သျှမ်းပြည်တောင်ပိုင်း ၊ပင်းတယမြို့နယ် ကုန်းစောင်းကျေးရွာတွင် ရေကြီး မြေပြိုမှုကြောင့် နေအိမ်များ ပျက်စီးခဲ့ရပြီး ယနေ့အချိန်ထိ ပြန်လည်ထူထောင်ရန် ခက်ခဲနေကြောင်း သတင်းရရှိသည်။
ပြီးခဲ့သည့် ဇူလိုင်လ ၂၈ ရက် နံနက် ၃ နာရီချိန်တွင် ပင်းတယမြို့နယ် ကုန်းစောင်းရွာ၌ တောင်ကျရေကြောင့် နေအိမ်များ ကျောက်တုံး၊ မြေခဲများ ရေစီးနှင့်အတူမျောပါသွားပြီး လူ(၈)ဦး သေဆုံးကာ နေအိမ် ၁၆ လုံးပျက်စီးဆုံးရှုံးသွားခဲ့ရသည်။
အဆိုပါ ပျက်စီးသွားခဲ့ရသည့် နေအိမ်များကို ပြန်လည်တည်ဆောက်ရန် အခက်ခဲဖြစ်နေပြီး ကျေးရွာအတွင်း သောက်သုံးရေများလည်း ရှားပါးသောကြောင့် ရေကို ချွေတာ သုံးစွဲနေရကြောင်း ဒေသခံများထံမှ သိရသည်။
“ရေက သောက်ဖို့တောင် မရှိဘူး၊ အဝိစီတွင်းတူးတာလည်း ရေမထွက်ဘူး။ ချောင်းရေတော့ ရှိတယ်မသန့်ဘူး။ ပျက်နေတဲ့ အိမ်ကိုလည်း ပြန်ဆောက်ပေးဖို့တွေ လိုနေတယ်။ ကူညီတဲ့သူက နဲနဲပဲရှိတယ်။ စားဖို့တောင် အနိုင်နိုင်နဲ့ ရုန်းကန်နေရတာ။ ၄လရှိပြီ ဘာမှ နလန်မထူနိုင်သေးဘူး။ ”ဟု အသက် ၃၀ ကျော် ဒေသခံ အမျိုးသားတစ်ဦးက ပြောသည်။
ထို့အပြင် ကျေးရွာမူလတန်းကျောင်းသည်လည်း ရေကြီးမှုကြောင့် ပျက်စီးသွားသောကြောင့် ယာယီတဲဖြင့်သာ ကလေးများ စာသင်နေရပြီး စာသင်ကျောင်းပြန်လည်ဆောက်လုပ်ရန် အတွက် အလှူရှင်များလိုအပ်နေကြောင်း ၎င်းက ဆက်ပြောသည်။
ထိုသို့ ရေကြီးမြေပြို မှုနှင့်အတူ စပါးခင်း ဧကပေါင်း ရာချီပျက်စီးသွားသောကြောင့် စားနပ်ရိက္ခာရှားပါးလာပြီး ချေးငှားစားသောက်နေရ၍ ကြွေးမြီးများ ဆပ်နေရင်း ရုန်းကန်နေရကြောင်း သိမ်ကုန်းဒေသခံ အမျိုးသမီးတစ်ဦး က ပြောသည်။
“စပါးခင်းက တခြားရွာတွေရောဆို ဧက ရာနဲ့ချီပျက်တယ်။ ဒီနှစ်တော့ စားဖို့ နဲနဲပဲကျန်တော့တယ်။ နောက်နှစ်ဆို စားဖို့မရှိတော့လောက်ဘူး။ အခုတောင် ချေးငှားစားနေရတာ တစ်နေ့တစ်နေ့ အကြွေးတွေ ဆပ်လိုက် ချေးလိုက်နဲ့။အရင်ကဆို စပါးရှိနေရင် စားဖို့က မပူရဘူး၊ ကိုယ့်ရှာတဲ့ ငွေကို စုဆောင်းထားလို့ရတယ်။”ဟု အဆိုပါ အမျိုးသမီးက ဆိုသည်။
ထိုတောင်ကျရေ တိုက်စားပြီးနောက် ပင်းတယ မြို့နယ် သိမ်ကုန်းကျေးရွာ၊ အုံအက်ကျေးရွာနှင့် ကုန်းစောင်းကျေးရွာ ၊ကံသာကျေးရွာ၊ တပ်ကြီးကျေးရွာ၊ ရွှေပုထိုးကျေးရွာ၊ နောင်တခေါကျေးရွာ ၊ ဇော်ဂျီကျေးရွာ ၊ မိုင်းအင်ကျေးရွာနှင့် သပြေကုန်ကျေးရွာတို့တွင် စပါးစိုက်ပျိုးထားသည့် ဧကအားလုံးနီးပါး ပျက်စီးသွားခဲ့သည်။
ထိုသို့ ပင်းတယမြို့နယ် ကုန်းစောင်းကျေးရွာတွင် ရေဘေးကြောင့် နလန်မထူနိုင်သည့် ကြားက စစ်ကော်မရှင်၏ ရွေးကောက်ပွဲအတွက် ပြည်သူ့ ရှေ့ဆောင်ပါတီ (PPP) ပါတီနှင့် ကြံခိုင်ရေးပါတီ(USDP) တို့က စည်းရုံးရေးလာဆင်းပြီး ကျေးရွာအတွင်း တစ်စုံတစ်ရာကူညီမှု မရှိဘဲ ၎င်းတို့၏ ပါတီကို မဲပေးရန်သာ လာရောက်စည်းရုံးနေကြောင်း သိရသည်။
ယခုလက်ရှိ ပင်းတယမြို့နယ် ကုန်းစောင်းကျေးရွာတွင် အလှူရှင်အနည်းငယ်နှင့် ကျေးရွာသူ၊ရွာသားများ စုပေါင်းပြီး နေအိမ်များ ဆောက်လုပ်ပေးနေပြီး တတ်နိုင်သမျှ ပါဝင်ကူညီပေးစေလိုကြောင်း ဒေသခံများက ပြောသည်။
ပင်းတယမြို့နယ်သည် စိုက်ပျိုးရေးလုပ်ငန်းဖြစ်သည့် ဆန်စပါးကို အများဆုံးစိုက်ပျိုးလုပ်ကိုင်သည့် ဒေသဖြစ်ပြီး ရေကြီးမှုကြောင့် စပါးခင်း၊ သီးနှံစိုက်ခင်းများစွာ ဆုံးရှုံးခဲ့ရသည်။
ပြီးခဲ့သည့် ၂၀၂၄ ခုနှစ်တွင်လည်း သျှမ်းတောင်အပါဝင် တစ်နိုင်ငံလုံးနီးပါး ရေကြီးရေလျှံမှုများ ဖြစ်ပေါ်ခဲ့ပြီး ရေဘေးသင့်သူ ထောင်ချီရှိခဲ့သည်။
Leave a Comments