မြန်မာတဝှမ်း မိုးဆက်တိုက်ရွာသွန်းမှုကြောင့်နေရာအနှံ့ ရေကြီးမှုဖြစ်ပွာနေပြီး ထိုထဲတင် တောင်ပေါ်ဒေသ ကလောမြို့လည်း အပါအဝင်ဖြစ်သည်။​

ယမန်နေ့ ဩဂုတ်လ (၁၀) ရက်နေ့တွင် မိုးအဆက်မပြတ်ရွာသွန်းမှုကြောင့် ကလောချောင်းရေ လျှံ၍ ကလောမြို့ ရပ်ကွက် (၁၊၂၊၃၊၄) ဘက်တွင် ရေကြီးရေလျှံမှု ဖြစ်ပွားခဲ့သောကြောင့် လူဦးရေ ၂၀၀ ကျော် ရေဘေးသင့်၍ ဘေးလွတ်ရာသို့ ရွှေ့ပြောင်းခဲ့ရသည်။

ထိုသို့ ရေကြီးရေလျှံမှု ဖြစ်ပွားပြီးနောက် ယနေ့ ဩဂုတ်လ (၁၀) ရက်နေ့အထိ ချောင်းရေများ အဆက်မပြတ် စီးဝင်နေပြီး ရေအနည်းငယ်သာ ပြန်ကျသေးသောကြောင့် ရေဘေးသင့် ပြည်သူများအတွက် အဝတ်ထည်နှင့် စောင်များ အကူညီလိုအပ်နေကြောင်း သိရသည်။

“ရေက တဖြေးဖြေးနဲ့ တက်လာတာ လူနေအိမ် တိုက်ပုဆိုရင် မြုပ်ကုန်ပြီ၊ ဒီနေ့အထိ ရေက စီးဝင်တုန်းဆိုတော့ မိုးက သိပ်မရွာပေမဲ့ ရေကနည်းနည်းပဲ ကျသေးတယ်၊ လောလောဆယ်တော့ ဘုန်းကြီးကျောင်းတွေ ဘက်မှာ မြို့ခံတွေကို နေရာချထားပေးတယ်”ဟု ရေဘေးကူညီ ကယ်ဆယ်မှု ဆောင်ရွက်နေသူ အမျိုးသားတစ်ဦးက ပြောသည်။

ကလောမြို့သည် တောင်ပေါ်မြို့ငယ်လေး ဖြစ်သော်လည်း တောင်ကျရေကြောင့် ရေကြီးရေလျှံမှု ဖြစ်နေသည်မှာ ၂၀၂၄ ခုနှစ်မှ ၂၀၂၆ ခုနှစ်အထိ သုံးနှစ်ဆက်တိုက် ရှိပြီ ဖြစ်သည်။

ထို့အပြင် အောင်ပန်း-ကလော သွားလမ်းမှ ကလောအဝင်ဘက်တွင် မြေပြိုနေသောကြောင့် လမ်းပန်းဆက်သွယ်ရေး အခက်ခဲ ဖြစ်နေပြီး ကလောမြို့ တောင်စောင်းများတွင်လည်း မြေပြိုမှုများ ဆက်တိုက် ဖြစ်ပေါ်နေကြောင်း သိရသည်။

“လမ်းမှာလည်း မြေပြိုနေလို့ ၃ နာရီလောက် စောင့်ခဲ့ရတယ်၊ ကလောအဝင်နားမှာ တောင်ပြိုနေတာ ၊ကလောမြို့တွင်းလည်း လမ်းဘေးနဲ့ တောင်စောင်းဘက်ဆို မြေပြိုနေတာ၊ တောင်စောင်းမှာ နေတဲ့ သူတွေတော့ ဂရုစိုက်ဖို့ လိုမယ် အရင်ကလည်း ကလောမှာ မြေပြိုလို့ လူတွေသေဖူးတော့ သူတို့လည်း စိုးရိမ်နေကြတယ်။”ဟု ကလောဘက်သို့ ကူညီကယ်ဆယ်ရေး လုပ်ငန်းများ သွားရောက် ကူညီသူ အမျိုးသားတစ်ဦးက ပြောသည်။

ကလောတွင် တောင်ကျရေစီးဆင်းမှုနှင့် မြေပြိုမှု ဖြစ်စဉ်များသည် သဘာဝ ပတ်ဝန်းကျင် ထိန်းသိမ်းရေး လုပ်ငန်းများ အရေးတကြီး ဆောင်ရွက်ရန် လိုအပ်နေပြီဟု သတိပေးနေပြီ ဖြစ်ကြောင်းနှင့် သစ်ပင်သစ်တောများကို စိုက်ပျိုး ထိန်းသိမ်း သင့်ကြောင်း အဆိုပါ အမျိုးသားက ပြောသည်။

ပြီးခဲ့သည့် ၂၀၂၄ ခုနှစ် ဩဂုတ်လတွင် ကလောမြို့၌ မကြုံစဖူး ရေကြီး ရေလျှံမှု ဖြစ်ပေါ်ခဲ့ပြီး တောင်စောင်းရှိ ကျေးရွာများသည် တောင်ကျရေကြောင့် နေအိမ်များ ပျက်စီးပြီး လူသေမှုအထိ ဖြစ်ပွားခဲ့သည်။