တရုတ်နိုင်ငံ ကူမင်းမြို့တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် စစ်တပ်ကိုယ်စားလှယ်များ တွေ့ဆုံဆွေးနွေးခဲ့စဉ် ထိန်းချုပ်မြို့ ၄ မြို့မှ TNLA ဆုတ်ခွာပေးရန် စစ်တပ်ဘက်မှ တောင်းဆိုခဲ့ကြောင်း သိရှိသည်။
ပြီးခဲ့သည့် မေလ ၁၂ ရက်နှင့် ၁၃ ရက်တို့တွင် တရုတ်နိုင်ငံ၏ ကြားဝင်စီစဉ်ပေးမှုဖြင့် တအာင်း(ပလောင်) အမျိုးသားလွတ်မြောက်ရေးတပ်မတော်နှင့် စစ်တပ် နှစ်ဘက်ကိုယ်စားလှယ်များ ကူမင်းမြို့၌ တွေ့ဆုံဆွေးနွေးခဲ့ကြသည်။
“၁၀၂၇ စစ်ဆင်ရေး” စတင်ချိန်ကတည်းက TNLA နှင့် စစ်တပ်ကြား (၁၁) ကြိမ်မြောက် တွေ့ဆုံပွဲတွင် TNLA ထိန်းချုပ်ထားသည့် နမ့်ခမ်းမြို့၊ နမ္မတူမြို့၊ မိုင်းလုံမြို့နှင့် မိုင်းငေါ့မြို့ (၄) မြို့တို့ကို ၁ လအတွင်း ထပ်မံ တပ်ဆုတ်ခွာပေးရန် စစ်တပ်ကိုယ်စားလှယ်များဘက်မှ တောင်းဆိုခဲ့ကြောင်း စစ်ရေးသတင်းရင်းမြစ်ထံမှ သိရသည်။
“ဒီတစ်ခေါက် တွေ့ဆုံပွဲကတော့ TNLA ကို နောက်ထပ် တပ်ဆုတ်ပေးဖို့ စစ်တပ်ဘက်က ပြောတယ်လို့ ကြားတယ်။ နမ္မတူ၊ နမ့်ခမ်းနဲ့ ကျောက်မဲထဲက မိုင်းလုံ၊ မိုင်းငေါ့ ဒီ ၄ မြို့ကို ပြန်တောင်းတယ်။ ၂၀၀၈ ခြေဥထဲက နယ်မြေအတိုင်းပဲ TNLA ကို လက်ခံနိုင်မယ့်သဘောပေါ့။ အချိန် (၁) လ ထပ်ပေးတယ် ဆိုတာကလည်း ငြိမ်းချမ်းရေးဖိတ်ခေါ်မှု ရက် ၁၀၀ ပြည့်မှာနဲ့ တိုက်ဆိုင်နေတော့ ဘယ်လိုဖြစ်လာမလဲ စောင့်ကြည့်ရမယ်” ဟု သျှမ်းပြည် စစ်ရေး၊ နိုင်ငံရေးကျွမ်းကျင်သူတစ်ဦးက ပြောဆိုသည်။
ယခုတစ်ကြိမ် ကူမင်းမြို့ တွေ့ဆုံဆွေးနွေမှုအတွင်း စစ်တပ်ဘက်မှ ဒုဗိုလ်ချုပ်ကြီး ကိုကိုဦး ဦးဆောင်သည့် ကိုယ်စားလှယ်များနှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ဘက်မှ ထိပ်ပိုင်းခေါင်းဆောင်များ တက်ရောက်ခဲ့ကြောင်း သိရသည်။
အလားတူ ဧပြီလအတွင်းကလည်း လားရှိုးမြို့ ဆင်နှစ်ကောင်ဟိုတယ်၌ စစ်တပ်နှင့် TNLA ကိုယ်စားလှယ်များ တွေ့ဆုံဆွေးနွေးခဲ့ကြောင်း သိရပြီး ယင်းဆွေးနွေးပွဲပြီးနောက် တိုက်ပွဲအတွင်း TNLA ဖမ်းဆီးထိန်းသိမ်းထားသည့် စစ်သုံ့ပန်း (၁၀၀) ကျော်ကို မေလဆန်းပိုင်းတွင် ကျောက်မဲမြို့ရှိ စစ်တပ်ထံ ပြန်လည်လွှဲပြောင်းပေးခဲ့ကြောင်း သိရသည်။
တရုတ်နိုင်ငံတွင် စစ်တပ်နှင့် TNLA ကိုယ်စားလှယ်များ ထပ်မံတွေ့ဆုံခဲ့ခြင်းနှင့် ပတ်သက်၍ နှစ်ဘက်စလုံးမှ သတင်းထုတ်ပြန်ခြင်း မရှိသေးဘဲ ဆွေးနွေးပွဲ အကြောင်းအရာနှင့် ပတ်သက်ပြီး သျှမ်းသံတော်ဆင့်မှ ဆက်လက်စုံစမ်းနေသည်။
“မြို့ထဲမှာတော့ ထူးခြားတာ ဘာမှ မရှိသေးပါဘူး။ TNLA လည်း ပုံမှန်အတိုင်း မြို့ထဲမှာ လှုပ်ရှားနေတာ၊ အုပ်ချုပ်ရေး ယန္တရားတွေကလည်း ပုံမှန်လည်ပတ်နေတယ်။ ဘဏ်အသစ် လာဖွင့်မယ့်ဟာလည်း လာမဖွင့်ဖြစ်သေးဘူး”ဟု နမ့်ခမ်းမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယမန်နှစ် ၂၀၂၅ အောက်တိုဘာလ ၂၇ နှင့်၂၈ ရက်တို့တွင် စစ်တပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ကိုယ်စားလှယ်တို့ တရုတ်နိုင်ငံ၊ ကူမင်းမြို့တွင် (၉) ကြိမ်မြောက် တွေ့ဆုံဆွေးနွေးခဲ့စဉ် အပစ်အခတ်ရပ်စဲရေး သဘောတူညီခဲ့ကြပြီး မိုးကုတ်မြို့နှင့် မိုးမိတ်မြို့မှ TNLA တပ်ဆုတ်ခွာခဲ့ရသည်။
Leave a Comments