သျှမ်းပြည် ကျောက်မဲမြို့နယ်အတွင်း အွန်လိုင်းငွေလိမ် ကျားဖြန့်လုပ်ငန်းများကို လာရောက်ရှာဖွေသည့် စစ်ကော်မရှင်တပ်နှင့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ကြား ထိတွေ့တိုက်ပွဲ ဖြစ်ပွားခဲ့ကြောင်း စုံစမ်းသိရသည်။
ယနေ့ (မတ်လ ၁၀ ရက်) နံနက် ၁၁ နာရီကျော်တွင် ကျောက်မဲမြို့နယ် ပုံဝိုးကျေးရွာအုပ်စုအတွင်း အွန်လိုင်းငွေလိမ် ကျားဖြန့်လုပ်ငန်းများကို ရှာဖွေရန် စစ်ကြောင်းထိုးလာသည့် စစ်ကော်မရှင်တပ်နှင့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ကြား ထိတွေ့တိုက်ပွဲ တစ်နာရီကျော်ကြာ ဖြစ်ပွားခဲ့ကြောင်း ကျောက်မဲဒေသခံများက ပြောသည်။
“ဒီမနက် ဗမာစစ်တပ်နဲ့ သျှမ်းတပ်ကြား လေလွယ်ရွာ သင်္ချိုင်းနားမှာ ပစ်ကြတယ်၊ သေနတ်ကျည်ပေါက်တယ်။ ပုံဝိုးဘက်ကို ကျားဖြန့်တွေ ထပ်ရောက်နေတယ်ဆိုလို့ စစ်တပ်က ထပ်လာရှာတယ် ကြားတယ်၊ တိုက်ပွဲက သိပ်မကြာလိုက်ဘူး” ဟု ကျောက်မဲဒေသခံတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့နယ် ပုံဝိုးကျေးရွာအုပ်စုအတွင်း ဖြစ်ပွားခဲ့သည့် တိုက်ပွဲနှင့် ပတ်သက်၍ ပုံဝိုးကျေးရွာအနီး SSPP/SSA တပ်စခန်း တည်ရှိရာသို့ စစ်ကော်မရှင်တပ်လက်အောက်ခံ ခြေမြန်တပ်ရင်း ခမရ-၁၁၅ မှ စစ်အင်အား (၁၀၀) ခန့်ဖြင့် ထိုးစစ်ဆင် ဝင်ရောက်လာပြီး စတင်ပစ်ခတ်ရာမှ နှစ်ဘက်ထိတွေ့တိုက်ပွဲ ဖြစ်ပွားခဲ့ရကြောင်း SSPP Info မှ ယနေ့ ညနေပိုင်းတွင် သတင်းထုတ်ပြန်လာသည်။
စစ်ကော်မရှင်တပ်နှင့် သျှမ်းတပ် SSPP/SSA ကြား နှစ်ဘက်ထိတွေ့တိုက်ပွဲအတွင်း ထိခိုက်ကျဆုံးမှု ရှိ/မရှိ မသိရသေးဘဲ လက်ရှိအချိန်တွင် စစ်ကော်မရှင်တပ်ဘက်မှ ပုံဝိုး၊ ကွမ်ဟင်၊ တော်လေနှင့် လေလွယ်ကျေးရွာဘက်သို့ စစ်အင်အား ဖြည့်တင်းနေခြင်းကြောင့် နှစ်ဘက်စစ်ရေး တင်းမာမှုများ ဆက်ရှိနေကြောင်း SSPP Info သတင်းထုတ်ပြန်ချက်အရ သိရသည်။
အလားတူ ယမန်နှစ် ၂၀၂၅ နိုဝင်ဘာလ နောက်ဆုံးပတ်တွင်လည်း ကျောက်မဲမြို့နယ် တောင်ထိပ်ကျေးရွာအုပ်စုရှိ ဒုဋ္ဌဝတီမြစ်အနီး တောတွင်းတစ်နေရာတွင် ဆောက်လုပ်ထားသည့် အွန်လိုင်းကျားဖြန့် လုပ်ငန်းနေရာများကို စစ်ကော်မရှင်တပ်မှ မြေပြင်ထိုးစစ်ဆင် တိုက်ခိုက်ခဲ့စဉ်ကလည်း SSPP/SSA တပ်ဖွဲ့နှင့် နှစ်ဘက်ထိတွေ့တိုက်ပွဲ အပြင်းအထန် ဖြစ်ပွားခဲ့ကြောင်း ကျောက်မဲဒေသခံများက ပြောသည်။
Leave a Comments