သျှမ်းပြည်အရှေ့ပိုင်း ၊တာချီလိတ်မြို့တွင် မိုးအနည်းငယ်ရွာသည်နှင့် ရေတက်လာကာ ရေကြီးရေလျှံမှုကြောင့် ဈေးဆိုင် အချို့ပိတ်ထားကြောင်း သတင်းရရှိသည်။
ယမန်နေ့ ဇွန်လ (၁)ရက်တွင် တာချီလိတ်မြို့တွင် မိုးဆက်တိုက် ရွာသွန်းခဲ့သောကြောင့် တာလောရပ်ကွက်ရှိ တာလောဈေးနှင့် သစ်တောရုံးလမ်း နှင့် မကာအိုခမ်း လမ်းကြားဘက်တွင် ရေတက်လာပြီး သွားလာရခက်ခဲကြောင်း သိရသည်။
“တာလောဈေးဘက်ဆို ဈေးဆိုင် တော်တော်များများ ပိတ်ထားရတယ်၊ ရေဝင်လို့ ရေကအရမ်းကြီးတာ မဟုတ်ပေမဲ့ ရွှံတွေနဲ့ဆိုတော့ သွားရခက်တယ်လေ၊ ဆိုင်ထဲ ၊အိမ်ထဲတွေ ရေဝင်ရင် ရွှံတွေကျန်ခဲ့တော့ အဆင်မပြေဘူးလေ၊ အရင်နှစ်က သဲအိတ်တောင်ခုထိ မဖယ်ရသေးဘူး၊ ထပ်ကာရအုံးမယ်၊ မိုးက နဲနဲရွာတာနဲ့ ရေက တန်းတက်လာတာ။”ဟု တာချီလိတ်မြို့ခံ အမျိုးသားတစ်ဦးက ပြောသည်။
ထို့အပြင် ဆန်ဆိုင်းရပ်ကွက်၊ မယ်ခေါင်ရပ်ကွက်နှင့် မြန်မာ-ထိုင်း အမှတ်(၂) ချစ်ကြည်ရေး တံတားအနီးတဝိုက်လည်း ရေကြီးရေလျှံမှု ကြုံတွေ့နေရကြောင်း သိရသည်။
အဆိုပါ တောင်ကျရေကြောင့် တာချီလိတ်မြို့တွင် ရေတက်ခဲ့သော်လည်း ယနေ့ ဇူလိုင်လ (၂)ရက်နေ့တွင် ရေပြန်ကျသွားခဲ့ပြီး လမ်းမပေါ်နှင့် ဈေးဆိုင်အတွင်းတွင် ရွှံနွံများ ကျန်ခဲ့သောကြောင့် သွားလာရ ခက်ခဲနေကြောင်း သိရသည်။
“ရေကတော့ နဲနဲကျပြီ၊ ရွှံတွေတော့ ကျန်ခဲ့တယ်၊ မိုးများနဲနဲထပ်ရွာရင် ရေထပ်တက်အုံးမှာ၊ မိုးမရွာဘဲ နေပူရင်လည်း အဲဒီရွှံတွေက ဖုန်မှုန့်ဖြစ်တော့မှာ အဆင်မပြေဘူး၊ ကတ်တရာလမ်းက မြေနီလမ်းလိုဖြစ်ကုန်ပြီ၊ နွေလည်း အဆင်မပြေ မိုးတွင်းလည်း အဆင်မပြေဘူး။”ဟု တာချီလိတ်မြို့ခံ အမျိုးသမီးတစ်ဦးက ပြောသည်။
ပင်လယ်ရေ မျက်နှာပြင် အမြင့်ပေ ၁,၂၀၀ ကျော်တွင်ရှိသော တာချီလိတ်မြို့တွင် မိုးရွာသွန်းမှုကြောင့် နှစ်စဉ်နှစ်တိုင်း ရေလွှမ်းမိုး ခံရလေ့ရှိသော်လည်း ယခုနောင်ပိုင်းတွင် မြစ်အထက်ပိုင်း ရွှေ၊သတ္တုတူးဖော်မှု အလွန်အကျွံ တူးဖော်မှုများကြောင့် ပိုဆိုးရွားလာကြောင်းမြို့ခံများက ပြောသည်။
ပြီးခဲ့သည့် ၂၀၂၅ ခုနှစ် ဩဂုတ်လတွင်လည်း တာချီလိတ်မြို့ မယ်ဆိုင်ချောင်းရေလျှံမှုကြောင့် ရေကြီးရေလျှံမှု ဖြစ်ပွားခဲ့ပြီး ချောင်းအနီးရှိ နေအိမ်များ ရွှေ့ပြောင်းမှုများ ပြုလုပ်ခဲ့ရကြောင်း သိရသည်။
Leave a Comments