သျှမ်းပြည် မူဆယ်မြို့နယ် ပန်ဆိုင်း(ကြူကုတ်)မြို့တွင် ညီနောင်မဟာမိတ် ၃ ဖွဲ့၏ ဒရုန်းဗုံးကြဲတိုက်ခိုက်မှုကြောင့် အရပ်သားတစ်ဦး သေဆုံးသွားကြောင်း စုံစမ်းသိရသည်။
ယမန်နေ့ (နိုဝင်ဘာ ၁၉ ရက်) ညနေ ၃ နာရီခွဲဝန်းကျင် တွင် ညီနောင်မဟာမိတ် ၃ ဖွဲ့မှ ပန်ဆိုင်း(ကြူကုတ်)မြို့ပေါ်သို့ ဒရုန်းဖြင့် ဗုံးကြဲတိုက်ခိုက်ခဲ့ရာ ပြည်သူနေအိမ် ၂ လုံးနှင့် EPC လျှပ်စစ်ရုံးတို့ မီးလောင်ပျက်စီးခဲ့ပြီး အသက် ၂၁ နှစ်အရွယ်ရှိ စိုင်းထွန်းကျော်ဆိုသူ သေဆုံးသွားကြောင်း ပန်ဆိုင်းဒေသခံများက ပြောသည်။
“ညီနောင်မဟာမိတ်တွေက ပန်ဆိုင်းမြို့ပေါ်ကို ဒရုန်းနဲ့ ဗုံးလာကြဲတာ ဟုတ်တယ်။ ဆေးရုံဘက်နဲ့ EPC ရုံးဘက်တော့ တိုက်ပွဲတွေ စဖြစ်ကတည်းက လူမနေတာ ကြာပြီ။ ပြည်သူနေအိမ်တွေကတော့ စစ်ကောင်စီတွေရှိတယ် အထင်နဲ့ မဟာမိတ်တွေက ဒရုန်းနဲ့ ဗုံးလာကြဲနေတာ။ အိမ်တွေ တော်တော်များများ ထိတယ်။ မနေ့က ၆ နာရီလောက်မှာ ပန်ဆိုင်းမြို့ပေါ် ရပ်ကွက် ၄ က တစ်ယောက်ဆုံးသွားသေးတယ်”ဟု ပန်ဆိုင်းမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
မြန်မာ-တရုတ် နယ်စပ်ရှိ ပန်ဆန်း(ကြူကုတ်)မြို့တွင် ညီနောင်မဟာမိတ်တပ်များနှင့် စစ်ကောင်စီတပ်တို့၏ နှစ်ဘက်တိုက်ပွဲများကြောင့် စစ်ဘေးရှောင်ဦးရေ ၂၀၀၀ ခန့်သည် မိုင်းယန်းချောင်းတလျှောက် မြန်မာ-တရုတ် နယ်စပ်ခြံစည်းရိုးအနီးနှင့် မူဆယ်မြို့ရှိ ဘုန်းကြီးကျောင်းများတွင် ထွက်ပြေးတိမ်းရှောင်နေရကြောင်း ပန်ဆိုင်းဒေသခံများထံမှ သိရသည်။
“အခု ကောင်းခန်ဘုန်းကြီးကျောင်းမှာ လာရှောင်နေကြတဲ့ ပန်ဆိုင်းကလူတွေလဲ ထပ်ပြီးတော့ စိတ်ပူနေရပြီ။ ဘာလို့ဆိုတော့ အဲ့နားတဝိုက်မှာ စစ်ကောင်စီတပ်သား ၁၀၀ ကျော်လဲ ရောက်နေတယ်။ စစ်ဘေးရှောင်တွေက ညီနောင်မဟာမိတ်တပ်တွေ ထပ်လာတိုက်မှာစိုးလို့ မူစယ်ဘက်ကို ထပ်ပြေးကြဖို့ လုပ်နေကြတာ”ဟု ပန်ဆိုင်းမြို့မှ စစ်ဘေးရှောင်များ၏ စိုးရိမ်ထိတ်လန့်မှုကို ဒေသခံတစ်ဦးက သျှမ်းသံတော်ဆင့်သို့ ပြောသည်။
အလားတူ နိုဝင်ဘာလ ၁၃ ရက် ည (၉) နာရီဝန်းကျင်လည်း ပန်ဆိုင်းမြို့ နမ့်ဟူးကျေးရွာ အနီးရှိ စစ်ကောင်စီတပ် အမှတ် (၅၂၅) ကို ညီနောင်မဟာမိတ်တပ်ဖွဲ့က ဒရုန်းဖြင့် တိုက်ခိုက်ခံရကြောင်း ပန်ဆိုင်းဒေသခံများထံမှ သိရသည်။
ပြီးခဲ့သည့် နိုဝင်ဘာ ၁ ရက်တွင်လည်း ပန်ဆိုင်းမြို့ (ကြူဂုတ်) ရပ်ကွက် ၈ အတွင်းရှိ စစ်ကောင်စီ ရဲစခန်းအနီး၌ လက်နက်ကြီး ကျရောက်ပေါက်ကွဲမှုကြောင့် အမျိုးသား တစ်ဦး သေဆုံးကာ အမျိုးသမီး တစ်ဦး ထိခိုက်ဒဏ်ရာရရှိခဲ့သည်။
