သျှမ်းပြည် မိုင်းကိုင်မြို့နယ်တွင် လှုပ်ရှားနေသည့် SSPP တပ်ဖွဲ့၏ စစ်ယာဉ်တန်းကို RCSS တပ်ဖွဲ့က မိုင်းဆွဲတိုက်ခိုက်ခဲ့ကြောင်း SSPP Info မှ သတင်းထုတ်ပြန်လာသည်။

ယမန်နေ့ (မေလ ၂၈ ရက်) ညနေ ၃ နာရီခန့်တွင် မိုင်းကိုင်နှင့် ရပ်စောက်မြို့နယ်အကြား မိုင်းယွန်းကျေးရွာအုပ်စုရှိ နောင်ဟိုး(ဝၢၼ်ႈၼွင်ႁဵဝ်း)နှင့် မောက်ဆလီ(ဝၢၼ်ႈမွၵ်ႇၸလီ)ရွာအနီး SSPP စစ်ကြောင်းမှ ယာဉ်တစ်စီးကို RCSS ဘက်မှ မိုင်းဆွဲတိုက်ခိုက်ခဲ့ခြင်းကြောင့် ယာဉ်အနည်းငယ် ထိခိုက်ခဲ့ကြောင်း SSPP Info ၏ သတင်းထုတ်ပြန်ချက်တွင် ဆိုထားသည်။

ပြီးခဲ့သည့် ၂၀၂၃ ခုနှစ် နိုဝင်ဘာလ ၂၉ ရက်တွင် သျှမ်းတပ်နှစ်တပ်ကြား အပစ်ရပ် ကြေညာပြီးနောက်ပိုင်း မတ်လနှင့် မေလတို့တွင် RCSS တပ်ဖွဲ့မှ SSPP တပ်ဖွဲ့ကို မိုင်းဆွဲတိုက်ခိုက်ခြင်း၊ ခြုံခိုတိုက်ခိုက်ခြင်း (၇) ကြိမ် ပြုလုပ်ခဲ့ကြောင်း SSPP Info က မေလ (၂၈) ရက်တွင် ထုတ်ပြန်သည်။

မိုင်းကိုင်မြို့နယ်တွင် SSPP တပ်ဖွဲ့ စစ်ယာဉ်တန်းကို RCSS တပ်ဖွဲ့က မိုင်းဆွဲတိုက်ခိုက်ခဲ့သည်ဟု SSPP Info မှ ထုတ်ပြန်သည့် သတင်းနှင့် ပတ်သက်၍ နှစ်ဘက်တပ်ဖွဲ့ထံမှ အတည်ပြုနိုင်ရန် သျှမ်းသံတော်ဆင့်မှ SSPP ပြောရေးဆိုခွင့်ရှိသူ ဗိုလ်မှူးကြီး စိုင်းဆုထံ ဆက်သွယ်ခဲ့သော်လည်း ဖုန်းစက်ပိတ်ထားသည်။

အလားတူ RCSS ပြောရေးဆိုခွင့်ရှိသူ ဗိုလ်မှူးစိုင်းခမ်းစံ ထံသို့ (၁၀)ကြိမ်ခန့် ဖုန်းဖြင့် ဆက်သွယ်မေးမြန်းရန် ကြိုးစားခဲ့သော်လည်း ဖုန်းလက်ခံဖြေကြားခြင်း မရှိသေးပါ။

ထို့အတူ မတ်လ ၃၁ ရက်နေ့တွင် ရပ်စောက်မြို့နယ်အတွင်း SSPP တပ်ဖွဲ့ မိုင်းဆွဲတိုက်ခိုက်ခံရပြီး SSPP တပ်သားတစ်ဦး ကျဆုံး၍ ၂ ဦး ထိခိုက်ဒဏ်ရာရခဲ့သည့် ဖြစ်စဉ်နှင့် ပတ်သက်ပြီး SSPP တပ်ဖွဲ့၏ တောင်းဆိုချက်အတိုင်း RCSS တပ်ဖွဲ့က မြေပြင်သို့ စစ်ဆေးခဲ့သော်လည်း ကျူးလွန်သူကို မသိရှိရကြောင်း Tai Freedom မီဒီယာကလည်း မေလ (၂၆) ရက်စွဲဖြင့် ပြန်လည်ထုတ်ပြန်ထားသည်။

