သျှမ်းပြည် ကွန်ဟိန်းမြို့နယ်အတွင်း တိုက်ပွဲဖြစ်ပွားမည်ကို စိုးရိမ်သဖြင့် ကျေးရွာတစ်ခုရှိ ဒေသခံများကို ၅ ရက်အတွင်း အပြီးပြောင်းရွှေ့ပေးရန် သျှမ်းပြည်ပြန်လည် ထူထောင်ရေးကောင်စီ (RCSS/SSA) က အကြောင်းကြားထားကြောင်း စုံစမ်းသိရသည်။

ဇူလိုင်လ နောက်ဆုံးပတ်မှ စတင်ကာ ယနေ့ထိတိုင် သျှမ်းပြည် ပြန်လည်ထူထောင်ရေးကောင်စီ (RCSS / SSA) နှင့် ရှမ်းပြည်တိုးတက်ရေးပါတီ (SSPP/SSA) တို့သည် ကွန်ဟိန်းမြို့နယ် လိုင်းကမ်ကျေးရွာ မြောက်ဖက်တွင် ထိတွေ့တိုက်ပွဲများ ဖြစ်ပွားခဲ့ကြောင်း ကွန်ဟိန်း ဒေသခံတစ်ဦးက သျှမ်းသံတော်ဆင့်ကို ပြောသည်။

နှစ်ဘက်ထိတွေ့တိုက်ပွဲ ပိုမိုပြင်းထန်လာမည်ကို စိုးရိမ်သဖြင့် ဇူလိုင်လ ၂၉ ရက်တွင် ကွန်ဟိန်းမြို့နယ် လိုင်းကမ်ကျေးရွာရှိ ဒေသခံများကို ၅ ရက်အတွင်း အပြီးပြောင်းရွှေ့ပေးရန် RCSS တပ်ဖွဲ့က လာရောက်ပြောဆိုခဲ့ကြောင်း အသက် ၃၀ ဝန်းကျင် ဒေသခံအမျိုးသားတစ်ဦးက သျှမ်းသံတောဆင့်ကို ပြောသည်။

“SSPP နဲ့ RCSS တို့က အဲ့ရွာနားက လယ်ကွင်းတွေမှာ အချင်းချင်း ထိတွေ့တိုက်ပွဲလေးတွေ ရှိနေတော့‌ ရွှေ့ခိုင်းထားတာ။ ရွာထဲမှာ တိုက်ပွဲဖြစ်မှာဆိုးလို့ကို ရွှေ့ခိုင်းတာ။ RCSS ကတော့ ရှေ့ရက်ကတည်းက ရွှေ့ခိုင်းနေတာ။ မြို့ထဲကို ပြောင်းဖို့ရွှေ့ဖို့ လုပ်နေကြတယ်” ဟု အသက် ၃၀ ဝန်းကျင် ဒေသခံအမျိုးသားတစ်ဦး ပြောသည်။

လက်ရှိတွင် လိုင်းကမ်ကျေးရွာမှ ဒေသခံများသည် ကွန်ဟိန်းမြို့ပေါ်ရှိ နီးစပ်ရာ ဆွေမျိုးများထံ ထွက်ပြေးတိမ်းရှောင်နေကြောင်း ၎င်းအမျိုးသားက ဆက်ပြောသည်။

RCSS တပ်ဖွဲ့က ရွှေ့ပြောင်းခိုင်းနေသည့် လိုင်းကမ်ကျေးရွာသည် တောင်ကြီး – တာချီလိတ် ပြည်ထောင်စု လမ်းမကြီးပေါ်တွင် တည်ရှိပြီး ကွန်ဟိန်းမြို့နှင့် ၁၄ မိုင်ခန့် ကွာဝေးကြောင်း သိရသည်။