Monday, July 22, 2024

NCA ထိုးထားသည့် RCSSနှင့် PNLO ပဋိပက္ခကြား ငြိမ်းချမ်းစွာ ဖြေရှင်းမည်ဟုဆို

Must read

NCA လက်မှတ်ထိုးထားသည့် RCSS/SSA နှင့် PNLO/PNLA တိုက်ပွဲဖြစ်ပွားမှုအပေါ် ငြိမ်းချမ်းရေးကို ဦးတည်ပြီး ဖြေရှင်းမည်ဟု သတင်းသိရသည်။

ယမန်နေ့ (ဖေဖော်ဝါရီလ ၁၆) ရက် သျှမ်းပြည်တောင်ပိုင်း မောက်မယ်မြို့နယ် ကဒူးကြီးဒေသအတွင်းတွင် NCA ထိုးထားသည့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် ပအိုဝ်းအမျိုးသားလွတ်မြောက်ရေး တပ်မတော် (PNLO/PNLA) တို့ ထိတွေ့တိုက်ပွဲဖြစ်ပွားခဲ့ကြောင်း သိရသည်။

တိုက်ပွဲ ဖြစ်ပွားမှုနှင့် ပက်သက်ပြီး RCSS/SSA မှ ပြောရေးဆိုခွင့်ရှိသူ ဗိုလ်မှူးခမ်းစံက အမှတ်မထင် ထိတွေ့တိုက်ပွဲဖြစ်သွားခြင်းသာဖြစ်ပြီး နှစ်ဦးနှစ်ဘက်အနေဖြင့် ငြိမ်းချမ်းရေးကို ဦးတည်ဖြေရှင်းသွားမည် ဖြစ်ကြောင်း သျှမ်းသံတော်ဆင့်ကို ပြောသည်။

“ဒါက ထိတွေ့တိုက်ပွဲပေါ့နော်၊ ကျနော်တို့ RCSS နဲ့ PNLO/PNLA ကဆက်ဆံရေးလမ်းကြောင်းရှိတာပေါ့၊ ဒါကြောင့် မနေ့က တိုက်ပွဲဖြစ်သွားနဲ့ ပက်သက်ပြီး ကျနော်တို့ နှစ်ဦးနှစ်ဘက် ဆက်သွယ်ပြီး ဖြေရှင်း သွားမှာပါ” ဟု ဗိုလ်မှူးခမ်းစံက သျှမ်းသံတော်ဆင့်ကို ပြောသည်။

ယမန်နေ့ (ဖေဖော်ဝါရီလ ၁၆) ရက်တွင် ဖြစ်သွားသည့် လမ်းကြောင်းအတိုင်းချီတက်လာသော RCSS/SSA တပ်သားများသည် PNLO/PNLA တို့နှင့် ထိပ်တိုက်တွေ့ဆုံရာမှ တိုက်ပွဲဖြစ်ပွားခြင်းဖြစ်ပြီး မိနစ် ၃၀ ခန့် ပစ်ခတ်မှုဖြစ်ပွားကြောင်း ဗိုလ်မှူးခမ်းစံက ပြောသည်။

“ရင်ဆိုင်တိုက်ပွဲမဟုတ်တဲ့ ထိတွေ့တိုက်ပွဲသာဖြစ်တဲ့အတွက် တိုက်ပွဲရဲ့ သဘောသဘာဝအတိုင်း တွေ့တာနဲ့ နေရာယူတယ်၊ ပစ်ခတ်မှုရှိမယ်၊ ပြီးရင် အခြေအနေကြည့်ပြီး ပြန်ဆုတ်ခွာမယ် အဲ့လိုသဘောမျိုးပေါ့၊ ကြာချိန်က ၃၀ မိနစ်လောက်ပါပဲ၊ ထိခိုက်ကျဆုံးမှုတော့ မသိရသေးဘူး” ဟု ဗိုလ်မှူးခမ်းစံက ပြောသည်။