ရပ်စောက်မြို့နယ်အတွင်း SSPP တပ်ဖွဲ့ မိုင်းဆွဲတိုက်ခိုက်ခံရခြင်း ဖြစ်စဉ်တွင် SSPP/SSA ဗဟိုဌာနချုပ် အတွင်းရေးမှူး(၂) ဗိုလ်မှူးကြီးစိုင်းဆုမှ RCSS ဗဟိုဆက်ဆံရေးတာဝန်ခံ ဗိုလ်မှူးကြီးအောင်တင်းထံ အချက်(၃) ချက်ဖြင့် ညှိနှိုင်းတောင်းဆိုခဲ့သည်ဟု နှစ်ဘက်ထုတ်ပြန်ချက်များ အရ သိရသည်။

သျှမ်းတပ်နှစ်တပ်အကြား အပစ်ရပ်ပြီးနောက်ပိုင်း ရပ်စောက်မြို့နယ်၌ မတ်လမှ စတင်ပြီး မေလအထိ ၃ လအတွင်း နှစ်ဘက်စစ်ကြောင်း အချင်းချင်း ထိတွေ့ပစ်ခတ်မှု (၃)ကြိမ်ထက် မနည်းရှိခဲ့ကြောင်း နှစ်ဘက်တပ်ဖွဲ့များက ထုတ်ပြန်သော်လည်း မည်သူက စတင်ပစ်ခတ်ခြင်းနှင့် ပတ်သက်၍ အပြန်အလှန် ဖြေရှင်းချက်ထုတ်ကာ ရှုံ့ချနေသည်။

“သျှမ်းလက်နက်ကိုင် တော်လှန်ရေးကို ဦးစီးဦးဆောင်လုပ်နေတဲ့ အဖွဲ့တွေက ဘာကြောင့် အချင်းချင်း ပြန်တိုက်နေရတာလဲ။ ပိုဆိုးတာက ဒီလိုတာဝန်ယူထားတဲ့လူတွေ ကိုယ်တိုင်က မပေါင်းစည်းနိုင်ဘူး၊ ညှိညှိနှိုင်းနှိုင်းနဲ့ မလုပ်နိုင်တဲ့ အခြေအနေမှာ လူထုတွေ လူငယ်တွေကြားထဲမှာ အကွဲကွဲအပြဲပြဲ ဖြစ်စေတယ်။ နင်မှန်တယ် ငါမှားတယ်ဆိုတဲ့ အပြစ်ဖို့တဲ့ ဓလေ့ကနေ မရုန်းထွက်နိုင်ဘူး”ဟု သျှမ်းလူငယ်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ရပ်စောက်မြို့နယ်တွင် မေလ (၁၉) ရက်က နှစ်ဘက်တိုက်ပွဲ ဖြစ်ပွားပြီးနောက်ပိုင်း SSPP တပ်ဖွဲ့မှ ကျိုင်းခမ်းကျေးရွာအုပ်စု၊ နားစံရွာ ကျေးရွာအုပ်ချုပ်ရေးမှူးကို လာရောက်ရှာဖွေရာ မတွေ့သဖြင့် ရွာသား(၃)ဦးကို စစ်ဆေးရန် ဖမ်းဆီးသွားပြီး လက်ရှိအချိန်ထိ ပြန်မလွတ်ပေးသေးကြောင်း Tai Freedom မီဒီယာက မေလ ၂၆ ရက်တွင် ဆိုထားသည်။

သျှမ်းတပ်နှစ်တပ် အချင်းချင်းကြား အပစ်အခတ် ရပ်စဲထားပြီးနောက် ထိတွေ့ပစ်ခတ်မှုနှင့် ပတ်သက်ပြီး RCSS တပ်ဖွဲ့ဘက်မှ မေလ (၁၈/၂၆/၂၇) ရက်တို့တွင် သတင်းထုတ်ပြန်ထားပြီး SSPP တပ်ဖွဲ့ဘက်မှ မေလ (၂၁/၂၆/၂၈) ရက်တို့တွင် အသီးသီး ထုတ်ပြန်ဖြေရှင်းထားကြသည်။

သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး” ပြင်းထန်နေစဉ် ၂၀၂၃ ခုနှစ် နိုဝင်ဘာလ ၂၉ ရက်က သျှမ်းတပ်နှစ်တပ်ဖြစ်သည့် SSPP/SSA နှင့် RCSS/SSA တို့သည် နှစ်ဘက်တပ်ဖွဲ့ အချင်းချင်းကြား အချက်(၉)ချက် ပါဝင်သည့် သဘောတူညီချက်ဖြင့် အပစ်အခတ် ရပ်စဲခဲ့သော်လည်း လေးအကြာ မတ်လမှ စတင်၍ တိုက်ပွဲပြန်လည်ဖြစ်ပွားခဲ့ပြီး မေလအတွင်း အပြန်အလှန် ထုတ်ဖော်ပြောဆိုလာကြခြင်း ဖြစ်သည်။