သျှမ်းပြည် မိုင်းကိုင်မြို့နယ် တုံလောကျေးရွာအုပ်စု ဆားတောကျေးရွာမှ ဒေသခံများသည် သျှမ်းတပ်နှစ်တပ်အကြား ရှော့တိုက်မိုင်းအန္တရာယ်ကြောင့် ကျေးရွာအတွင်း မနေရဲကြောင်း စုံစမ်းသိရသည်။

ဖေဖော်ဝါရီ လဆန်းပိုင်းမှ စတင်ပြီး မိုင်းကိုင်မြို့နယ် တုံလောကျေးရွာအုပ်စုရှိ ဆားတောကျေးရွာမှ ဒေသခံများသည် သျှမ်းတပ်နှစ်တပ်အကြား ထောင်ထားသည့် မိုင်းပေါက်ကွဲပါက သူကြီးနှင့် ရွာသားများ ခေါ်ယူစစ်ဆေးခံရခြင်းကြောင့် ရှော့တိုက်မိုင်းအန္တရာယ် စိုးရိမ်ကာ ကျေးရွာအတွင်း မနေရဲဘဲ နီးစပ်ရာ နမ့်ကတ်ကျေးရွာတွင် သွားရောက်နေထိုင်ကြောင်း ဒေသခံများက ပြောသည်။

“ဆားတောရွာက ရွှေ့ခိုင်းတာမျိုး မဟုတ်ဘူး၊ ဒေသခံတွေက ကြောက်လို့ ကိုယ့်ဘာသာ ရှောင်နေကြတာမျိုးပေါ့။ တစ်ခုခုဖြစ်ရင် အဲ့ဘက်ရွာထဲ ဝင်ရှာခံရတော့ ရွာသားတွေလည်း ကြောက်လို့ ထွက်ပြေးကြတာ၊ ရွာသူကြီးလည်း အမေးခံရတော့ ကြာလာတော့လည်း မရင်ဆိုင်ရဲတော့ဘူး။ တိုက်ပွဲဖြစ်တာတော့ မရှိဘူး၊ ရှော့တိုက်မိုင်း ထောင်တာတော့ ရှိတယ်”ဟု တုံလောဒေသခံ အသက် (၃၀) ကျော်အရွယ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

တုံလောကျေးရွာအုပ်စု ဆားတောကျေးရွာတွင် အိမ်ခြေ (၃၀) ကျော် နေထိုင်ပြီး လတ်တလော ရှော့တိုက်မိုင်းအန္တရာယ် စိုးရိမ်ရခြင်းကြောင့် နမ့်ကတ်ကျေးရွာဘက်သို့ တိမ်းရှောင်ကာ ဆွေမျိုးများထံ မှီခိုနေထိုင်ရခြင်းဖြစ်ကာ အတင်းအကြပ် ကျေးရွာရွှေ့ပြောင်းခံရခြင်း မဟုတ်ကြောင်း ဒေသခံများထံမှ သိရသည်။

ယမန်နှစ် ၂၀၂၄ နှစ်ကုန်ပိုင်းတွင် တုံလောကျေးရွာအုပ်စု ကွန်နားကျေးရွာအနီးတွင် မိုင်းပေါက်ကွဲခဲ့ရာ SSPP တပ်ဖွဲ့မှ ဆားတောရွာသူကြီးနှင့် ရွာသားများကို ခေါ်ယူစစ်ဆေးခဲ့ပြီး ပန်ဆက်ကျေးရွာအုပ်စုရှိ နားဟွယ်ရွာကို နောင်မိုရွာနှင့် သွားရောက်ပူးပေါင်းရန် ရွှေ့ပြောင်းခိုင်းကြောင်း တုံလောဒေသခံ အမျိုးသမီးက ဆက်ပြောသည်။

“ဆားတောကတော့ သူကြီးလုပ်မယ့်သူ မရှိလို့၊ ပြီးတော့ မိုင်းပေါက်ကွဲရင်လည်း အစိမ်းဘက်ကို ရွာလူကြီးတွေ ခေါ်ခံရတာ ရှိတယ်။ ဖြစ်လာရင် နှစ်ဘက်စလုံးနဲ့ ရင်ဆိုင်ရတော့ အကုန်လုံးကို ကြောက်နေရတာ၊ အဲ့ကြောင့် နမ့်ကတ်ရွာမှာ သွားစုနေတာ။ ပြောင်းရတာက နားဟွယ်ရွာ၊ အဲ့တာတော့ အိမ်ခြေ ၅ အိမ်၊ ၆ အိမ်ပဲ ကျန်လို့ SSPP က နောင်မိုရွာနဲ့ သွားပေါင်းခိုင်းတာ”ဟု ၎င်းဒေသခံ အမျိုးသမီးက ပြောဆိုသည်။

လက်ရှိတွင် မိုင်းကိုင်မြို့နယ် တုံလောကျေးရွာအုပ်စုအနီး SSPP နှင့် RCSS တပ်ဖွဲ့ဝင်များ ပျောက်ကြားပုံစံဖြင့် သွားလာလှုပ်ရှားနေပြီး နှစ်ဘက်တပ်ဖွဲ့အချင်းချင်း မကြာခဏ မိုင်းထောင်ခြင်းမျိုး ပြုလုပ်နေခြင်းကြောင့် ဒေသခံများမှာ လုံခြုံရေးစိုးရိမ်နေရကြောင်း သိရသည်။

ယမန်နှစ် ၂၀၂၄ နိုဝင်ဘာလ နောက်ဆုံးပတ်တွင် မိုင်းကိုင်မြို့နယ် တုံလောကျေးရွာအုပ်စု ပန်ပွဲကျေးရွာအနီး SSPP နှင့် RCSS တပ်ဖွဲ့တို့အကြား တိုက်ပွဲပြင်းထန်ခဲ့ပြီး ကျေးရွာကော်မတီဝင်တစ်ဦးလည်း တိုက်ပွဲကြား ပစ်သတ်ခံရကာ နေအိမ်မီးရှို့ခံခဲ့ရကြောင်း ဒေသခံများက ပြောသည်။