေကြီးမြေပြိုမှု ကြုံရသည့် ကြား ကုန်စိမ်းများ သုံးဆထိ စျေးတင်ရောင်းချမှု ရှိနေကြောင်း ဒေသခံများပြောပြချက်အရသိရသည်။
မြန်မာ-ထိုင်းနယ်စပ် တာချီလိတ်မြို့တွင် မယ်ဆိုင်ချောင်းရေများ မြင့်တက်လာပြီး ရေကြီးမှုဖြစ်ပွားခဲ့သကဲ့သို့ ထိုင်းနိုင်ငံမယ်ဆိုင်ဘက်တွင်နည်းတူ ရေကြီးမှုကြုံခဲ့ရသည်။
ထိုင်းနိုင်ငံမယ်ဆိုင်မြို့ဘက်ခြမ်းမှ နေ့စဉ် ကုန်စိမ်း၊ အသား၊ ငါးများကို ဝယ်ယူ၍ မြန်မာ-ထိုင်း ချစ်ကြည်ရေးအမှတ် (၁) တံတားမှတဆင့် တာချီလိတ်မြို့တာလေမြို့ ၊ မိုင်းဖြတ် နှင့် ကျိုင်းတုံမြို့ထိ တင်သွင်းရောင်းချရသည်။
ထိုရေကြီးမှုကြောင့် လက်ရှိမှာ မြန်မာ-ထိုင်းချစ်ကြည်ရေး အမှတ်(၁)တံတားကို ကားများပေးမဖြတ်သေးဘဲ လမ်းလျှောက်သွားလာနေရသဖြင့် တာချီလိတ်-တာလေ-မိုင်းဖြတ်-ကျိုင်းတုံတွင် ကုန်စိမ်းများ ပြတ်လပ်မှု ရင်ဆိုင်ကြုံတွေ့နေရသည်။
“ ဒီဘက် ကုန်စိမ်းတွေက ထိုင်းဘက်က တင်သွင်းလာတာ။ အခု အဲ့ဘက်လည်း ရေကြီးတော့ ဘာကုန်မှ သွင်းလို့မရဘူး။ စားသောက်ကုန်တွေလည်းမရတော့ တော်တော်ခက်တယ်။ အရင် ၅ဘတ်တန်တွေ အခု ၂၀ဘတ်၊ ၃၀ဘတ်ထိ တင်ရောင်းကြတယ်” ဟု ကျိုင်တုံမြို့ ဒေသခံ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။
ထိုင်းနိုင်ငံဘက်လည်း ရေကြီးမှုဖြစ်သော်လည်း သက်ဆိုင်ရာ အာဏာပိုင်များက ကူညီဖြေရှင်းပေးကာ စားစရာထောက်ပံ့မှုပေးခဲ့သော်လည်း မြန်မာဘက်ခြမ်းတွင် ကိုယ်နည်းကိုယ့်ဟန်ဖြင့်သာ ဖြေရှင်းနေရကြောင်း တာချီလိတ်မြို့ခံအမျိုးသားတစ်ဉီး က သျှမ်းသံတော်ဆင့်ကိုပြောသည်။
လက်ရှိတွင် တာချီလိတ်မြို့ အချို့နေရာတွင် ရေပြန်ကျသွားသော်လည်း မယ်ဆိုင်မြစ်ဘေး အနိမ့်ပိုင်းဖြစ်သည့် ဆန်ဆိုင်းရပ်ကွက်၊ မဲခေါင်၊ တာလော့တွင် ရေမကျသေးပေ။
“ ရေကျတဲ့နေရာတွေမှာတော့ ရွှံ့နွံတွေကျန်ခဲ့တယ်။ ဒီတခါရေစီးအားအရမ်းသန်တော့ မီးတိုင်တွေလည်း လှဲတယ်။ အခု ရွှံ့တွေက ဒူးလောက်ရှိတော့ သန့်ရှင်းရေးလုပ်ရတာ ခက်တယ်” ဟု ၎င်းအမျိုးသားကဆိုသည်။
အလားတူ မိုင်းတုံမြို့၊ မိုင်းဆတ်မြို့ တွင်လည်း ရေကြီးရေလျှံ၍ ရေတိုက်စားမှုကြောင့် တံတားများ၊ ဆက်သွယ်ရေးဖုန်းတိုင်များ ပျက်စီးသွားပြီး လမ်းပန်းဆက်သွယ်ရေးများ နှင့်ဖုန်းလိုင်းများလည်း ပြတ်တောက်နေကြောင်း သိရသည်။
ယခုနှစ် သျှမ်းပြည်အရှေ့ပိုင်းနှင့် သျှမ်းပြည်တောင်ပိုင်း ရေကြီးမှုသည် အကြီးမားဆုံးဖြစ်ပြီး ဆုံးရှုံးမှုအများဆုံး ရင်ဆိုင်ရသည့် နှစ်သည်။
ထိုကဲ့သို့ ရေကြီးမှုသည် သစ်ထုတ်လုပ်မှု၊ ရွှေတူးဖော်ရေးလုပ်ငန်း၊ ကျောက်မီးသွေးတူဖော်ရေး လုပ်ငန်းများကို လုပ်ကိုင်တူးဖော်ချိန်တွင် သစ်ပင်များကိုသာ အဓိကထားပြီး ခုတ်ပစ်ခြင်းကြောင့် ရေကြီး၊ ရေလျှံမှုများ မထိန်းနိုင်သည့်အတွက် ရေစီးဆင်းမှုနှုန်းကို ပိုမိုလျင်မြန်လာခြင်းဖြစ်ကြောင်း သဘာဝပတ်ဝန်းကျင်လုပ်ဆောင်သူများက ပြောဆိုလိုက်သည်။
Leave a Comments