သျှမ်းပြည်တောင်ပိုင်း မိုင်းကိုင်မြို့နယ်အတွင်း  နှစ်လနီးပါး ပျောက်ဆုံးနေသည့် တအာင်း(ပလောင်) အမျိုးသားပါတီ (TNP) မြို့နယ်ဥက္ကဋ္ဌ မိုင်းနုမ်ဟန်အား ပုတ်ပွနေသည့် ရုပ်အလောင်းဖြင့် ပြန်လည်တွေ့ရှိသည်ဟု ပါတီတာဝန်ခံကပြောသည်။

မိုင်းနုမ်ဟန်၏ ရုပ်အလောင်းကို မတ်လ (၃) ရက်နေ့က တုံလောကျေးရွာအုပ်စု ပန်ပွဲကျေးရွာ အနီး ကျောက်လိုင်ဂူတခုတွင် တွေ့ရှိကြောင်း  မိုင်းကိုင်မြို့နယ် (TNP) ပါတီအလုပ်အမှုဆောင် မိုင်းအောင်ခမ်း က သျှမ်းသံတော်ဆင်ႉ အားပြောသည်။

“ တကယ်ပဲသေဆုံးသွားပြီ။ သူ့ရဲ့ ရုပ်အလောင်းကို သဂြိုလ်ပြီးသွားပြီ။ လည်ပင်းမှာ ကြိုးတွေနဲ့ ချည်ထားပြီးတော့ လက်ကိုလည်း နောက်ပြန်ကြိုးတုပ်ထားတယ်။ သေနတ် (၃) ချက်ဒဏ်ရာတွေ့တယ်။ မေးရိုးမှာ တစ်ချက်၊ ရင်ဘတ်မှာတစ်ချက်၊ ဝမ်းဗိုက်မှာ တစ်ချက်၊ အလောင်းလည်း ပုတ်သိုးနေပြီ။   သူ့အမျိုးသမီးနဲ့ကလေးလဲ  အသက်ရှိသေးလား မရှိလားမသိဘူး။ လိုက်ရှာနေတုန်းပါ။ ” – ဟု မိုင်းအောင်ခမ်းက ပြောသည်။

မိုင်းနုမ်ဟန်သည် ၄င်း၏ ဇနီး၊ သမီးနှင့်အတူ  မိုင်းကိုင်မြို့နယ် မက်ချီးနုတ်ကျေးရွာ၌ မိခင်ဖြစ်သူရက် လည်ဆွမ်းသွတ်ပြီးအပြန် ဇန်နဝါရီလ ၁၀ ရက် မနက် ၁၁ နာရီဝန်းကျင်အချိန်က  တုံလောအုပ်စုနှင့် ပန်လော့ကျေးရွာကြား ပျောက်ဆုံးသွားခဲ့ခြင်းဖြစ်သည်။

မိုင်းနုမ်ဟန်နှင့်မိသားစု သုံးဉီး ပျောက်ဆုံးမှုနှင့်ပတ်သက်၍ ၄င်းအသိုင်းအဝိုင်းက မိုင်းကိုင်မြို့ နယ်အတွင်း အခြေစိုက်သည့် သျှမ်းလက်နက်ကိုင်အဖွဲ့၏ လက်ချက်ဖြစ်သည်ဟု စွပ်စွဲ ပြောဆိုခဲ့ပါသည်။

အဆိုပါ ကိစ္စနှင့်ပတ်သက်ပြီး သျှမ်းပြည်တပ်မတော် RCSS/SSA ပြောရေးဆိုခွင်ႉရှိသူ ဗိုလ်မှူးခမ်းစံ က “အဲဒီ့တုန်းက သျှမ်းပြည်တောင်ပိုင်း မိုင်းကိုင်မြို့နယ်ထဲမှာ တိုက်ပွဲဖြစ်တယ်။ တုံလောဘက်မှာ ပျောက်တယ်လို့ ပြောတယ်။ ဒါပေမယ်ႉ အဲ့ဒီအချိန်တုန်းက  ကျနော်တို့ RCSS  အဲ့ဒီဘက်မှာမရှိတော့ဘူး။ ကားလမ်းအ နောက်ဘက် တောင်ကြောမှာပဲရှိတယ်”- ဟု ပြောသည်။

မိုင်းကိုင်မြို့နယ် TNP ပါတီ မြို့နယ်ဥက္ကဋ္ဌ မိုင်းနုမ်ဟန် နှင့် မိသားစု ပျောက်ဆုံးသွားသည့်နေရာ ဒေသတွင် ၂၀၂၁  ဒီဇင်ဘာ ၂ ရက်နေ့တုန်းကလည်း မိုင်းပန်မြို့နေ အသက် ၃၅ နှစ်အရွယ် သျှမ်းအမျိုးသား ကားသမား စိုင်းထိန်း ဆိုသူလည်း ၄င်း မောင်းနှင်လာသည့် ကားနှင့်အတူ ပျောက်ဆုံးခဲ့သည်မှာ ယနေ့တိုင်ဖြစ်သည်။

မိုင်းကိုင်မြို့နယ်အတွင်း  တအာင်းအမျိုးသားလွတ်မြောက်ရေးတပ်မတော် PSLF/TNLA နှင့် သျှမ်းပြည် တိုးတက်ရေးပါတီ SSPP/SSA တို့ ပါဝင်သည့် မြောက်ပိုင်းမဟာမိတ်တပ်က နယ်မြေစိုးမိုးရေးဟုဆိုကာ RCSS/SSA တပ်အား ထိုးစစ်ဆင်တိုက်ခိုက်နေသည်မှာ ယမန်နှစ်ကတည်းက ယနေ့တိုင်ဖြစ်ပါသည်။

