တရုတ် – မြန်မာ နယ်စပ်ကုန်သွယ်ရေးဂိတ်တစ်ခု ဖြစ်သည့် ကျင်စန်းကျော့ဂိတ်ကို နိုဝင်ဘာ ၂၅ ရက် မနက် ၁၀ နာရီဝန်းကျင်က ကိုးကန့်တပ် MNDAA မှ သိမ်းပိုက်လိုက်ကြောင်း ကိုးကန့် သတင်းထုတ်ပြန်ချက်များအရ သိရသည်။

သျှမ်းပြည်မြောက်ပိုင်း နယ်စပ်ကုန်သွယ်ရေးဂိတ်များတွင် အရေးပါ‌သော ဂိတ်တစ်ခုဖြစ်သည့် ကျင်စန်းကျော့ဂိတ်အနီး ဆဲဗင်းဟွာကျင့် ကုန်ချိန်းကွင်း၌ နိုဝင်ဘာလ ၂၃ရက်က လက်နက်ကြီးကျည်ကျရောက်ပေါက်ကွဲမှုကြောင့် သွင်းကုန်ကားအစီးရေ တစ်ရာကျော် မီးလောင်ပျက်စီးဆုံးရှုံးပြီးနောက် နိုဝင်ဘာလ ၂၅ရက်တွင် MNDAAမှ ကျင်စန်းကျော့နယ်စပ်ဂိတ်အား သိမ်းလိုက်ပြီဖြစ်ကြောင်း သတင်းထုတ်ပြန်လာခြင်းဖြစ်သည်။

“မနေ့ကတော့ အဲ့ဒိဂိတ်မှာ ကိုးကန့်တပ်က ကိုးကန့်အလံ လွှင့်တင်နေတဲ့ ဗွီဒီယိုဖိုင် အွန်လိုင်းမှာတင်ထားတာ တွေ့မိတယ်၊ဂိတ်နားကလူတွေလည်း စစ်ရှောင်နေကြတယ်ပြောတယ် လက်နက်ကြီး ပစ်သံတွေက နေ့ရော ညရော ကြားနေရတာ “ဟု တရုတ်ဘက်ခြမ်း ရောက်နေသည့် ရွှေ့ပြောင်းလုပ်သားတစ်ဦးမှ သျှမ်းသံတော်ဆင့်သို့ ပြောသည်။

သျှမ်းမြောက် မဟာမိတ် တပ်ပေါင်းစု၏ ၁၀၂၇ စစ်ဆင်ရေး ကာလ အတွင်း မုံးကိုး – မန်ဟိုင်းဂိတ်၊ ပန်ဆိုင်း (ကြူကုတ်) – ဝမ်တိန် ဂိတ်၊ မူဆယ် ကျင်စန်းကျော့ – ဝမ်တိန် ဂိတ်နဲ့ ချင်းရွှေဟော် – မိန်းတိန် ဂိတ်များနှင့် စစ်ကောင်စီတပ်စခန်း ၁၇၂ ခုကိုပါသိမ်းပိုက် နိုင်ခဲ့ကြောင်းကို ကိုးကန့် ထုတ်ပြန်သတင်းမှ သိရသည်။

မူဆယ် ၁၀၅ မိုင် ကုန်သွယ်ရေးဇုန်နားတွင်လည်း လက်နက်ကြီးပစ်သံများ ဆက်တိုက်ကြားနေရပြီး တိုက်ပွဲပြင်းထန်နေသောကြောင့် အတွင်းဘက်၌ ရပ်နားထားသည့် ကုန်တင်ကားများ၏လုံခြုံမှုအတွက် စိုးရိမ်နေကြရကြောင်း ဒေသခံယာဉ်ပိုင်ရှင်များထံမှ သိရသည်။

တိုက်ပွဲများရက်ကြာလာသည်နှင့်အမျှ ကုန်သွယ်မှုလမ်းကြောင်းများ ပြတ်တောက်လာပြီး ဒေသခံများလည်း မိမိတို့လုပ်ငန်းများကို ပစ်ကာ စစ်ဘေးရှောင်နေကြရသဖြင့် စားဝတ်နေရေးခက်ခဲကြပ်တည်းမှုများ ပိုမိုဆိုးရွားစွာ ခံစားနေရကြောင်း စစ်ဘေးရှောင်ကူညီပေးနေသူများထံမှ သိရသည်။