သျှမ်းပြည်မြောက်ပိုင်း ကျောက်မဲခရိုင် မိုင်းငေါ့မြို့နယ်အတွင်း မိုးသည်းထန်စွာရွာသွန်းမှုနှင့်အတူ ဖြစ်ပွားခဲ့သည့် ရေနစ်မှုနှင့် မြေပြိုမှုဖြစ်စဉ်များကြောင့် ရက်ပိုင်းအတွင်း ဒေသခံ ၂ ဦး သေဆုံးခဲ့ကြောင်း သတင်းရရှိသည်။

ပြီးခဲ့သည့် ဩဂုတ်လ ၅ ရက်နေ့က မိုင်းငေါ့မြို့နယ် ဟဲခမ်းကျေးရွာရှိ နမ့်မီချောင်းအတွင်း သူငယ်ချင်းများနှင့်အတူ ရေဆင်းကစားရာမှ ပျောက်ဆုံးသွားခဲ့သည့် အသက် ၁၅ နှစ်အရွယ် မောင်မျိုးမြင့်စိုင်း၏ ရုပ်အလောင်းကို ၁၈ ရက်အကြာ ရှာဖွေပြီးနောက် သြဂုတ်လ ၂၃ ရက်နေ့တွင် ချောင်းဘေးရှိ သစ်ပင်အောက်၌ ပြန်လည်တွေ့ရှိခဲ့ခြင်း ဖြစ်သည်။

အလားတူ ဟဲခမ်းကျေးရွာအနီးရှိ ရွှေလုပ်ငန်းခွင်တစ်ခုတွင်လည်း ဩဂုတ်လ ၂၀ ရက်နေ့က မြေပြိုကျမှုဖြစ်ပွားရာ ရွှေတွင်းအတွင်း မြေတူးဖော်နေသည့် အသက် ၃၇ နှစ်အရွယ် ဦးသက်ပိုင်စိုး မြေစာများအောက် ပိတ်မိကာ သေဆုံးခဲ့ပြီး၊ အပြင်ဘက်တွင် အလုပ်လုပ်ကိုင်နေသည့် ကိုကျော်ငြိမ်းမှာလည်း ထိခိုက်ဒဏ်ရာရရှိခဲ့သည်။

အဆိုပါ ဖြစ်စဉ်များနှင့်ပတ်သက်၍ တအာင်း(ပလောင်)အမျိုးသားလွတ်မြောက်ရေးတပ်မတော် PSLF/TNLA ၏ မြို့နယ်ရဲတပ်ဖွဲ့က သွားရောက်စစ်ဆေးခဲ့ပြီး သေဆုံးသူများ၏ ရုပ်အလောင်းကို မီးသင်္ဂြိုလ်ပေးခဲ့ကြောင်း သိရသည်။

မိုးရာသီကာလတွင် မိုးရေစိမ့်ဝင်မှုကြောင့် မြေသားပျော့လာပြီး မြေပြိုမှုအန္တရာယ်ဖြစ်နိုင်သလို၊ ချောင်းရေများလည်း အချိန်မရွေး မြင့်တက်လာနိုင်သည့်အတွက် မိဘများအနေဖြင့် ကလေးငယ်များကို အထူးဂရုစိုက်ရန်နှင့် လုပ်သားများအနေဖြင့်လည်း သတိထားလုပ်ကိုင်ကြရန် ဒေသအာဏာပိုင်များက တိုက်တွန်းထားသည်။

တချိန်တည်းမှာပင် အနောက်တောင်မုတ်သုံလေ အားကောင်းနေခြင်းကြောင့် လာမည့်ရက်များအတွင်း မြန်မာ၊ ထိုင်းနှင့် လာအိုနိုင်ငံတို့တွင် လေပြင်းတိုက်ခတ်ခြင်းနှင့် မိုးသည်းထန်စွာရွာသွန်းခြင်းများ ဖြစ်ပေါ်နိုင်ကြောင်း သက်ဆိုင်ရာ မိုးလေဝသဌာနများက ခန့်မှန်းထားသည်။

လက်ရှိတွင် ဧရာဝတီတိုင်းနှင့် ကရင်ပြည်နယ်အပါအဝင် မြန်မာနိုင်ငံအောက်ပိုင်းဒေသများ၌ ရေကြီးမှုများကြောင့် လူပေါင်း ၆၅,၀၀၀ ကျော် ရေဘေးသင့်နေကြောင်း ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) လက်အောက်ရှိ Reliefweb က ဩဂုတ်လ ၂၄ ရက်နေ့တွင် ထုတ်ပြန်ထားသည်။

လာမည့်ရက်များအတွင်း ဘင်္ဂလားပင်လယ်အော်နှင့် ကပ္ပလီပင်လယ်ပြင်တို့တွင် အနောက်တောင်မုတ်သုံလေ ဆက်လက်အားကောင်းနိုင်သည့်အတွက် မြန်မာနိုင်ငံအတွင်းရှိ ရေကြီးနေသည့် ဧရာဝတီမြစ်ဝကျွန်းပေါ်ဒေသများ၌ မိုးထပ်မံသည်းထန်နိုင်ကြောင်းနှင့် ဒေသခံများအနေဖြင့် သဘာဝဘေးအန္တရာယ်ကို အထူးသတိပြုကြရန်လည်း အဆိုပါအဖွဲ့က သတိပေးထားသည်။