သျှမ်းပြည်တောင်ပိုင်း၊ ကျေးသီးမြို့နယ် ဝမ်စိမ်းကျေးရွာအုပ်စုအတွင်း နေထိုင်သူများကို တောင်ယာ မသွားကြရန် ရှမ်းပြည်တိုးတက်ရေးပါတီ (SSPP/SSA) က သတိပေးထားကြောင်း စုံစမ်းသိရသည်။

ကျေးသီးမြို့နယ် ဝမ်စိမ်းကျေးရွာအုပ်စုအတွင်း ရှမ်းပြည်တိုးတက်ရေးပါတီ SSPP/SSA နှင့် သျှမ်းပြည်ပြန်လည်ထူထောင်ရေးကောင်စီ RCSS/SSA တို့သည် ဇူလိုင် လလယ်မှ စတင်ကာ စစ်ရေးတင်းမာမှုများ ဖြစ်ပွားနေပြီး ပြည်သူများကို တောင်ယာမသွားရန် ဇူလိုင်လ နောက်ဆုံးပတ်ကတည်းက SSPP ဘက်မှ အသိပေး တားမြစ်ခဲ့ကြောင်း ကျေးသီးမြို့နယ် ဒေသခံများက ပြောသည်။

“ သျှမ်းတပ် (၂)တပ် ကြားနေရတာလည်း ခက်တယ်။ အခုက တရားဝင် ကြေညာတာတော့ မဟုတ်ဘူး။ ဒီဘက်က SSPP ထိန်းချုပ်တဲ့ နေရာဆိုတော့ သူတို့ သတိလာပေးသွားတဲ့ သဘောပါ။ တိုက်ပွဲက မကြာခဏ ဖြစ်နေတော့ စိုးရိမ်စိတ်တော့ ရှိတယ်” ဟု ဝမ်စိမ်းကျေးရွာအုပ်စုတွင် နေထိုင်သည့် တောင်သူတစ်ဦးက သျှမ်းသံတော်ဆင့်ကိုပြောသည်။

ကျေးသီးမြို့နယ် ဝမ်စိမ်းကျေးရွာအုပ်စုတွင် ကျေးရွာပေါင်း (၁၄)ရွာရှိကြောင်း သိရသည်။

လက်ရှိအချိန်သည် တောင်ယာလုပ်ကိုင်ရသည့် အချိန်ဖြစ်သည့်အတွက် သီးနှံများ မစိုက်ပျိုးရလျှင် နောင်လာမည့် နှစ်အတွက် ဝင်ငွေလျော့နည်းသွားနိုင်ပြီး စားဝတ်နေရေးအတွက် အခက်အခဲ ဖြစ်နိုင်ကြောင်း၊ တိုက်ပွဲဖြစ်ပွားလာပါက ထွက်ပြေးတိမ်းရှောင်ရန်လည်း ကြိုတင်စီစဉ်နေရကြောင်း ၎င်းက ဆက်ပြောသည်။

“လောလောဆယ်တော့ ထွက်ပြေးရတာ မရှိသေးဘူး။ စစ်ဖြစ်လာရင် ဘယ်ပြေးရမှာလဲ ဆိုတာတော့ စီစဉ်ထားတယ်။ ရွာထဲမှာ စစ်မဖြစ်ရင်တော့ ကောင်းတာပေါ့”ဟု ဝမ်စိမ်းကျေးရွာမှ တောင်ယာစိုက်ပျိုးသည့် အမျိုးသမီးက ထပ်လောင်းပြောကြားသည်။

အလားတူ ဇူလိုင်လ နောက်ဆုံးပတ်မှ စတင်ကာ ယနေ့ထိတိုင် ကွန်ဟိန်းမြို့နယ် လိုင်းကမ်ကျေးရွာ မြောက်ဖက်တွင် SSPP နှင့် RCSS တပ်ဖွဲ့တို့ အချင်းချင်း ထိတွေ့တိုက်ပွဲများ ဖြစ်ပွားခဲ့ပြီး နှစ်ဘက်ထိတွေ့တိုက်ပွဲ ပိုမိုပြင်းထန်လာမည်ကို စိုးရိမ်သဖြင့် ဇူလိုင်လ ၂၉ ရက်တွင် လိုင်းကမ်ကျေးရွာရှိ ဒေသခံများကို ၅ ရက်အတွင်း အပြီးပြောင်းရွှေ့ပေးရန် RCSS တပ်ဖွဲ့က လာရောက်ပြောဆိုခဲ့ကြောင်း ကွန်ဟိန်းဒေသခံများက ပြောသည်။

လက်ရှိ သျှမ်းပြည်မြောက်ပိုင်း တိုက်ပွဲများကြောင့် သျှမ်းလူထုတို့၏ အသက်အိုးအိမ် စည်းစိမ်များ ပျက်စီးဆုံးရှုံးခဲ့ရပြီး အမျိုးသမီး၊ ကလေးသူငယ်နှင့် သက်ကြီးရွယ်အိုများသည် ဒုက္ခများနှင့် အခက်အခဲများ တွေ့ကြုံနေရသည့်အပေါ် စိတ်မကောင်းဖြစ်ရကြောင်း RCSS တပ်ဖွဲ့မှ ဇူလိုင်လ ၂၉ ရက်နေ့တွင် ထုတ်ပြန်ထားသည်။

ထို့အပြင် သက်ဆိုင်ရာ အဖွဲ့အစည်းများကလည်း မျက်နှာချင်းဆိုင် တွေ့ဆုံဆွေးနွေးပြီး အပစ်ခတ်ရပ်စဲရေး ဆောင်ရွက်နိုင်ကြရန်နှင့် ဖယ်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် တွေ့ဆုံဆွေးနွေးခြင်းဖြင့် ဖြေရှင်းဆောင်ရွက်သွားကြရန် ထုတ်ပြန်ချက်တွင် ထည့်သွင်းဖော်ပြထားသည်။

အခြားတစ်ဘက်တွင် သျှမ်းတပ်နှစ်တပ်ဖြစ်သည့် SSPP/SSA နှင့် RCSS/SSA တို့အချင်းချင်း ရပ်စောက်၊ မိုင်းကိုင်၊ လဲချား၊ ဟိုပုန်းနှင့် ကွန်ဟိန်းမြို့နယ်တို့တွင် မေလမှ စတင်ပြီး တိုက်ပွဲအကြိမ်ကြိမ် ဖြစ်ပွားခဲ့ကြောင်း ဒေသခံများက ပြောသည်။

အလုပ်သင် သတင်းထောက် နန်းလရောင် ရေးသားသည်။