အဆိုပါ ပြဿနာများဖြေရှင်းနိုင်ရေးအတွက် ငြိမ်းချမ်းရေးလုပ်ငန်းစဉ်တလျှောက်ပါဝင်ခဲ့သူ  ပြည်ထောင်စု အင်စတီကျု ဒါရိုက်တာ ဉီးခွန်စိုင်းက – “ နိုင်ငံရေးပြဿနာကို အင်အားနဲ့ မဖြေရှင်းဘဲနဲ့  နိုင်ငံရေးနည်းနဲ့တွေ့ဆုံ ဆွေးနွေးဖြေရှင်းတဲ့နည်းနဲ့ ယဉ်ကျေးမှုကို ကျနော်တို့ကတည်ဆောက်ရမယ်။ အဲဒီယဉ်ကျေးမှုအသစ်ကို ကျနော်တို့အားလုံး တည်ဆောက်ရမှာဖြစ်ပါတယ်။ ဗမာ့တပ်မတော်ရော၊ သျှမ်းတပ်မတော်ရော၊ ဝ တပ်မတော် ရော အားလုံး တည်ဆောက်ဖို့လိုပါတယ်။ မိမိဟာ ယဉ်ကျေးတဲ့ လူမျိုးဖြစ်တယ်ဆိုတာကို အားလုံးကို ပြဖို့လိုပါတယ်” – ဟု ပြောသည်။

သျှမ်းပြည်တိုင်းရင်းသားလက်နက်ကိုင်တပ်ဖွဲ့ကြား ၂၀၁၅ ခုနှစ်မှ စတင်ဖြစ်ပွားလာသည့် စစ်ရေးပဋိပက္ခကြောင့် အပြစ်မဲ့ အရပ်သားပြည်သူများ၊ ရပ်ရွာသူကြီးများ၊ ဘုန်းတော်ကြီးများ၊ လူငယ်များ အများအပြားဖမ်းဆီး သတ်ဖြတ် ဖျောက်ဖျက်ခံရသည့်အပြင် ရပ်ရွာမီးရှို့မှုလည်း မကြာခဏဖြစ်ပွားလေ့ရှိသည်။  ထိုသို့ လူထုအပေါ် ကျူးလွန်နေမှုအား နိုင်ငံတော်အာဏာကို ချုပ်ကိုင်လိုသည့် ဗမာ့တပ်မတော်အပါအဝင် မည်သည့် လက်နက် ကိုင်တပ်မှ တာဝန်ယူမှု တာဝန်ခံမှုမရှိကြပေ။

၂၀၁၆ ခုနှစ် ဇွန်လ ၅ ရက်က သျှမ်းပြည်မြောက်ပိုင်း နမ့်ခမ်းမြို့မှ လားရှိုးမြို့သို့ ထွက်ခွါသည့်  နံပတ်ပြား FF-9723  ရှိ ဗင်ကားတစီး နမ့်ခမ်း သျှမ်းလူငယ် ၆ ဉီးအားတင်ဆောင်လာကာ နမ့်ခမ်း – နမ့်ဖတ်ကာ ကားလမ်းပိုင်း တွင် လက်နက်ကိုင်လူတစုက ကားရောလူပါ ဖမ်းဆီးဖျောက်ဖျက်ခဲ့သည်မှာ ယနေ့တိုင် အစရှာမရခဲ့ပေ။ ထိုစဉ်ကလည်း နမ့်ခမ်းမြို့နယ်အတွင်း TNLA နှင့် RCSS တို့ ကြားနယ်မြေစိုးမိုးရေးအတွက်  အပြိုင်အဆိုင် ဖြစ်နေသည့်ကာလ ဖြစ်ပါသည်။

 ၂၀၁၇ ခုနှစ်ဉီးပိုင်းကလည်း  အိမ်ခြေ ၈၀ ရှိ ဟိုပန်ကျေးရွာ(သျှမ်းရွာ) မီးရှို့ခံရသည့်အပြင် ဒေသအတွင်းသွား လာသည့် နမ်ခမ်းဒေသခံ ကျိပ်ပေါင်းများစွာကို အဆိုပါ လက်နက်ကိုင်တပ်များက ဖမ်းဆီး သတ်ဖြတ် ဖျောက်ဖျက် ခဲ့ကြသည်။ ထိုဒေသ စစ်ရေးပဋိပက္ခမှပြီး နမ္မတူမြို့နယ်၊ သီပေါမြို့နယ်၊ ကျောက်မဲမြို့နယ်သို့ တဖြည်းဖြည်း ကူးစက်လာရာ ၂၀၂၁   မေလ ၂ ရက်နေ့က  နမ္မတူမြို့နယ် မန်လီကျေးရွာ (ပလောင်ရွာ) ထပ်မံမီးရှို့ ခံရပြန်သည်။ ယခုနှစ် ၂၀၂၂ ခုနှစ်အတွင်း သျှမ်းပြည်တောင်ပိုင်း မိုင်းကိုင်မြို့အထိ စစ်မီးပျံ့နှံ့ရောက်ရှိလာပြီး ဒေသခံ အများအပြားလည်း ယခုကဲ့သို့  ဘဝဆိုးများ ထပ်မံကြုံတွေ့လာနေရပါသည်။