သျှမ်းပြည် မောက်မယ်မြို့နယ် ကဒူးကြီးဒေသတွင် လှုပ်ရှားနေသည့် ပအိုဝ်းအမျိုးသား လွတ်မြောက်ရေးတပ်မတော် (PNLO/PNLA) တပ်ဖွဲ့ဝင်နှင့် မိသားစုဝင်များ စုစုပေါင်း (၇၈) ဦးတို့ RCSS တပ်ဖွဲ့ထံ သွားရောက်ပူးပေါင်းခဲ့ကြောင်း သတင်းသိရသည်။

ယမန်နေ့ (ဩဂုတ်လ ၂၇ ရက်) တွင် မောက်မယ်မြို့နယ် ကဒူးကြီးဒေသရှိ ပအိုဝ်းအမျိုးသားလွတ်မြောက်ရေးတပ်မတော် (PNLO/PNLA) ရဲဘော်အချို့နှင့် ၎င်းတို့၏ မိသားစုဝင်များ စုစုပေါင်း (၇၈) ဦးတို့သည် သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) တပ်ဖွဲ့ထံ သွားရောက်ပူးပေါင်းခဲ့ကြောင်း RCSS သတင်းနှင့်ပြန်ကြားရေး Tai Freedom မီဒီယာတွင် ပုံနှင့်တကွ ထုတ်ပြန်ခဲ့သည်။

ထိုသို့ ပူးပေါင်းရန်လာရောက်ခဲ့သည့် PNLA တပ်ဖွဲ့ဝင်များနှင့် မိသားစုဝင်များကို RCSS တာဝန်ရှိသူများက လက်ခံကြိုဆိုကာ အားပေးစကား ပြောဆိုပြီး စုစုပေါင်း (၇၈) ဦးအတွက် တစ်ဦးလျှင် ကျပ် ၅ သိန်းစီ ထောက်ပံ့ပေးခဲ့ကြောင်း RCSS ထုတ်ပြန်ချက်အရ သိရသည်။

“အဖွဲ့အစည်းထဲမှာ ရေရှည်ရပ်တည်ဖို့ ခက်လာတဲ့သဘောလို့ မြင်တယ်။ ရန်သူ့ဘက်က ထွက်ပေါက်မပေးတော့တဲ့အချိန် နီးစပ်ရာကို အားကိုးရှာတဲ့အနေနဲ့ ရဲဘော်တွေက မိသားစုအတွက် ရှင်သန်ရေးလမ်းကြောင်း ရွေးချယ်လိုက်တဲ့ သဘောပါပဲ။ မိခင် အဖွဲ့အစည်း ရပ်တည်ချက်နဲ့ ရဲဘော်တွေရဲ့ ရပ်တည်ချက်က သပ်သပ်စီ ဖြစ်သွားတာပေါ့” ဟု သျှမ်းပြည်တောင်ပိုင်းမှ နိုင်ငံရေးတက်ကြွလှုပ်ရှားသူ လူငယ်တစ်ဦးက သျှမ်းသံတော်ဆင့်ကို ပြောသည်။

၂၀၂၆ နှစ်ဆန်းပိုင်းမှ စတင်ပြီး ပအိုဝ်းအမျိုးသား လွတ်မြောက်ရေးတပ်မတော် (PNLA) ဌာနချုပ် ပြောင်းရွှေ့အခြေစိုက်သည့် မောက်မယ်မြို့နယ် ကဒူးကြီးဒေသကို အာဏာသိမ်းစစ်တပ်နှင့် ၎င်းလက်အောက်ခံ PNO ပြည်သူ့စစ် ပူးပေါင်းတပ်များက အင်အားအလုံးအရင်းဖြင့် ထိုးစစ်ဆင်ခဲ့သောကြောင့် PNLA နှင့် တိုက်ပွဲအပြင်းအထန် ဖြစ်ပွားခဲ့သည်။

အဆိုပါ တိုက်ပွဲများကြောင့် မောက်မယ်မြို့နယ်ရှိ ဟံးဗွာရွာ၊ နောင်ထောဝ်ရွာ၊ ဗန်းမတ်ကျေးရွာမှ ပြည်သူ တစ်ထောင်ခန့် နားဟီးကျေးရွာနှင့် နီးစပ်ရာ ကျေးရွာများသို့ စစ်ဘေးတိမ်းရှောင်နေရပြီး ဆေးဝါးအကူအညီများ၊ စားနပ်ရိက္ခာများနှင့် သောက်သုံးရေများ လိုအပ်လျက်ရှိကာ ၎င်းတို့ နေအိမ်အများစုလည်း မီးရှို့ခံထားရသောကြောင့် နေရပ်မပြန်နိုင်သေးကြောင်း သိရသည်။

လက်ရှိ ကဒူးကြီးဒေသတွင် PNO ပြည်သူ့စစ်ဘက်မှ နေရပ်ပြန် စစ်ဘေးရှောင်များကို စစ်မှုထမ်းခေါ်ယူနေပြီး ငွေကြေးကောက်ခံမှုများလည်း ရှိနေကြောင်း၊ မြေမြှုပ်မိုင်းအန္တရာယ်လည်း ရှိနေသေးသဖြင့် နေရပ်မပြန်သေးကြောင်း စစ်ဘေးရှောင်များက ပြောသည်။

အလားတူ ဆီဆိုင်တိုက်ပွဲ ဖြစ်ပွားစဉ်ကလည်း RCSS ထိန်းချုပ်နယ်မြေထဲ စစ်ဘေးရှောင်လာသည့် ပအိုဝ်းတိုင်းရင်းသားများကို RCSS တာဝန်ရှိသူများ လက်ခံကြိုဆိုပြီး စားဝတ်နေရေးအတွက် ကူညီပံ့ပိုးပေးခဲ့ကြောင်း Tai Freedom မီဒီယာတွင် ရေးသားဖော်ပြထားသည်။