သျှမ်းပြည် မြောက်ပိုင်း နမ့်ခမ်းမြို့နယ်တွင် တစ်ပတ်ခန့်ကြာ ရွှေလီမြစ်ရေကြီးမှုကြုံနေရပြီး ရေမြှုပ်နေသည့် လယ်ယာမြေ ဧက ၁၀၀၀ ကျော်ထက်မနည်းရှိနေကြောင်း စုံစမ်း သိရသည်။

ပြီးခဲ့သည့် ဇူလိုင်လ ၁၈ ရက်မှစပြီး ရွှေလီမြစ်ရေတက်လာမှုကြောင့် ရေကြီးရေလျှံမှုများ ကြုံနေရသည့် နမ့်ခမ်းမြို့သည် ယနေ့( ဇူလိုင်လ ၂၃) ရက်ထိ ရေပြန်မကျသေးကြောင်း နမ့်ခံမြို့ဒေသခံ အသက် ၃၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“မိုးမရွာတာ နှစ်ရက်တော့ရှိပြီ။ ရေသိပ်မကျသေးဘူး။ တချို့ရွာတွေမှာလည်း သွားလာလို့ခက်ခဲနေတုန်းပါ။”ဟု နမ့်ခံမြို့ဒေသခံ အသက် ၃၀ ဝန်းကျင် အမျိုးသားတစ်ဦးက ပြောသည်။

လက်ရှိ နမ့်ခမ်းမြို့ မှ မန်ဝိန်းကြီးသို့ သွားသည့် လမ်းတလျှောက် ရွှေလီမြစ်နှင့် နီးစပ်သည့် ကျေးရွာများတွင် ရေဝင်ရောက်နေဆဲဖြစ်ပြီး သွားလာရန်ခက်ခဲနေသည့်အပြင် အသိဆွေမျိုးထံ ပြောင်းရွှေ့နေထိုင်နေကြရကြောင်း ၎င်းကဆက် ပြောသည်။

“ဒေသခံအချင်းချင်းပဲ ကူညီတာရှိတယ်။ ဘယ်အဖွဲ့အစည်းမှ လာကူညီတာမျိုးတော့ မရှိဘူး။ ရေမြှုပ်နေတဲ့ အိမ်တွေကတော့ အသိဆွေမျိုးတွေဆီမှာ ပစ္စည်းတွေ ရွှေ့ပြောင်းထားပြီး နေထိုင်နေကြတယ်။ စားသောက်ဖို့အတွက် ကူညီရေးအသင်းတွေ လာလှူပြီး ကူညီတာရှိတယ်” ဟု ၎င်းကဆိုသည်။

နမ့်ခမ်းမြို့နယ် တောင်ဘက်ခြမ်းရှိ ရွှေလီမြစ်နှင့် နီးစပ်သည့် ကျေးရွာများတွင် ရေကြီးမှုဒဏ် ပိုမိုခံနေရပြီး ရေကြီးမှုကြောင့် ရေမြှုပ်နေသည့် လယ်ယာမြေနှင့် သီးနှံစိုက်ခင်း ဧက ၁,၀၀၀ ထက်မနည်းရှိကြောင်း နမ့်ခမ်းဒေသခံ စိုင်းစိုင်းကပြောသည်။

“စိုက်ပါးစိုက်တဲ့ လယ်တွေ၊ပြောင်းခြံတွေ၊ကြံခင်းတွေကတော့ ရေမြုပ်နေတုန်း။ စာရင်း အဓိကျရဖို့ကလည်း သွားလာရေးခက်ခဲနေတော့ အဓိကျမရနိုင်သေးဘူး။ အရင်နှစ် ရေကြီးတုန်းကလည်း ဧက ၄၀၀၀ ဆိုတော့ အခုလည်း ၁၀၀၀ ထပ်မနည်းလောက်ပါဘူး။”ဟု ၎င်းကဆိုသည်။

ရေကြီးမှုကြောင့် နေအိမ်များ ပျက်စီးမှုအခြေအနေကို အတည်ပြုနိုင်ခြင်း မရှိသေးသည့်အပြင် ပျက်စီးသွားသည့် လယ်ယာ စိုက်ပျိုးခင်း ဧက အတိအကျရရန်ခက်ခဲနေကြောင်း နမ့်ခမ်းဒေသခံများကပြောသည်။

နမ့်ခမ်းမြို့သည် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ထိန်းချုပ်ထားသည့် ဒေသလည်း ဖြစ်သည်။

ပြီးခဲ့သည့် ဇူလိုင်လအတွင်း တရုတ်နိုင်ငံ လောင်းကျန်းမြစ်ပေါ်ရှိ ရေကာတာများနှင့် ပတ်သက်၍ သတိပေးချက်များ ထုတ်ပြန်ခဲ့ပြီးနောက် မိုးအဆက်မပြတ်ရွာသွန်းမှုနှင့် တောင်ကျရေများကြောင့် ရွှေလီမြစ်ရေ မြင့်တက်လာကာ နမ့်ခမ်းမြို့နယ်အတွင်းရှိ မြစ်ဘေးဒေသများတွင် ရေကြီးမှု ဖြစ်ပွားခဲ့ခြင်းဖြစ်သည်။

အလားတူ ပြီးခဲ့သည့် ၂၀၂၅ ခုနှစ် ဇူလိုင်လ ပထမပတ်အတွင်းတွင်လည်း တရုတ်နိုင်ငံအတွင်း မိုးသည်းထန်စွာ ရွာသွန်းမှုကြောင့် ဆည်များ၏ ရေပိုလွှဲများ ဖောက်ချနေသည့် အကျိုးဆက်သည် ရွှေလီမြစ်ကမ်းဘေး တစ်ကြောရှိ စိုက်ပျိုးမြေများ ရေလွှမ်းမိုးခံရနေပြီး ဧကပေါင်း (၄,၀၀၀) ထပ်မနည်း ရေနှစ်မြုပ် ခဲ့ရသည်။