သျှမ်းပြည် ကွန်ဟိန်းမြို့နယ် ဝမ်ဆိုင်းမွန်ရွာမှ ဒေသခံများ တောင်ယာသွားနေစဉ် လမ်းတွင် မြေမြှုပ်မိုင်း နင်းမိပြီး အသက် (၁၅) နှစ်အရွယ် ယောကျ်ားလေးတစ်ဦး သေဆုံးပြီး၊ ဒေသခံ ၂၀ ကျော် ဒဏ်ရာရကြောင်း စုံစမ်းသိရသည်။

ဩဂုတ်လ (၂၀) ရက် နံနက် ၈ နာရီခန့်တွင် ကွန်ဟိန်းမြို့နယ် ဝမ်ဆိုင်းမွန်ရွာ ဒေသခံများသည် တောင်ယာသွားရောက်စဉ် လိုင်းကမ်ရွာနှင့် နောင်မိုခမ်းအကြား ပထမအကြိမ် အမျိုးသမီး (၃) ဦး မိုင်းနင်းမိခဲ့သည်။

၎င်းဒဏ်ရာရသူများကို ရွာသားများမှ ကူညီကယ်ဆယ်ရန် သွားရောက်စဉ် ဒုတိယအကြိမ် ထပ်မံ၍ မိုင်းနင်းမိပြီး အသက် (၁၅) နှစ်အရွယ် ယောကျ်ားလေးတစ်ဦး ပွဲချင်းပြီး သေဆုံး၍ ရွာသား ၁၈ ဦး ဒဏ်ရာအပြင်းအထန် ရရှိခဲ့ကြောင်း ဒေသခံများက ပြောသည်။

“မနက်စာ စားပြီး တောင်ယာသွားတဲ့အချိန် လမ်းမှာ နောင်မိုခမ်းကြားထဲ ပထမတစ်ခေါက် နင်းမိတာ ၃ ယောက်၊ သူတို့ဖုန်းဆက်လာလို့ ရွာသားတွေ လူသွားသယ်တဲ့အချိန် ထပ်နင်းမိတာ။ ဒုတိယတစ်ခေါက် ၁၈ ယောက် နင်းမိတာ၊ ဆုံးသွားတာက အိုက်လွတ် အသက် ၁၅ နှစ် မိန်းမရှိပြီ။ တချို့ကတော့ ဆေးရုံမသွားဘဲ ရွာမှာ ဆေးကုနေကြတယ်”ဟု ကွမ်ဟိန်းမြို့နယ် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုင်းနင်းမိပြီး ထိခိုက်ဒဏ်ရာရရှိသူများမှာ အမျိုးသမီး (၁၀) ဦး အပါအဝင် စုစုပေါင်း ၂၀ ဦးရှိကြောင်း၊ ဒဏ်ရာ ပြင်းထန်သူ (၁၆) ဦးကို ခိုလမ်ဆေးရုံတွင် တက်ရောက်လျက်ရှိပြီး ကျန်သူများမှာ ကျေးရွာနေအိမ်တွင် ဆေးကုသလျက်ရှိကြောင်း သိရသည်။

ဝမ်ဆိုင်းမွန်ဒေသခံများ တောင်ယာသွားရောက်စဉ် မိုင်းနင်းမိသည့် နေရာမှာ RCSS တပ်စခန်းဟောင်းအနီး ဖြစ်ပြီး လိုင်းကမ်ရွာနှင့် ၂ မိုင်ကျော်ခန့် ကွာဝေးကြောင်း ဒေသခံများက ပြောသည်။

“ဗုံးပေါက်ကွဲတာ ၂ နေရာ နီးတယ်။ အခုနင်းမိတာ အစိမ်းနဲ့အကြားထဲမှာ ဖြစ်တာ။ လူထပ်သွားသယ်ပြီးတဲ့အချိန် ကျန်တဲ့ မိုင်းလေးငါးလုံးကို အစိမ်းဘက်က လာဖြုတ်သွားတယ်။ သူများတွေ ထပ်နင်းမိမှာ ကြောက်တယ်။ လမ်းနားမှာ၊ တောင်ယာအစပ်နားမှာတွေ မိုင်းထောင်ထားတတ်တယ်”ဟု ဖြစ်စဉ်သိရှိသူ ကွန်ဟိန်းဒေသခံ အမျိုးသားက သျှမ်းသံတော်ဆင့်ကို ပြောသည်။

ပြီးခဲ့သည့် ဇူလိုင်လ နောက်ဆုံးပတ်မှ စတင်ကာ ယနေ့ထိတိုင် သျှမ်းပြည် ပြန်လည်ထူထောင်ရေးကောင်စီ (RCSS / SSA) နှင့် ရှမ်းပြည်တိုးတက်ရေးပါတီ (SSPP/SSA) တို့သည် ကွန်ဟိန်းမြို့နယ် လိုင်းကမ်ကျေးရွာ မြောက်ဖက်တွင် ထိတွေ့တိုက်ပွဲများ ဖြစ်ပွားခဲ့ကြောင်း သိရသည်။