မြန်မာ-တရုတ်နယ်စပ်ဒေသ မူဆယ်မြို့နယ် ဝိန်းနန်ကျေးရွာရှိ တောလမ်းတစ်နေရာတွင် အမျိုးသား ၁ ဦး မြေမြုပ်မိုင်းထပ်မံနင်းမိခဲ့ကြောင်း စုံစမ်းသိရသည်။

အဆိုပါ အမျိုးသား ၁ ဦးသည် ယမန်နေ့ (မေလ ၂၈) ရက် နံနက်ပိုင်းအချိန်တွင် မူဆယ်မြို့နယ် ဝိန်းနန်းကျေးရွာအနီးရှိ တောလမ်းတစ်နေရာတွင် မြေမြုပ်မိုင်းနင်းမိခဲ့ခြင်းဖြစ်ကြောင်း၊ ခြေထောက်တစ်ဖက်ပြတ်သွားကြောင်း ၎င်းကိုသွားရောက်ကူညီခဲ့သည့် လူမှုကူညီရေးအသင်းထံမှ သိရသည်။

“ မူဆယ်ရဲ့တောင်ဘက်က ဝိန်းနန်းတို့၊ ခူးဝိန်းတို့နေရာတွေမှာတော့ များသောအားဖြင့် စစ်ကောင်စီတပ်တွေ နေတယ်။ အဲ့အနီးတဝိုက်ကို သူတို့မိုင်းထောင်ထားတာအများကြီးရှိတယ်။ ပြီးခဲ့တဲ့ ရက်ပိုင်းက မြေမြုပ်မိုင်း သွားရှင်းတဲ့သူတွေကိုတောင် သူတို့သေနတ်နဲ့ ပစ်ခတ်သေးတယ်” ဟု မူဆယ်မြို့ ဒေသခံအမျိုးသားတစ်ဦး ကပြောသည်။

ပြီးခဲ့သည့် မေလ ၂၁ ရက်တွင်လည်း မူဆယ်မြို့နယ် မန်မိုင်ရွာရှိ မူလတန်းကျောင်းအနီးတွင် အမျိုးသမီး ၁ ဦး အပေါ့အပါးသွားရာမှ မြေမြုပ်မိုင်းနင်းမိပြီး ခြေထောက်တစ်ဖက်ဖြတ်လိုက်ရသည်။

သျှမ်းမြောက်တွင် “၁၀၂၇ စစ်ဆင်ရေး” တိုက်ပွဲဖြစ်ပွားပြီးသည့်နောက် မြေမြုပ်မိုင်းနှင့် စစ်လက်နက် အကြွန်းအကျန် ပစ္စည်းများကြောင့် မကြာခဏ ပြည်သူများ ထိခိုက်၊ သေဆုံးမှုများရှိနေကြောင်း ဆိုသည်။

“အစောပိုင်းတုန်းကတော့ မြေမြုပ်မိုင်းတွေ ဘယ်နေရာမှာမြုပ်ထားတယ် ဘာညာပြောတယ်။ ဒါပေမဲ့ ပြည်သူတွေကတော့ အဲ့နေရာကိုသွားကြတာပဲ။ အဓိကတော့ စားဖို့သောက်ဖို့အတွက် အဲ့အလုပ်တွေပဲရှိတာကို။ တချို့တွေက တောင်ယာလုပ်ရင်လုပ်မယ်၊ တောထဲမှာ ဟင်းသီးဟင်းရွက်တွေရှာရင်ရှာမယ်။ ဒါတွေမလုပ်ရင် သူတို့မှာစားဖို့သောက်ဖို့ ဝမ်းရေးကအဆင်မပြေတာ” ဟု မူဆယ်မြို့ဒေသခံတစ်ဦးက ထပ်လောင်းပြောသည်။

ထို့အပြင် မြေမြုပ်မိုင်းနင်းမိပြီး ဆေးဝါးကုသခံယူနေရသည့် ပြည်သူများသည်လည်း အခြေခံလူတန်းစားများ ဖြစ်ကြသောကြောင့် ဆေးရုံ၌ ဆေးဝါးကုသရန် ဆေးဖို့အခက်ခဲ၊ ခြေအတုတပ်ရန် ငွေရေးကြေးရေး အခက်ခဲများလည်း ကြုံတွေ့နေရသည်ဟု လူမှုကူညီရေးအသင်းများက ပြောသည်။

စစ်တပ်အာဏာသိမ်းပြီးနောက် နေပြည်တော်မှလွှဲ၍ တိုင်းနှင့်ပြည်နယ်အသီးသီးတွင် မိုင်းနှင့် စစ်အကြွန်းအကျန်းများကြောင့် ထိခိုက်သေဆုံးသူဦးရေး တိုးများလာသကဲ့သို့ မြန်မာနိုင်ငံ၏ မြို့ထက်ဝက်ကျော်မှာ မြေမြုပ်မိုင်းအန္တရာယ်ကြုံနေရသည်ဟု မြေမြုပ်မိုင်းစောင့်ကြည့်လေ့လာရေးအဖွဲ့ Landmine & Cluster Munition Monitor က ၂၀၂၃ နှစ်ကုန်းပိုင်းတွင် အစီရင်ခံစာ ဖော်ပြထားသည်။