သျှမ်းပြည်တောင်ပိုင်း မိုင်းကိုင်မြို့မှ တအာင်း(ပလောင်)အမျိုးသားပါတီ (TNP)၏ မြို့နယ် ဥက္ကဌ မိုင်းနုမ်ဟန်နှင့် ၎င်း၏ မိသားစုဝင်များ ယနေ့ချိန်ထိ အဆက်အသွယ်မရ ပျောက်ဆုံးနေကြောင်း သတင်းသိရသည်။
ယမန်နေ့ ဇန်နဝါရီလ ၁၀ ရက် မနက် ၁၁ နာရီဝန်းကျင်အချိန်တွင် မိုင်းကိုင်မြို့နယ် မက်ချီးနုတ်ကျေးရွာသို့ ၎င်း၏ မိခင်ရက်လည်ဆွမ်းအပြီး အပြန် တုံလောအုပ်စုနှင့် ပန်လော့ကျေးရွာကြားတွင် ပျောက်ဆုံးသွားကြောင်း ၎င်းတို့ရဲ့ အိမ်နီးချင်းတစ်ဦးက ပြောသည်။
“သူတို့ မိသားစု မက်ချီးနုတ်ရွာမှာ သုံးလေးရက်လောက်ရှိပြီ၊ မနေ့က(ဇန်နဝါရီလ ၁၀)မှာ သူတို့ပြန်လာပြီ၊ အခု တုံလောရောက်နေပြီ၊ ခနနေ မိုင်းကိုင်ကို ရောက်တော့မယ်လို့ ဖုန်းဆက်လာတယ်၊ အဲ့ကတည်းက ပျောက်သွားတာ၊ အခုချိန်ထိ ဘာအဆက်အသွယ်မှ မရသေးဘူး” ဟု မိုင်းနုမ်ဟန်နှင့် အိမ်နီးချင်းတစ်ဦးက ပြောသည်။
မိခင်ဖြစ်သူ ရက်လည်ဆွမ်းလုပ်ပြီး ကားတစ်စီးဖြင့် မိုင်းကိုင်သို့ ပြန်လာသည့် မိုင်းနုမ်ဟန် နှင့်အတူ ၎င်း၏ အမျိုးသမီးနှင့် ၇ လ အရွယ် သားလေး အပါအဝင် အဆက်အသွယ်လုံးဝမရကာ ပျောက်ဆုံးနေသည့်အတွက်ကြောင့် ကျေးရွာဒေသခံများက စိတ်ပူပြီး စိုးရိမ်နေကြောင်းလည်း သိရသည်။
“သူတို့ကလေးက ၇ လပဲ ရှိသေးတယ်၊ သူ့အမျိုးသမီးကလည်း နေသိပ်မကောင်းဘူးပြောပါတယ်၊ အခုလို အဆက်အသွယ်မရ အကျိုးအကြောင်းမသိ ပျောက်သွားတော့ စိတ်ပူရတယ်၊ မိုင်းကိုင်မှာက တိုက်ပွဲလည်း ဖြစ်နေတော့ ဘယ်သူ့ဆီကိုသွားပြီး အကူညီ တောင်းရမှန်းမသိဘူး” ဟု အထက်ပါ ပုဂ္ဂိုလ်က ပြောသည်။
မိုင်းနုမ်ဟန်တို့ပြန်လာသည့်လမ်းတွင် စစ်ကောင်စီဂိတ်များရှိသည့်အပြင် RCSS နှင့် SSPP တို့ စစ်ရေးပဋိပက္ခဖြစ်နေသည့်ဒေသ ဖြစ်သဖြင့် ၄င်းပျောက်ဆုံးနေမှုအပေါ် ဆွေမျိုးများက စိုးရိမ်နေကြသည်။
ပြီးခဲ့သည့် ဇန်နဝါရီလ ၅ ရက်နေ့တွင် ကားတိုက်မှုကြောင့် သေဆုံးသွားရသည့် မိုင်းနုမ်ဟန်၏ မိခင်ဖြစ်သူ အသက် (၇၀)အရွယ်ရှိ ယာထန်ငိန်း၏ ရက်လည်အပြီး အိမ်ပြန်လာစဉ် ယခုလိုပျောက်ဆုံးသွားရကြောင်း သိရသည်။
Leave a Comments