သျှမ်းပြည်တောင်ပိုင်း မိုင်းကိုင်မြို့နယ် ပန်ကေတု စစ်ဆေးရေးဂိတ်တွင် ဖမ်းခံရသည့် မိုင်းပန်ဒေသခံ အမျိုးသားတစ်ဦး တစ်လကျော်ကြာ ယနေ့ထိတိုင် မိသားစုနှင့် အဆက်အသွယ်မရသေးကြောင်း စုံစမ်းသိရသည်။
မိုင်းပန်မြို့ဒေသခံ စိုင်းထိန်းသည် ပြီးခဲ့သည့် ၂၀၂၁ ခုနှစ် ဒီဇင်ဘာလ ၂ ရက်နေ့က သီပေါမြို့ သျှမ်းနှစ်သစ်ကူးပွဲတော်သို့ သွားစဉ် မိုင်းကိုင်မြို့နယ် ပန်ကေတုစစ်ဆေးရေးဂိတ်အနီး သျှမ်းလက်နက်ကိုင်အဖွဲ့ တစ်ဖွဲ့၏ ဖမ်းဆီးခြင်းခံရကြောင်း သတင်းသိရသည်။
“ပြီးခဲ့တဲ့ ဒီဇင်ဘာ ၂ ရက်က သီပေါ သျှမ်းနှစ်သစ်ကူးပွဲကိုသွားဖို့ ခရီးထွက်သွားတာ၊ ပန်ကေတု စစ်ဆေးရေးဂိတ်မှာ အစစ်ခံရတယ်။ ဖုန်းထဲမှာ RCSS/SSA ဝတ်စုံဝတ်ပြီး ပုံရိုက်ထားတာတွေ့လို့ ဖမ်းဆီးခံရတယ်လို့ သိရပါတယ်၊ အသေးစိတ်တော့ မသိရဘူး” ဟု ဖမ်းဆီးခံထားရသူ စိုင်းထိန်းနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။
အဆိုပါ ဖမ်းဆီးခံထားရသူ ကလေးငယ်နှစ်ဦးဖခင် စိုင်းထိန်းသည် (RCSS/SSA) တပ်သားယူနီဖောင်းဝတ်စုံ ဝတ်ဆင်ပြီး ရိုက်ထားသည့် ဓာတ်ပုံကို ဖုန်းထဲတွင် စစ်ဆေးတွေ့ရှိသဖြင့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)က ဖမ်းဆီးထားကြောင်း၊ ၎င်း၏ ဖုန်းထဲရှိ ဖုန်းနံပါတ်တစ်ခုသို့ ဆက်သွယ်ပြောပြ လာကြောင်း အထက်ပါပုဂ္ဂိုလ်က ပြောသည်။
“သူ့(စိုင်းထိန်း) ဖုန်းထဲမှာ RCSS/SSA ဝတ်စုံဝတ်ပြီး ပုံရိုက်ထားတာ တွေ့မိလို့ ကျနော်တို့ ခေါ်ထားပါတယ်ဆိုပြီး SSPP/SSA တပ်ဖွဲ့တစ်ယောက်က သူ့ဖုန်းနဲ့ ဖုန်းဆက်ပြောလာပါတယ်၊ ဆက်မိတာက မိုင်းပန်က သူ့ သူငယ်ချင်း တစ်ယောက်ကိုပါ၊ အဲ့ကြောင့် ကျနော်တို့လည်း သူ့ကို SSPP/SSA တို့က ဖမ်းထားမှန်းသိရတာပါ” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
ယင်းကိစ္စနှင့် ပတ်သက်ပြီး SSPP/SSA ၏ ပြောရေးဆိုခွင့်ရှိသူ ဒုတိယ ဗိုလ်မှူးကြီး စိုင်းဆုကို ဆက်သွယ်မေးမြန်းရာ ဌာနချုပ်သို့ အစီရင်ခံစာ ရောက်မလာသေးသဖြင့် မသိရှိရသေးကြောင်း သျှမ်းသံတော်ဆင့်ကို ပြောသည်။
“ဒီကိစ္စနဲ့ပတ်သက်ပြီး အထက်ကိုတော့ အစီရင်ခံစာ မရောက်လာသေးဘူး။ အဲ့ဒီ မိုင်းကိုင်တို့ ပန်ကေတုတို့ ဘက်မှာ ဆိုတာကလည်း မြေပြင်အခြေအနေအရ စစ်ဆေးမှုတွေရှိနေတယ်ဆိုတော့ ကျနော်တို့ တပ်ဖွဲ့က လုပ်တာ ဟုတ်မဟုတ် ဆက်လက်စုံစမ်းကြည့်ပါမယ်” ဟု SSPP/SSA မှ ဒုတိယ ဗိုလ်မှူးကြီး စိုင်းဆုက သျှမ်းသံတော်ဆင့်ကို ပြောသည်။
လက်ရှိတွင် စိုင်းထိန်း ဖမ်းဆီးခံထားရသည့် သတင်းကြားရပြီး အဆက်အသွယ်ပြတ်နေသည်မှာ တစ်လကျော် ကြာပြီဖြစ်သည့်အတွက် မိသားစုဝင်များက စိုးရိမ်စိတ်ပူနေကြောင်း သတင်းသိရသည်။
စိုင်းထိန်း စစ်ဆေးခြင်းခံရသည့် မိုင်းကိုင်မြို့နယ် ပန်ကေတုနှင့် အနီးတစ်ဝိုက်မှ ဟမ်းငိုင်းကျေးရွာအုပ်စုနှင့် ၀ိန်းငိန်ကျေးရွာအုပ်စုများအထိ လမ်းကြောတစ်လျှောက်တွင် သျှမ်းပြည် ပြန်လည်ထူထောင်ရေးကောင်စီ (RCSS/SSA)နှင့် ရှမ်းပြည်တိုးတက်ရေးပါတီ (SSPP/SSA)တို့အကြား တိုက်ပွဲပြင်းထန်နေကြောင်း သိရသည်။
Leave a Comments