သျှမ်းပြည်တောင်ပိုင်း ဟိုပုံးမြို့နယ်အတွင်း RCSS/SSA နှင့် မြောက်ပိုင်းမဟာမိတ်တို့တိုက်ပွဲ ထပ်မံဖြစ်ပွားကာ စစ်ရှောင်များ ထပ်မံတိုးလာကြောင်း သတင်းသိရသည်။

ဟိုပုံးမြို့နယ် မိုင်းလင်းကျေးရွာအုပ်စုအတွင်း RCSS/SSA နှင့် မြောက်ပိုင်းမဟာမိတ်တပ်ဖွဲ့ တို့ သည် ယနေ့ (ဖေဖော်ဝါရီ ၁၈)ရက် မနက်ပိုင်း ၁၀နာရီဝန်းကျင်တွင် တကြိမ် နှင့် မွန်းလွဲပိုင်း ၂နာရီဝန်းကျင်တွင် တကြိမ် တိုက်ပွဲဖြစ်ပွားခဲ့ကြောင်း ဒေသခံများက ပြောသည်။

“ဒီနေ့ တိုက်ပွဲနှစ်ကြိမ်ဖြစ်တယ်။ မနက်က ၁၀ နာရီဝန်းကျင်တိုက်ပွဲမှာ တစ်နာရီနီးပါးကြာခဲ့တယ်၊မွန်းလွဲ ပိုင်း ၁ နာရီဝန်းကျင်မှာ နာရီဝက်လောက်ပစ်ကြတယ်၊ လက်နက်ကြီးလက်နက်ငယ်တွေလည်း ကြားရလို့ တိုက်ပွဲ က ပြင်းထန်တယ်လို့ ယူဆပါတယ်၊ ရွာသားတွေလည်း ထွက်ပြေးကြပြီ” ဟု မိုင်းလင်းကျေးရွာအုပ်စုမှ ပြည်သူ တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် တိုက်ပွဲဖြစ်ပွားသည့် ဟိုပုံးမြို့နယ် မိုင်းလင်းကျေးရွာအုပ်စုတွင်းမှ ပြည်သူများသည် ပင်လုံမြို့နယ် ဝမ်းယိမ်းဘုန်းကြီးကျောင်းသို့ ထွက်ပြေးခိုလှုံ နေရကြောင်း၊ ဝမ်ယိင်းမှပြည်သူများလည်းတိုက်ပွဲကြိုတင်ရှောင် ရှားသည့်အနေဖြင့် ပင်လုံမြို့ပေါ်ရှိ ဆွေမျိုးအိမ်များသို့ သွားရောက်ခိုလှုံနေကြောင်း ပင်လုံရောက် စစ်ရှောင် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“ကျမတို့က မိုင်းလင်းကနေ စစ်ရှောင်လာတာပါ၊ မနက်ပိုင်း ပစ်ခတ်သံတွေကြားရတယ်။ ကျမတို့ထွက်ပြေး လာတာ အသက်ကြီးပိုင်းတွေ အများစုပါလာကြတယ်၊ တချို့က ဘာပစ္စည်းမှ မယူဘဲ စစ်ရှောင်လာရတယ်” ဟု စစ်ရှောင်အမျိုးသမီးတစ်ဦးက သျှမ်းသံတော်ဆင့်ကိုပြောသည်။

ထို့အပြင် တိုက်ပွဲဖြစ်ပွားမှုကြောင့် မိုင်းကိုင်မြို့နယ် နောင်မွန်ကျေးရွာမှ ဒေသခံပြည်သူများကလည်း မိုင်းကိုင်မြို့ပေါ်သို့ စစ်ဘေးရှောင် ရောက်ရှိလာကြောင်း မိုင်းကိုင်မြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။

“ဒီနေ့ တိုက်ပွဲဖြစ်သွားတဲ့ နေရာက မြို့နယ် ၃ ခုရဲ့ နယ်နမိတ်လိုနေရာမျိုးမှာပေါ့၊ ဖြစ်တာက ဟိုပုံးမြို့နယ်ထဲ ဒါပေမဲ့ စစ်ရှောင်တာက ဟိုပုံးက မိုင်းလင်းရော၊ ဝမ်ယိမ်းရော၊ ပြီးတော့ သူတို့နဲ့ ရွာချင်းနီးစပ်နေတဲ့ မိုင်းကိုင်မြို့ နယ်ထဲက နောင်မွန်ကျေးရွာက ပြည်သူတွေကလည်း မြို့ပေါ်ကိုစစ်ရှောင်ရောက်လာတယ်” ဟု မိုင်းကိုင်မြို့မှ ပြည်သူတစ်ဦးက သျှမ်းသံတော်ဆင့်ကို ပြောသည်။

ယမန်နေ့ ဖေဖော်ဝါရီလ ၁၇ ရက်နေ့တွင်လည်း ဟိုပုံးမြို့နယ်အတွင်းသို့ ရောက်ရှိလာသည့် SSPP/SSA တပ်သား ပုံရိပ်များ လူမှုကွန်ယက်စာမျက်နှာသို့ ပျံ့နှံ့လာသည်။