သျှမ်းပြည်မြောက်ပိုင်း ကွတ်ခိုင်မြို့နယ်တွင် ကိုးကန့်တပ်ဖွဲ့ MNDAA နှင့် တအာင်း(ပလောင်) အမျိုးသား လွတ်မြောက်ရေးတပ်မတော် TNLA တို့ကြား နှစ်ဖက်စစ်ရေး တင်းမာမှုကြောင့် ပြည်သူလူထု အခက်အခဲ ကြုံတွေ့နေကြောင်း စုံစမ်းသိရသည်။

လက်ရှိတွင် ကိုးကန့်တပ်ဖွဲ့ MNDAA နှင့် တအာင်း(ပလောင်) အမျိုးသားလွတ်မြောက်ရေး တပ်မတော် TNLA ကြား ကွတ်ခိုင်နှင့် သိန္နီမြို့နယ်တွင် တစ်လကြာ နှစ်ဘက် စစ်ရေး တင်းမာမှု ဖြစ်ပွားနေသည်။

ကိုးကန့်တပ်ဖွဲ့ MNDAA ၎င်းထိန်းချုပ်ထားသည့် သိန္နီမြို့ရှိ အေးရှားဝေါလ် တိုးဂိတ်တွင် ကွတ်ခိုင်မြို့ဘက်သို့ စားသောက်ကုန်၊ ဆေးဝါးနှင့် စက်သုံးဆီ စသည့် ကုန်ပစ္စည်းများ သယ်ဆောင်လာသည့် ကုန်တင်ကားများကို ဖြတ်သန်းခွင့် ရက်အတော်ကြာ ပိတ်ပင်ထားခဲ့သည်။

ထိုကဲ့သို့ နှစ်ဘက်စစ်ရေး တင်းမာခြင်း၊ လမ်းပန်းဆက်သွယ်ရေး ပိတ်ပင်ခြင်းများကြောင့် ကွတ်ခိုင်မြို့နယ်တွင် စားသောက်ကုန်နှင့် စက်သုံးဆီ စသည့် ကုန်ပစ္စည်းများ ဈေးနှုန်း မြင့်တက်လာခဲ့ကြောင်း ကွတ်ခိုင်မြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“စားသောက်ကုန်တွေ လုံးဝ ပေးမဖြတ်တော့ ဈေးထိုးတက်သွားတာ။ စက်သုံးဆီလည်း ဈေးတက်တယ်၊ ဆန်ကလည်း ပုံမှန်ဈေးထက် ၁ သိန်းဝန်းကျင်လောက် ဈေးနှုန်းတွေ တက်လာတယ်။ ပြည်သူတွေကတော့ အခုချိန်မှာ အကုန် အခက်အခဲတွေ ဖြစ်နေတာပေါ့။ စစ်တပ်နဲ့ တိုက်ပွဲဖြစ်တုန်းကတောင် အခြေအနေက ဒီလောက်မဆိုးဘူး”ဟု ကွတ်ခိုင်မြို့နယ် ဒေသခံ အမျိုးသားတစ်ဦးက ပြောသည်။

ကွတ်ခိုင်မြို့နယ်တွင် ယခင်က ဆန်အိတ်ကြီး တစ်အိတ်လျှင် တစ်သိန်း ငါးသောင်းကျပ် ဝန်းကျင်ခန့် ရှိပြီး လက်ရှိတွင် ဆန်အိတ်ကြီး တစ်အိတ်လျှင် နှစ်သိန်း ခြောက်သောင်း ကျပ်ဝန်းကျင် အထိရှိနေကြောင်း ၎င်းအမျိုးသားက ဆက်ပြောသည်။

ထို့အပြင် မြန်မာနိုင်ငံတစ်ဝှမ်း စက်သုံးဆီပြတ်လပ်မှုနှင့် ဈေးနှုန်းမြင့်တက်မှုကြား ကွတ်ခိုင်မြို့နယ်သို့ စက်သုံးဆီတင်ပို့ခြင်းကိုပါ MNDAA ဘက်မှ တားမြစ်ထားခြင်းကြောင့် လက်ရှိ စက်သုံးဆီ ဓာတ်ဆီတစ်လီတာလျှင် ရှစ်ထောင်ကျပ် ဝန်းကျင် အထိရှိနေကြောင်း သိရသည်။

TNLA နှင့် MNDAA ကြား နှစ်ဖက်စစ်ရေး ပဋိပက္ခများ ပြေလည်မှု မရရှိသေးဘဲ မြေပြင်စစ်ရေး တင်းမာမှုကြောင့် ကွတ်ခိုင်ဒေသခံများလည်း စားဝတ်နေရေးအတွက် ပို၍ အခက်အခဲ ဖြစ်လာမည်ကို စိုးရိမ်မိကြောင်း ကွတ်ခိုင်မြို့နယ် ဒေသခံ အမျိုးသားတစ်ဦးက ဆက်ပြောသည်။

“ပြည်သူတွေက ကြားထဲကနေ အမျိုးမျိုး ခံနေရတာ၊ ကျနော်တို့ ဘဝက မြေစာပင်လို ဖြစ်နေတာ။ သူတို့ ဘယ်သူနဲ့ တိုက်တိုက် ဘယ်လိုလုပ်လုပ် ပြည်သူပဲ ခံနေရတာ။ မြန်မာနိုင်ငံမှာ လူဖြစ်ရတာ တော်တော်ကို ကံဆိုးတယ်။ အခုက ဘာကိုကြောက်လို့ ကြောက်ရမလဲကို မသိဘူးဖြစ်နေတာ”ဟု ကွတ်ခိုင်မြို့နယ် ဒေသခံ အမျိုးသားတစ်ဦးက ပြောသည်။

အလားတူ TNLA ထိန်းချုပ်ထားသည့် နမ္မတူ၊ နမ့်ဆန်၊ မန်တုံ စသည့် မြို့များတွင်လည်း ဆန်နှင့် အခြေခံစားသောက်ကုန် ဈေးနှုန်းများ မြင့်တက်မှု ရှိနေကြောင်း ဒေသခံများထံမှ သိရသည်။

ယခု ဖြစ်ပွားနေသည့် နယ်မြေအငြင်းပွားမှု ပြဿနာကို ကူညီဖြေရှင်းပေးရန် ‘ဝ’တပ်ဖွဲ့ UWSA ဦးဆောင်သည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ FPNCC ထံသို့ TNLA ဘက်မှ ဖေဖော်ဝါရီလအတွင်း စာပေးပို့ တောင်းဆိုခဲ့သည်။

MNDAA နှင့် TNLA ပူးတွဲထိန်းချုပ်ထားသည့် ကွတ်ခိုင်မြို့နယ်တွင် နှစ်ဘက်တပ်ဖွဲ့ကြား မြေပြင်စစ်ရေးတင်းမာမှု ဆက်လက်ဖြစ်ပွားနေပြီး မဟာမိတ်တပ်အချင်းချင်း အပြိုင်အဆိုင် စစ်အင်အား ဖြည့်တင်းမှုများ လုပ်ဆောင်နေကြောင်း ဒေသခံများက ပြောသည်။