အထက်ပါတိုက်ပွဲဖြစ်ပွားမှုနှင့် ပက်သက်ပြီး RCSS/SSA ကကြိုတင်အကြောင်းကြားမှု မရှိဘဲ ကဒူးကြီးဒေသ ရန်ကင်းနီးကျေးရွာအနီး ရောက်ရှိလာပြီး PNLA လုံခြုံရေးတပ်သား များကို စတင်ပစ်ခတ်ခြင်းဖြစ်ကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO မှ ထုတ်ပြန်ထားသည်ကို တွေ့ရသည်။

တိုက်ပွဲဖြစ်ပွားမှုနှင့်ပက်သက်ပြီး NCA ထိုးထားသည့် တိုင်းရင်းသားလက်နက်ကိုင်တပ်ဖွဲ့ အနေဖြင့် RCSS/SSA နှင့် PNLO/PNLA အကြားတွင် နှစ်ဖက်ဥက္ကဌများ သဘောတူညီလက်မှတ်ရေးထိုးသည့် အတိုင်း နှစ်ဦးနှစ်ဘက်ကြား ဖြစ်ပေါ်လာသည့် ပဋိပက္ခများကို ငြိမ်းချမ်းစွာ ဖြေရှင်းသွားမည်ဟု PNLO ဒုတိယ ဥက္ကဌ ခွန်မြင့်ထွန်းက သျှမ်းသံတော်ဆင့်ကို ပြောသည်။

“၂၀၁၇ ဇူလိုင်လ ၁ ရက်နေ့မှာ RCSS/SSA နဲ့ PNLO/PNLA နှစ်ဖက်ဥက္ကဌများ သဘောတူညီလက်မှတ်ရေးထိုး ထားတဲ့ နှစ်ဦးနှစ်ဘက်ကြားဖြစ်ပေါ်လာတဲ့ ပြဿနာကြီးငယ် ကိစ္စအဝဝကို ငြိမ်းချမ်းစွာ ဆွေးနွေးဖြေ ရှင်းမယ်ဆိုတဲ့ သဘောတူညီချက်ကရှိပြီးသား၊ အခုဖြစ်လာတဲ့ ပြဿနာကိုလည်း မဟာမိတ်တပ်ဖွဲ့ချင်း ငြိမ်းချမ်းစွာဖြေရှင်းဖို့ကိုပဲ ဦးတည်သွားမှာပါ” ဟု PNLO ဒု ဥက္ကဌ ခွန်မြင့်ထွန်းက ပြောသည်။

လက်ရှိတွင် PNLO အနေဖြင့် ပဋိပက္ခများပြန့်ပွားမှု မရှိစေရန်အတွက် ၎င်းတို့၏ တပ်ဗိုလ်တပ်မှူးများကို အသိပေး ညှိနှိုင်းဆောင်ရွက်မှုများ ရှိနေကြောင်းလည်း PNLO ဒုဥက္ကဌ ခွန်မြင့်ထွန်းက ပြောသည်။

လွန်ခဲ့သည့် ၂၀၀၇ ခုနှစ်အတွင်းတွင် PNLO အဖြစ်ပြောင်းလဲလာသည့် SNPLO အဖွဲ့ကို နအဖ စစ်အစိုးရ လက်နက်ချ ခိုင်းစဥ်တွင် ဌာနချုပ်ကို စွန့်ခွာပြီး RCSS/SSA ထိန်းချုပ်နယ်မြေ ထိုင်းနယ်စပ်တွင် ပူးတွဲအခြေစိုက် မှုရှိသော်လည်း အဆိုပါ ဒေသအတွင်းမှာ အချင်းချင်းတိုက်ပွဲဖြစ်ပွားမှုလည်း ရှိခဲ့ပါသည်။

Leave a Comments

- Advertisement -spot_img

Latest article